ទិវាជាតិនៃការចងចាំ ២០ឧសភា នៅខេត្តសៀមរាប
- សៀមរាប
ខេត្តសៀមរាប ៖ ទិវាជាតិនៃការចងចាំ ២០ឧសភា ឆ្នាំ២០១៨ នាព្រឹកថ្ងៃអាទិត្យ ទី២០ ខែឧសភា ឆ្នាំ២០១៨នេះ នៅបរិវេណវត្តទេពពោធិវង្ស…
ខេត្តសៀមរាប ៖ ទិវាជាតិនៃការចងចាំ ២០ឧសភា ឆ្នាំ២០១៨ នាព្រឹកថ្ងៃអាទិត្យ ទី២០ ខែឧសភា ឆ្នាំ២០១៨នេះ នៅបរិវេណវត្តទេពពោធិវង្ស ហៅវត្តថ្មី ស្ថិតនៅភូមិត្រពាំងសេះ សង្កាត់គោកចក ក្រុង/ខេត្តសៀមរាប ជូនដល់បងប្អូនប្រជាពលរដ្ឋស្លូតត្រង់ កម្មាភិបាល យុទ្ធជន យុទ្ធនារី អ្នកស្នេហាជាតិ ដែលបានបាត់បង់ជីវិត ដោយភាពអយុត្តិធម៌ក្នុងរបបប្រល័យពូជសាសន៍ ប៉ុល ពត ដែលរៀបចំឡើង ដោយ គណបក្សប្រជាជនកម្ពុជា ខេត្តសៀមរាប ក្រោមអធិបតីភាព លោកបណ្ឌិត ឃឹម ប៊ុនសុង សមាជិកគណៈកម្មាធិការកណ្តាលនៃគណបក្សប្រជាជន និងជាប្រធានគណៈកម្មាធិការ នៃគណបក្ស ប្រជាជនកម្ពុជាខេត្ត និងជាអភិបាលនៃគណៈ អភិបាលខេត្តសៀមរាប លោក បណ្ឌិត នូ ផល្លា សមាជិកគណៈកម្មាធិការកណ្តាលនៃគណបក្សប្រជាជន និងជាអនុប្រធានគណៈកម្មាធិការ នៃគណបក្សប្រជាជនកម្ពុជាខេត្ត និងជាប្រធានក្រុមប្រឹក្សាខេត្ត ព្រមទាំងមានការនិមន្តពីព្រះសង្ឃ និង អញ្ជើញចូលរួមពីឯកឧត្តម លោកឧកញ៉ា លោកជំទាវ និងថ្នាក់ដឹកនាំមន្ទីរ ស្ថាប័ន អង្គភាព មន្ត្រីរាជការជុំវិញខេត្ត កងកម្លាំងប្រដាប់អាវុធ គរុសិស្ស សិស្សានុសិស្ស ក្រុមប្រឹក្សាសង្កាត់ ប្រជាពលរដ្ឋ និង ពុទ្ធបរិស័ទប្រមាណជាង៣ពាន់នាក់ចូលរួម។
ទិវា ២០ឧសភា គឺជាថ្ងៃដែលប្រជាជនកម្ពុជាទូទាំង ប្រទេស បានកំណត់យកជាថ្ងៃរំលឹកដល់វិញ្ញាណក្ខន្ធ បងប្អូនប្រជាជនខ្មែរ កម្មាភិបាល យុទ្ធជន យុទ្ធនារី ដែលបានបាត់បង់ជីវិត ដោយភាពអយុត្តិធម៌បំផុត ក្នុងរបបប្រល័យពូជសាសន៍ ប៉ុល ពត ដែលជាថ្ងៃធ្វើឲ្យប្រជាជនកម្ពុជាយើង មិនអាចបំភ្លេចបាន នូវប្រវត្តិជូរចត់ រស់នៅក្នុងសមុទ្រឈាម និងទឹកភ្នែក ហើយត្រូវបានចារឹកទុកនៅក្នុងក្រឳបេះដូងរបស់ប្រជាជនកម្ពុជាយើងគ្រប់ៗរូប។ ក្នុងពិធីនោះ លោកបណ្ឌិត ឃឹម ប៊ុនសុង ក៏បានអាននូវវិយោគកថា ដោយបានគូសបញ្ជាក់ថា ថ្វីដ្បិតពេលវេលានៃ អតីតកាលបានកន្លងផុត៣៩ឆ្នាំក៏ពិតមែន តែភាពឈឺចាប់ខ្លោចផ្សាររបស់ប្រជាជនកម្ពុជា នៅតែដិតដាមជាប់នៅក្នុងក្រឳបេះដូងរបស់ប្រជាជនយើងគ្រប់រូប នូវមហាវិនាសកម្ម របស់ប្រជាជនជាង៣លាននាក់ ដែលបានបាត់បង់ជីវិតយ៉ាងភាពអយុត្តិធម៌ និង អាណោចអាធ័មក្រៃលែង។ លោកបណ្ឌិតបានបន្តទៀតថា ដោយថ្ងៃទី១៨ ខែមីនា ឆ្នាំ១៩៧០ បានធ្វើឲ្យប្រទេសកម្ពុជាធ្លាក់ចូលក្នុងភ្លើងសង្គ្រាម ធ្វើប្រជាជនកម្ពុជារងគ្រោះមហន្តរាយដ៏អាណោច អាធ័ម ព្រាត់ប្រាស់ក្រុមគ្រួសារបងប្អូន និងទទួលរងទុក្ខវេទនាមិនអាចពិពណ៌នាបានឡើយ។
