ខេត្តបាត់ដំបង ៖ «កន្ទុយដីវិទ្យាល័យមោងប្ញស្សី» ដែលស្ថិតក្នុងឃុំគារ ស្រុកមោងប្ញស្សី អាចនឹងត្រូវមន្ត្រីខិលខូចមួយចំនួនឃុបឃិតគ្នាកាត់ចេញពីប្លង់ដីវិទ្យាល័យយកទៅអង្កន់ជាដីឡូត៍ធ្វើប្លង់ចែកគ្នា ឬលក់បន្តឱ្យទៅឯកជន ។ នេះបើតាមការពិនិត្យលើឯកសារ (ប្លង់) ដែលបានបែកធ្លាយដល់ដៃប្រជាពលរដ្ឋ និងមន្ត្រីមួយចំនួននៅក្នុងស្រុកមោងប្ញស្សី ប៉ុន្តែលោកនាយកវិទ្យាល័យ និងអាជ្ញាធរស្រុកនេះ នៅតែអះអាងថា
«គ្មានការបាត់បង់ទេ ដីសាលានៅតែជាដីសាលាដដែល» ។
ពលរដ្ឋម្នាក់ដែលសុំមិនប្រាប់ឈ្មោះបានប្រាប់កោះសន្តិភាពថា ប្លង់ដីវិទ្យាល័យមោងប្ញស្សី បានបែកធ្លាយកាលពីល្ងាចថ្ងៃទី១៧ ឧសភា បន្ទាប់ពីសំណុំរឿងដ៏រសើបនេះ រង្គោះរង្គើរដោយសារការទាមទារបស់ពលរដ្ឋ និងគ្រូបង្រៀនមួយចំនួន ឱ្យនាយកវិទ្យាល័យនេះបង្ហាញការពិតនូវឯកសារនានាដែលពាក់ព័ន្ធនឹងប្លង់ដីវិទ្យាល័យ ។ ប្រភពដដែលបាននិយាយថា គេកំពុងសង្ស័យថា កន្ទុយដីនៃវិទ្យាល័យនេះ ដែលមានទំហំប្រហែលកន្លះហិកតា ទំនងអាចត្រូវគេកាត់ចេញពីដីវិទ្យាល័យមែន ហើយត្រូវគេពុះជាដីឡូត៍ និងមានបញ្ជាក់លេខក្បាលដីយ៉ាងជាក់លាក់ទៀតផង ។ នេះបើតាមការពិនិត្យលើ«វិញ្ញាបនបត្រសម្គាល់ម្ចាស់អចលនវត្ថុ» របស់វិទ្យាល័យមោងប្ញស្សី ដែលបានបែកធ្លាយដល់ដៃពលរដ្ឋ និងមន្ត្រីមួយចំនួន ។ ប៉ុន្តែលោកលឹម សុផល នាយកវិទ្យាល័យមោងប្ញស្សី និងលោកពេជ្រ ម៉ាឡៃ អភិបាលស្រុកមោងប្ញស្សី នៅតែអះអាងប្រាប់ពលរដ្ឋនិងលោកគ្រូ អ្នកគ្រូមួយចំនួន ដែលធ្វើការតវ៉ាថា «ដីនោះមិនបាត់បង់ទេ ដីសាលានៅតែជាដីសាលាដដែល» ។ ហើយថែមទាំងស្នើឱ្យក្រុមអ្នកតវ៉ាមានការស្ងប់ស្ងាត់បញ្ឈប់ការតវ៉ា ក្រោមគោលការណ៍យោគយល់គ្នា ។
តំណាងអ្នកតវ៉ាមួយរូប គឺលោក ហេង ពុទ្ធា បានប្រាប់កោះសន្តិភាពថា បន្ទាប់ពីកោះសន្តិភាពបានទម្លាយនូវរឿងអាស្រូវដីវិទ្យាល័យមោងប្ញស្សីនេះ កាលពីរសៀលថ្ងៃទី១៧ ឧសភា លោកពេជ្រ ម៉ាឡៃ អភិបាលស្រុកមោងប្ញស្សី បានសម្រេចបង្កើតគណៈកម្មការចម្រុះចុះពិនិត្យលើដី ដែលមានបញ្ហានោះ ដើម្បីឆ្លើយតបទៅនឹងការតវ៉ារបស់ពលរដ្ឋ និងគ្រូបង្រៀនមួយចំនួន ដែលបានប្រមូលស្នាមមេដៃធ្វើ ញ្ញតិទាមទាឱ្យអាជ្ញាធរ និងនាយកវិទ្យាល័យបង្ហាញការពិតអំពីរឿងកន្ទុយដីវិទ្យាល័យនេះ ដែលគេសង្ស័យថា មានការឃុប
