រាជធានីភ្នំពេញ ៖ អាយុគ្រាន់តែជាចំនួនលេខ ដែលរាប់ទុកតែប៉ុណ្ណោះ វាមិនមែនជាម៉ែត្រវាស់ សម្រាប់កាត់ដាច់ចំណងស្នេហាបានឡើយ គឺមានន័យថា ស្នេហារវាងបងនិងប្អូនគ្មានព្រំដែននោះទេ ។ គេថា សមុទ្រធំធេង តែស្នេហាធំជាងមហាសមុទ្រ មេឃខ្ពស់តែស្នេហាខ្ពស់ជាងវេហាស៍ ។
នៅមុននេះ លោកតាអាយុ៨៦ឆ្នាំម្នាក់បានក្លាយខ្លួនជាកូនកំលោះរៀបការជាមួយលោកយាយអាយុ៧១ឆ្នាំ ផ្អើលសង្គមហ្វេសប៊ុកនៅស្រុកវ៉ារិន ខេត្តសៀមរាប ។ ពេលនេះ គូស្នេហ៍១ទៀតក៏រឹតតែប្លែកនិងកម្របានជួបនោះ គឺកំលោះវ័យ២០ឆ្នាំគត់ បានសម្រេចចិត្តបញ្ចប់ភាពនៅលីវរបស់ខ្លួន រៀបការជាមួយស្ត្រីចំណាស់អាយុ៥០ឆ្នាំ កំពុងធ្វើឱ្យចាប់អារម្មណ៍មិនធម្មតាឡើយ ។
ទោះជាស្នេហ៍ខុសវ័យមែន តែនេះសបញ្ជាក់ឱ្យដឹងថា ពិតជាស្នេហាមិនគិតពីអាយុ និងមិនខ្វល់ពីសំដីអ្នកណាដែលចំអកទាំងអស់ សំខាន់គឺបងព្រមប្រគល់ភក្តីភាព និងសេចក្តីសុខឱ្យគ្នាដោយការចាប់ដៃ សាងសុភមង្គលដ៏ផ្អែមល្ហែមមួយប្រចាំជីវិត ។ លោក ហួរ ជីង ឈ្មោះក្នុងបណ្តាញសង្គមដែលជាកូនកំលោះទើបបានប្រពន្ធថ្មោងថ្មីបានឱ្យដឹងថា ភរិយារបស់លោកវ័យ៥០ឆ្នាំគត់ ដែលជាអាណិកជនរស់នៅប្រទេសញូវហ្សេឡែន ។ លោកថា យើងបានស្រឡាញ់គ្នាជាង១ឆ្នាំមកហើយ ដោយចិត្តនឹងចិត្ត ហើយគ្មានអ្នកណាមួយបង្ខំឡើយ គឺចេញពីបេះដូងដ៏បរិសុទ្ធរៀងៗខ្លួន ។ លោកបានបន្តថា មានមិត្តជាច្រើននាក់បានChat (ឆាត)មកសួរថា តើសម្រេចចិត្តច្បាស់ហើយឬនៅ ? បើច្បាស់យកទៅ អាយុគ្រាន់តែជាតួលេខ ។
ទោះបីជាយ៉ាងណាក្តីនេះ ជាជម្រើសរបស់លោកធ្វើម៉េចទេ ព្រោះជានិស្ស័យ ហើយក៏អរគុណអ្នកដែលបានមកចូលរួមមង្គលការរបស់លោកនិងភរិយា ។ រឿងអាយុមិនគិតទេ សំខាន់គឺការយល់ចិត្តនិងស្រឡាញ់គ្នា ។ សូមបញ្ជាក់ថា លោកហួរ ជីង (Hour Jing) ក៏ធ្លាប់មានវត្តមានក្នុងសិល្បៈ ថតខ្សែភាពយន្តមួយចំនួនដែរ គ្រាន់តែមិនទាន់ល្បីប៉ុណ្ណោះ ព្រោះជាតួថ្មីតូចតាចម្នាក់ ដែលកំពុងចាក់គ្រឹះក្នុងវិស័យភាពយន្ត ។ អាពាហ៍ពិពាហ៍របស់អ្នកសម្តែងក្នុងខ្សែភាពយន្តរូបនេះ ត្រូវបានគេនិយាយថា លេងមួយក្បាច់ ទាំងផលិតករទាំងតារាសម្តែងនិងមិត្តភក្តិនិយាយលែងចេញ ព្រោះថារូបគេមិនល្បីក្នុងការសម្តែងភាពយន្តនៅឡើយ តែបានល្បីដោយសារអាពាហ៍ពិពាហ៍ជាមួយកូនក្រមុំអាយុកន្លះសតវត្ស ។
មិនមានព័ត៌មានណាមួយផ្សេងទៀត បន្ថែមត្រូវបានរ៉ាយរ៉ាប់ឱ្យដឹងនៅឡើយនោះទេថា តើពន្លកស្នេហ៍រវាងពួកគេទាំង២ កើតឡើងដោយរបៀបណា បើម្នាក់នៅប្រទេសកំណើត ឯម្នាក់នៅប្រទេសដែនកោះញូវហ្សេឡែន កណ្តាលមហាសមុទ្រប៉ាស៊ីហ្វិក ហើយក៏មិនដឹងថាកូនក្រមុំមានស្ថានភាពគ្រួសារបែបណាទេ នៅឯញូវហ្សេឡែននោះ ។
បានកត់សម្គាល់ទៀតមុននេះ មានគូស្នេហ៍លោកតារៀបការជាមួយស្រីក្មេងកាលពីប៉ុន្មានខែកន្លងមកនេះនៅខេត្តកំពង់ធំ ពេលនេះមានស្ត្រីចំណាស់ ក៏អាចរៀបការបានជាមួយប្រុសក្មេងបានដែរ មិនមានអ្វីខុសនោះទេ ព្រោះជាព្រហ្មលិខិតនិងជាកម្មសិទ្ធិនៃជីវិតបុគ្គលរៀងៗខ្លួន ។
កោះសន្តិភាព មានតែចូលរួមអបអរនិងសូមបួងសួងប្រសិទ្ធិពរជ័យជូនពរដល់គូស្នេហ៍ទាំង២ជួបតែភាពសុខដុម និងសុភមង្គលកុំបីឃ្លៀងឃ្លាតឡើយ ៕
ចែករំលែកព័តមាននេះ