ខេត្តសៀមរាប ៖ សេចក្តីរាយការណ៍បឋមឱ្យដឹងថា ក្រោយពីបានប្រទះសាកសពបុរសម្នាក់ កាលពីវេលាម៉ោង០៦ព្រឹកថ្ងៃទី២១ ឧសភា នេះ ស្ថិតត្រង់ចំណុចដីឡូត៍មួយកន្លែងក្នុងក្រុមទី២០ ភូមិធ្លកអណ្តូង សង្កាត់ស្លក្រាម ក្រុងសៀមរាប ក៏ត្រូវកម្លាំងសមត្ថកិច្ចបានធ្វើការឃាត់ខ្លួនមនុស្សចំនួន៤នាក់យកទៅសាកសួរ ខណៈត្រូវប្រជាការពារបានឃើញបុរសចំណាស់ម្នាក់ក្នុងចំណោម៤នាក់នេះ កំពុងអូសសាកសពចេញក្រៅរបងដីឡូត៍ ។
សេចក្តីរាយការណ៍បន្តថា ជំហានដំបូងជនទាំង៤នាក់ នៅមិនទាន់ស្គាល់ឈ្មោះនៅឡើយទេ ។ ដោយឡែកសាកសពត្រូវបានស្គាល់មានឈ្មោះឆៀក ប៊ុនណា អាយុ៣៥ឆ្នាំ ជាកម្មករសំណង់ មានស្រុកកំណើតនៅភូមិ សំរោងក្នុង ឃុំសំរោងក្នុង ស្រុកឯកភ្នំ ខេត្តបាត់ដំបង បច្ចុប្បន្ន នៅក្នុងភូមិកើតហេតុខាងលើ ។
ទាក់ទិនករណីនេះ ពលរដ្ឋបានប្រាប់ថា នៅមុនពេលកើតហេតុ គឺពួកគេខាងលើ (ជនសង្ស័យនិងជនរងគ្រោះ) បាននាំគ្នាផឹកស៊ីនៅក្នុងដីឡូត៍នោះ ស្រាប់តែព្រឹកឡើងក៏ប្រទះឃើញសាកសពបុរសម្នាក់ទៅវិញ ដោយសង្ស័យថា អាចជាទំនាស់ក្នុងវង់ផឹកនោះ ។
រីឯប្រជាការពារភូមិម្នាក់ ក៏បានប្រាប់ដែរថា នៅព្រឹកថ្ងៃដដែលនេះ គាត់បានដើរក៏ប្រទះឃើញបុរសចំណាស់ម្នាក់ បានអូសសាកសពជនរងគ្រោះដែលច្រកក្នុងបាវពណ៌.សចេញទៅក្រៅរបង និងបានរៀបចំរបស់របរដែលមានប្រឡាក់ឈាមផ្សេងៗដូចជាកន្ទេលចងរុំយកទៅបោះចោល ។ ពេលនោះ គាត់បានប្រាប់បុរសចំណាស់នោះថា «កុំធ្វើអុីចឹង រង់ចាំសមត្ថកិច្ចចុះមកត្រួតពិនិត្យសិនទៅ» ។ ទោះបីជាយ៉ាងណា សមត្ថកិច្ចកំពុងស្រាវជ្រាវនិងសាកសួរទៅលើជនសង្ស័យទាំង៤នាក់នោះហើយ ។
ព័ត៌មានលម្អឹតនឹងមានផ្សាយជូនលើទំព័រកាសែតកោះសន្តិភាព ។
ចែករំលែកព័តមាននេះ