ឃិតលួចធ្វើប្លង់បែងចែកគ្នា ឬលក់បន្ត ។ តំណាងអ្នកតវ៉ារូបនេះ បានបញ្ជាក់ថា ជាមួយនឹងការចុះពិនិត្យលើទីតាំងដីផ្ទាល់ លោកលឹម សុផល នាយកវិទ្យាល័យមោងប្ញស្សី បានចង្អុលបង្ហាញបង្គោលព្រំដីចាស់ ដោយបញ្ជាក់ប្រាប់ក្រុមគណៈកម្មការថា «ដីនេះមិនបាត់បង់ទេ គឺនៅតែជាដីសាលាដដែល»។
លោកហេង ពុទ្ធា បានបញ្ជាក់ថា ទាំងប្រជាពលរដ្ឋ និងលោកគ្រូអ្នកគ្រូមួយចំនួន ដែលបានតវ៉ាក្នុងរឿងនេះ បានយល់ព្រមតាមសំណូមពររបស់លោកអភិបាលស្រុក ដែលស្នើឱ្យមានការស្ងប់ស្ងាត់ យោគយល់គ្នា ដោយសាតែមានការអះអាង និងការចង្អុលបង្ហាញរបស់លោកនាយកវិទ្យាល័យដែលថា ដីវិទ្យាល័យគ្មានការបាត់បង់ ហើយកន្ទុយដីវិទ្យាល័យនេះ គឺនៅត្រឹមបង្គោលព្រំដីចាស់ដដែល ។ លោកបានព្រលយពាក្យដែរថា សំណុំរឿងនេះ ទំនងអាចនឹងផ្ទុះជាថ្មីទៀត ព្រោះការអះអាងនិងការចង្អុលបង្ហាញព្រំដីរបស់លោកនាយកវិទ្យាល័យខាងលើនេះ វាផ្ទុយគ្នាទៅនឹងប្លង់ដីវិទ្យាល័យ ដែលបានបែកធ្លាយដល់ដៃពលរដ្ឋ និងមន្ត្រីមួយចំនួននៅក្នុងស្រុក ។
បើយោងលើឯកសារវិញ្ញាបនបត្រសម្គាល់ម្ចាស់អចលនវត្ថុ លេខ០២០៦០២០៥-០៧៥២ ដែលកោះសន្តិភាពទទូលបាន ដែលគេអះអាងថា ជាប្លង់ដីវិទ្យាល័យមោងឬស្សី គឺមានក្បាលដីលេខ៧៥២ មានផ្ទៃដីទំហំ២១,៣៥៦ម៉ែត្រការ៉េ មានទីតាំងស្ថិតនៅក្នុងភូមិពោធិ៍១ ឃុំគារ ស្រុកមោងប្ញស្សី បានចុះក្នុងបញ្ជីសារពើភណ្ឌរបស់រដ្ឋកាលពីថ្ងៃទី២១ កញ្ញា ២០១៦ ដោយមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្តបាត់ដំបង គឺបានបង្ហាញយ៉ាងច្បាស់រវាងទំហំប្លង់ដីវិទ្យាល័យមោងប្ញស្សី និងទំហំកន្ទុយដី នៃវិទ្យាល័យ ដែលត្រូវបានគេធ្វើប្លង់កាត់ផ្ដាច់ចេញពីគ្នា។