ដោយទ្រាំនូវភាពវេទនាលំបាកនៃនរកអវចីយនេះ ក៏មានកម្លាំងអ្នកស្នេហាជាតិបរិសុទ្ធ ដែលប្រសូត្រចេញពីគណបក្សប្រជាជនកម្ពុជា បានបង្កើតនូវ រណៈសិរ្សសាមគ្គីសង្គ្រោះជាតិកម្ពុជា ធ្វើការប្រយុទ្ធប្រឆាំង និងពួកបនប្រល័យពូជសាសន៍ ប៉ុល ពត រហូតទទួលបានជ័យជម្នះនាថ្ងៃ៧ មករា ១៩៧៩ បាននាំមកនូវសិទ្ធិសេរីភាពជូនប្រជាជន និងបន្តខិតខំស្តារកសាងប្រទេស ពីគំនរផេះផូផង់ ឲ្យប្រែក្លាយមានការអភិវឌ្ឍន៍រីកចម្រើន ព្រមទាំងការពារសុខសន្តិភាព ស្ថិរភាពនយោបាយ និង លើកកម្ពស់ជីវភាពរស់នៅរបស់ប្រជាជន រហូតដល់ពេលបច្ចុប្បន្ន។ លោកបណ្ឌិត ឃឹម ប៊ុនសុង ក៏លើកឡើងផងដែរថា រាល់ការអភិវឌ្ឍន៍ ការកសាងនូវសមិទ្ធិផលជូនជាតិមាតុភូមិ របស់គណបក្សប្រជាជនកម្ពុជា ក្រោមការដឹកនាំប្រកប ដោយគតិបណ្ឌិតដ៏ខ្ពង់ខ្ពស់របស់ សម្តេចតេជោ ហ៊ុន សែន នាយករដ្ឋមន្ត្រី បានធ្វើឲ្យមានការអភិវឌ្ឍន៍រីកចម្រើននៅតាមបណ្តាមូលដ្ឋាន ទាំងវិស័យពុទ្ធចក្រ និងអាណាចក្រ។
ម្យ៉ាងទៀតក៏សូមឧទ្ទិសដល់ថ្ងៃទិវាជាតិនៃការចងចាំ ២០ឧសភានេះ ឲ្យប្រែក្លាយទៅជាការកិច្ចអភិវឌ្ឍន៍សេដ្ឋកិច្ចជាតិ សំដៅទៅរកការកាត់បន្ថយនូវភាពក្រីក្រ របស់ប្រជាជនកម្ពុជា និងសូមបងប្អូនអញ្ជើញទៅបោះឆ្នោតជ្រើសតាំងតំណាងរាស្ត្រ នីតិកាលទី៦ នាថ្ងៃទី ២៩ កក្កដា ឆ្នាំ២០១៨ខាងមុខនេះ ឲ្យបានគ្រប់ៗគ្នា និងចូលរួមថែរក្សាការពារសន្តិភាព នៅកម្ពុជា។ បន្តមកគណៈអធិបតី សមាជិកនៃអង្គពិធីទាំងមូល បានធ្វើការបូជា ទៀន ធូប ដាក់នូវកម្រងផ្កា គោរពវិញ្ញណក្ខន្ធ ដល់ប្រជាជនកម្ពុជា អ្នកស្នេហាជាតិ ដែលបានបាត់បង់ជីវិតយ៉ាងអយុត្តិធម៌ ក្នុងរបបប្រល័យពូជសាសន៍ ព្រមទាំងបាននិមន្តព្រះសង្ឃចំនួន៦៨អង្គ ប្រារព្វធ្វើពិធីសូត្រមន្ត បង្សុកូល និងរាប់បាត្រ ដើម្បីឧទិ្ទសមហាកុសលផលបុណ្យជូនដល់ ប្រជាជន យុទ្ធជន យុទ្ធនារី កម្មាភិបាលអ្នកស្នេហាជាតិ និងបុព្វការីជន ដែលបានចែកឋានទៅ ដោយអំពើឃោរឃៅ ព្រៃផ្សៃ និងអយុត្តិធម៌ នៃរបបកម្ពុជាប្រជាធិបតេយ្យប្រល័យពូជសាសន៍ ឲ្យ បានទៅកាន់ក្នុងសុគតិភពតរៀងទៅ៕
ចែករំលែកព័តមាននេះ