រាជធានីភ្នំពេញ ៖ សិស្សានុសិស្សសាលាអន្តរជាតិវេស្ទន៍ឡាញ និងណត្សឡាញជាច្រើននាក់ បានចូលរួមស្ដាប់នូវកម្មវិធីតម្រង់ទិស និងផ្សព្វផ្សាយអាហារូបករណ៍មុននឹងពួកគេត្រូវបញ្ចប់ថ្នាក់មធ្យមសិក្សាទុតិយភូមិនៅពេលខាងមុខនេះ ។ កម្មវិធីនេះ បានធ្វើឡើងកាលពីរសៀលថ្ងៃទី១៩ ឧសភា ២០១៨ នៅសាលាវេស្ទន៍ឡាញ សាខាខណ្ឌដូនពេញ រាជធានីភ្នំពេញ ។
លោកលុន ភារិន នាយកសិក្សាធិការនៃក្រុមហ៊ុនវេស្ទឡាញន៍ អេឌ្យូខេសិនគ្រុប បានអោយដឹងថា ក្រុមហ៊ុនវេស្ទឡាញន៍ អេឌ្យូខេសិនគ្រុប មានចក្ខុវិស័យច្បាស់លាស់ ដើម្បីអោយក្លាយជាក្រុមហ៊ុនដែលផ្ដល់សេវាកម្មអប់រំនាំមុខគេនៅអាស៊ីអាគ្នេយ៍ ។ បច្ចុប្បន្នក្រុមហ៊ុនវេស្ទឡាញន៍ អេឌ្យូខេសិនគ្រុប ដំណើរការសាលារៀនវេស្ទឡាញន៍ និងណត្សឡាញន៍ ដែលផ្ដល់សេវាកម្មអប់រំពីកម្រិតមត្តេយ្យដល់ថ្នាក់ទី១២ ស្របតាមកម្មវិធីសិក្សារបស់ក្រសួងអប់រំ យុវជន និងកីឡា និងសេវាប្រឹក្សាយោបល់ បណ្ដុះបណ្ដាលផ្នែកជំនួញ អប់រំ និងស្រាវជ្រាវ ក្នុងគោលបំណងអភិវឌ្ឍន៍សមត្ថភាពអ្នកអប់រំ គ្រប់គ្រង និងអ្នកជំនួញ ។
លោកបន្តថា ចាប់តាំងពីក្រុមហ៊ុនបង្កើតឡើងនៅឆ្នាំ២០០៨មក ក្រុមហ៊ុនេះត្រូវបានទទួលស្គាល់ថា ជាក្រុមហ៊ុនឈានមុខគេមួយក្នុងវិស័យអប់រំ ដោយបានបំពេញកាតព្វកិច្ច និងកិច្ចការសង្គម ។ បច្ចុប្បន្ន ក្រុមហ៊ុននេះកំពុងដំណើរការសាលារៀនចំនួន៩ និងវិទ្យាស្ថានបណ្ដុះបណ្ដាល និងស្រាវជ្រាវដែលមានបុគ្គលិកសរុបប្រមាណ១២០០នាក់ និងសិស្សានុសិស្សជាង១៣.០០០នាក់។
សូមរំលឹកថា កម្មវិធីតម្រង់ទិស និងផ្សព្វផ្សាយអាហារូបករណ៍នេះ ត្រូវបានរៀបចំឡើងក្នុងគោលបំណង តម្រង់ទិសសិស្សានុសិស្សក្រោយបញ្ចប់មធ្យមសិក្សាទុតិយភូមិ, ផ្សព្វផ្សាយពីនីតិវិធី និងយន្ដការក្នុងការជ្រើសរើសនិស្សិតអាហារូបករណ៍ឱ្យចូលរៀនថ្នាក់បរិញ្ញាបត្រ នៅតាមគ្រឹះស្ថានឧត្ដមសិក្សា សម្រាប់ឆ្នាំសិក្សា២០១៨-២០១៩, ផ្សព្វផ្សាយអាហារូបករណ៍សិក្សាថ្នាក់ឧត្ដមសិក្សាពីសកលវិទ្យាល័យដៃគូរបស់ WEG ដល់សិស្សានុសិស្សនៃសាលារៀនវ៉េស្ទឡាញន៍ និងសាលារៀនណត្សឡាញន៍ និងចុះអនុស្សរណៈយោគយល់គ្នារវាង WEG និងសកលវិទ្យាល័យដៃគូ។
គួបញ្ជាក់ថា ក្រុមហ៊ុន វេសឡាញ អេឌ្យូខេសិនគ្រុប បានសហការជាមួយគ្រឹះស្ថានអប់រំក្នុងប្រទេស និងក្រៅប្រទេសជាច្រើនដូនជា ប្រទេសចិន ថៃ សិង្ហបុរី ម៉ាឡេស៊ី អូស្ត្រាលី និងសហរដ្ឋអាមេរិក ដើម្បីផ្តល់ឱកាសដល់សិស្សានុសិស្សបានសិក្សាបន្តថ្នាក់ឧត្តមសិក្សា និងផ្លាស់ប្តូរកម្មវិធីសិក្សាពីគ្នាទៅវិញទៅមក៕
ចែករំលែកព័តមាននេះ