នៅក្នុងប្លង់ដីវិទ្យាល័យនេះ កន្ទុយដីដែលត្រូវគេកាត់ផ្ដាច់ពីដីសាលានោះ ស្ថិតនៅខាងក្រោយនៃវិទ្យាល័យ ដែលមានទំហំប្រហែលកន្លះហិកតា ។ ដីនេះត្រូវបានកាត់ចេញពីដីវិទ្យាល័យខាន់ចែកដោយផ្លូវលំមានទទឹង២ម៉ែត្រ ហើយត្រូវគេពុះជាប្លង់ដីឡូត៍ចំនួន១០ប្លង់ ដែលមានចុះបញ្ជីសម្គាល់លេខក្បាលដីយ៉ាងជាក់លាក់ទៀតផង ។ បើពិនិត្យលើប្លង់ដីឡូត៍ទាំង១០នោះ គេឃើញមានលេខក្បាលដីចាប់ពីលេខ៧៤២ រហូតដល់លេខ៧៥១ ដែលមានផ្លូវលំព័ទ្ធជុំវិញ ។
សូមបញ្ជាក់ថា ប៉ុន្មានសប្ដាហ៍កន្លងទៅនេះ ប្រជាពលរដ្ឋ និងលោកគ្រូ អ្នកគ្រូមួយចំនួន នៅស្រុកមោងប្ញស្សី បាននាំគ្នាប្រមូលស្នាមមេដៃ ដើម្បីធ្វើញ្ញតិប្ដឹងទៅថ្នាក់ដឹកនាំ និងស្ថាប័នពាក់ព័ន្ធនានា ដើម្បីទាមទាឲ្យមានការបង្ហាញឯកសារ ដែលពាក់ព័ន្ធនឹងដីវិទ្យាល័យមោងប្ញស្សី មួយផ្នែកខាងក្រោយ ដែលសង្ស័យថា ត្រូវមន្ត្រីខិលខូចមួយចំនួនលួចកាត់យកធ្វើប្លង់ចែកគ្ នាឬលក់បន្តឱ្យឯកជន ។ ដីនេះត្រូវគេដឹងថា បានបាត់ចេញពីដីវិទ្យាល័យមោងប្ញស្សី ក្នុងអំឡុងពេលក្រុមគណៈកម្មការសុរិយោដីចុះវាស់វែងចុះបញ្ជីដីធ្លីជាប្រព័ន្ធ ។
បើពិនិត្យលើឯកសារខាងលើនេះ ហាក់បានស៊ីសង្វាក់ទៅនឹងការបំភ្លឺរបស់លោកលឹម សុផល នាយកវិទ្យាល័យមោងប្ញស្សី ដែលបានប្រាប់កោះសន្តិភាពថា កាលដែលក្រុមបច្ចេកទេសរបស់វិទ្យាល័យប្រើខ្សែម៉ែត្រធម្មតាចុះវាសដំបូងផ្ទៃដីមានចំនួន២៧,៣០០ម៉ែត្រការ៉េ ។ ប៉ុន្តែនៅពេលក្រុមគណៈកម្មការសុរិយោដីប្រើ
ឧបករណ៍ចុះវាស់វែង ដើម្បីចុះក្នុងបញ្ជីសារពើភណ្ឌរបស់រដ្ឋរកឃើញផ្ទៃដីទំហំតែជាង២១,០០០ម៉ែត្រការ៉េប៉ុណ្ណោះ ដោយសារកាត់ដីចំណីផ្លូវ និងដីប្រឡាយទឹក ។ លោកនាយកវិទ្យាល័យបានហៅការតវ៉ារបស់ប្រជាពលរដ្ឋ និងគ្រូបង្រៀនមួយចំនួនថា «ជាការយល់ច្រឡំ ព្រោះដីនោះមិនបានបាត់ទៅណាទេ នៅតែជាដីរបស់រដ្ឋ ឬដីរបស់សាលាដដែល» ។
កោះសន្តិភាពមិនអាចទំនាក់ទំនងសុំការបំភ្លឺបន្ថែមពីលោកងី សែត ប្រធានមន្ទីរអប់រំយុវជន និងកីឡាខេត្ត បានទេ នារសៀលថ្ងៃទី២១ ឧសភា នេះ ជុំវិញរឿងអាស្រូវដីធ្លីរបស់វិទ្យាល័យមោងឬស្សីខាងលើ ។ ប៉ុន្តែលោកពេជ្រ ម៉ាឡៃ អភិបាលស្រុកមោងប្ញស្សី បានប្រាប់កោះសន្តិភាពតាមទូរស័ព្ទនៅព្រឹកថ្ងៃដដែលនេះ
