​ដាំមិនទាន់​ទទួលបាន​ផលផង ត្រូវប្រឈម​នឹងការ​ដកចោលវិញ​


ខេត្ត​ប៉ៃលិន ៖ ប្រជា​កសិករ​ដែល​ដាំ​បន្លែ​សាឡា​ត់​កាលពី​ជាង​កន្លះ​ខែ​មុន រហូត​មក​ដល់​ពេល​នេះ​មិន​ទទួល​បាន​ផល​សម្រាប់​យក​ទៅ​លក់​នៅ​លើ​ទីផ្សារ​ដូច​សព្វ​ដងនោះ​ទេ គឺ​ប្រឈម​នឹង​ការ​ខូចខាត​ដោយសារ​តែ​ភ្លៀង​ធ្លាក់​ជាប់​ៗ​គ្នា​ច្រើន​ពេក​ពោល​គឺ​ភ្លៀង​ធ្លាក់​ជាប់​ៗ​គ្នា​ស្ទើរ​រាល់ថ្ងៃ​ជាង​កន្លះ​ខែ​មក​ហើយ ។ អ្វី​ដែល​ពួក​គាត់​ត្រូវធ្វើ​បន្ត​គឺ​ដក​បន្លែ​សាឡា​ត់​ដែល​ដាំ​ពី​មុន​ចោល រួច​កាប់​ដី​ដាក់​ដាំ​សា​ជា​ថ្មី​ឡើង​វិញ ។ ជា​ការ​ពិត​ណាស់​ភ្លៀង​ធ្លាក់​ច្រើន​មិនមែន​ជា​តម្រូវការ​សម្រាប់​អ្នក​ដាំ​ដំណាំ​ប្រភេទ​នេះនោះ​ទេ ខុស​ពី​កសិករ​ធ្វើស្រែ​ដែល​សប្បាយ​ចិត្តបាន​ទឹក​ដក់​ពេញ​ស្រែ​គឺ​ល្អ​ណាស់ ។ 

កសិករ​ដាំ​បន្លែ​ម្នាក់​ឈ្មោះ ទ្រី ភេទ​ប្រុស រស់នៅ​ភូមិ​ប៉ា​ហ៊ី​ជើង សង្កាត់​ប៉ៃលិន ក្រុង ប៉ៃលិន​បានឱ្យ​ដឹង​ថា គាត់​បាន​ដាំ​បន្លែ​ជា​ច្រើន​ប្រភេទ​ដូច​ជា ស្ពៃចង្កឹះ ត្រកួន ត្រប់ និង​សាឡា​ត់​ជាង​១០​រង ។ ប៉ុន្តែ​គួរ​ឱ្យ​សោកស្តាយ​បន្លែ​សាឡា​ត់​ទាំងអស់​ត្រូវ​ដក​ចោល ដើម្បី​យក​ដី​ដាក់​ដាំ​សា​ជា​ថ្មី​ឡើង​វិញ ព្រោះ​ការ​ដាំ​របស់​គាត់​កាលពី​ជាង​កន្លះ​ខែ​មុន​ទទួល​រង​ការ​ខូចខាត​អស់ទាំង​ស្រុង​ទៅ​ហើយ ។

គាត់​បន្ត​ថា បន្លែ​សាឡា​ត់​មិន​ត្រូវការ​ទឹកភ្លៀង​ជោកជាំ​ពេក​ទេ បើ​ពុំ​ដូច្នោះ​ប្រឈម​នឹង​ការ​ខូចខាត​ជាក់​ជា​មិន​ខាន ។ រហូត​មក​ដល់​ពេល​នេះ​មិន​ត្រឹមតែ​បន្លែ​របស់​គាត់​ខូចខាត​ប៉ុណ្ណោះ​ទេ សូ​ម្បី​តែ​អ្នក​ដាំ​ដទៃ​ទៀត​នៅ​ក្នុង​ក្រុងប៉ៃលិន​ក៏​ទទួល​រង​ការ​ខូចខាត​គ្រប់​ៗ​គ្នា​ដែរ​។ ដូច្នេះ​ហើយ​ទើប​បន្លែ​សាឡា​ត់​នៅ​ឯ​ផ្សារ​មានការ​ឡើងថ្លៃ​ជាង​មុន ដោយ​១​គីឡូក្រាម​តម្លៃ​ពី​៦០០០​ទៅ​៧០០០​រៀល​ឯណោះ ខុស​ពី​កាល​មុន​១​គីឡូក្រាម​ត្រឹមតែ​២៥០០​ទៅ​៣០០០​រៀល​ប៉ុណ្ណោះ ។

ទោះជា​យ៉ាងណា​ក៏​ដោយ គាត់​មិន​ព្រម​បោះបង់​ចោល​មុខរបរ​ដាំ​បន្លែ​លក់​នេះ​ទេ​ព្រោះ​អាច​ជួយ​ដោះស្រាយ​ជីវភាព​គ្រួសារ​ប្រចាំ​ថ្ងៃ​បាន​។ បើសិនជា​យូរ​ៗ​ភ្លៀង​ម្តងនោះ​ដំណាំ​របស់​គាត់​លូតលាស់​ល្អ ដក​យក​ទៅ​លក់​នៅ​ទីផ្សារ​ជា​ប្រចាំ​ដោយ​មាន​ម៉ូយ​ចាំ​ទទួល​ទិញ​យក​ទៅ​លក់​បន្ត មិនបាច់​ព្រួយបារម្ភ​ភ័យ​ខ្លាច​ថា​លក់​មិន​ដាច់​នោះ​ឡើយ ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

កសិកម្ម

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