ថា សំណុំរឿងនេះ ត្រូវបានសម្របសម្រូលគ្នាបញ្ចប់ហើយ បន្ទាប់ពីលោកបានដឹកនាំក្រុមគណៈកម្មការចុះពិនិត្យលើទីតាំងដីនេះដោយផ្ទាល់ ។ លោកអភិបាលស្រុករូបនេះបានបន្តថា ប្រជាពលរដ្ឋនិងគ្រូបង្រៀនមួយចំនួន ដែលតវ៉ាបានឯកភាពគ្នា ក្រោយពីលោកលឹម សុផល នាយកវិទ្យាល័យមោងប្ញស្សី បានចង្អុលបង្ហាញថា ដីសាលាគឺស្ថិតនៅត្រិមព្រំដីចាស់ដដែល មិនបាត់បង់ឡើយ ។ ប៉ុន្តែនៅពេលសួរនាំអំពីប្លង់ដីសាលា ដែលមានការអង្កន់ពុះជាដីឡូត៍ផ្នែកខាងក្រោយ ថែមទាំងមានចុះលេខក្បាលដីយ៉ាងជាក់លាក់ផងនោះ លោកពេជ្រ ម៉ាឡៃ មិនបានពន្យល់ជាក់លាក់ទេ ។
លោកគ្រាន់តែបានបញ្ជាក់ថា «ខ្ញុំបានឃើញគេបង្ហាញប្លង់ដីវិទ្យាល័យនោះ តែមិនទាន់ដឹងបែបណាទេ ព្រោះខ្ញុំមិនទាន់បានឃើញប្លង់ដើមនៅឡើយ»។ ទោះជាយ៉ាងណា បើតាមប្រភពពីប្រជាពលរដ្ឋ និងមន្ត្រីមួយចំនួននៅស្រុកមោងប្ញស្សី បានឲ្យដឹងថា កន្ទុយដីវិទ្យាល័យមោងប្ញស្សី អាចត្រូវគេអង្កន់ពុះជាដីឡូត៏ចែកគ្នា និងបានលក់បន្តទៀតផង ។
ប្រភពដែលសុំមិនប្រាប់ឈ្មោះនេះ បានបង្ហើបឱ្យងដែរថា មានគ្រូបង្រៀនពី៥ ទៅ៧នាក់នៅវិទ្យាល័យនេះ និងមន្ត្រីការិយាល័យជំនាញចាប់ពីថ្នាក់ស្រុក ដល់ខេត្តប៉ុន្មាននាក់ទៀត ត្រូវគេសង្ស័យថា មានជាប់ព័ន្ធនឹងការសមគំនិតគ្នាលួចធ្វើប្លង់យកដីសាលានេះ ។ ក្រុមអ្នកផ្ដិតមេដៃធ្វើញ្ញតិទាមទារដីមកធ្វើជាសម្បត្តិរដ្ឋវិញខាងលើនេះ បានហៅការបំភ្លឺរបស់អាជ្ញាធរស្រុក និងលោកនាយកវិទ្យាល័យនេះថា ជាការភូតកុហក់និង
បំភាន់ភ្នែកមហាជនតែប៉ុណ្ណោះ ។ ព្រោះបើពិនិត្យលើវិញ្ញាបនបត្រសម្គាល់ម្ចាស់អចលនវត្ថុ(ប្លង់ដីវិទ្យាល័យមោងប្ញស្សី) ដែលបែកធ្លាយខាងលើនេះ គឺបានបង្ហាញយ៉ាងច្បាស់ថា កន្ទុយដីវិទ្យាល័យនេះ ត្រូវបានគេឃុបឃិតពុះជាដីឡូត៍ចែកគ្នា ឬលក់បន្តហើយ និងមានចុះលេខក្បាលដីនីមួយៗយ៉ាងច្បាស់ក្រឡែតទៀតផង ។ សំណុំរឿងនេះ នឹងអាចផ្ទុះឡើងជាថ្មី ប្រសិនបើដីនោះមិនអាចក្លាយជាដីរបស់វិទ្យាល័យវិញ
ដូចការលើកឡើងរបស់នាយកវិទ្យាល័យទេនោះ ៕
ចែករំលែកព័តមាននេះ