ខេត្តព្រៃវែង ៖ បុរសជនជាតិវៀតណាមម្នាក់ បានស្លាប់ក្រោយពេលបញ្ជូនដល់មន្ទីរពេទ្យ និងបុរសម្នាក់ទៀតដែលរួមដំណើរជាមួយបានរងរបួសធ្ងន់ ដោយសារតែបើករថយន្តទៅបុករបងផ្ទះ អ្នកស្រុក ដែលធ្វើអំពីថ្ម បណ្តាលឲ្យខ្ទេចទាំងរបង ខ្ទេចទាំងរថយន្ត។…
ខេត្តព្រៃវែង ៖ បុរសជនជាតិវៀតណាមម្នាក់ បានស្លាប់ក្រោយពេលបញ្ជូនដល់មន្ទីរពេទ្យ និងបុរសម្នាក់ទៀតដែលរួមដំណើរជាមួយបានរងរបួសធ្ងន់ ដោយសារតែបើករថយន្តទៅបុករបងផ្ទះ អ្នកស្រុក ដែលធ្វើអំពីថ្ម បណ្តាលឲ្យខ្ទេចទាំងរបង ខ្ទេចទាំងរថយន្ត។ ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង៤ល្ងាច ថ្ងៃទី២០ ឧសភា ២០១៨នេះ លើកំណាត់ផ្លូវជាតិលេខ៣១៣ ត្រង់ចំណុចមុខផ្ទះរបស់ស្ត្រីឈ្មោះ យ៉ាន់ ដូមីនីកា អាយុ២៨ឆ្នាំ ដែលស្ថិតក្នុងភូមិសៀម ឃុំស្តៅកោង ស្រុកបាភ្នំ ខេត្តព្រៃវែង។ ជនរងគ្រោះក្នុងហេតុការណ៍នេះទី១ ឈ្មោះ សឺង ភេទប្រុស អាយុ៥១ឆ្នាំ ជនជាតិវៀតណាម មានទីលំនៅក្នុងស្រុកបាឡាត់ ប្រទេសវៀតណាម បានស្លាប់ ក្រោយពេលបញ្ជូនដល់មន្ទីរពេទ្យស្រុកបាភ្នំ។ ចំណែកទី២ ឈ្មោះ យ៉ាវ ស៊ីនួន ភេទប្រុស អាយុ៤៨ឆ្នាំ ជនជាតិខ្មែរ មានទីលំនៅក្នុងភូមិលេខ២ សង្កាត់លេខ៣ ក្រុង និងខេត្តព្រះសីហនុ រងរបួសធ្ងន់។
ប្រភពព័ត៌មានពីសមត្ថកិច្ចនគរបាលស្រុកបាភ្នំបានឲ្យដឹងថា ករណីគ្រោះថ្នាក់ ចរាចរណ៍នេះ គឺពុំមានប្រជាពលរដ្ឋណាបានឃើញផ្ទាល់ភ្នែក ពីហេតុការណ៍ដំបូងដែលបណ្តាល ឲ្យមានគ្រោះថ្នាក់នោះទេ គឺនៅសុខៗស្រាប់តែឮសំឡេងបុកគ្រាំងតែម្តង ហើយពេលអ្នកស្រុកនាំគ្នា រត់ទៅមើល ក៏ឃើញរថយន្តមួយគ្រឿងម៉ាកហ្វ៉រ៉ាន់នើ ពណ៌ទឹកប្រាក់ ពាក់ស្លាកលេខ ភ្នំពេញ 2C-9772 បុករបងថ្មបាក់រមូលចូលគ្នាទៅហើយ។ ចំណែកនៅក្នុងរថយន្តឃើញមានជនរងគ្រោះទាំង២នាក់ សន្លប់ស្តូកស្តឹង និងកៀបជាប់នៅក្នុងរថយន្ត ហើយភ្លាមៗនោះអ្នកស្រុកក៏រាយការណ៍ប្រាប់សមត្ថកិច្ច ចុះទៅដល់កន្លែងកើតហេតុ និងនាំគ្នាគាស់ទ្វារថយន្តយកជនរងគ្រោះចេញមកក្រៅ ហើយនាំយកទៅ សង្គ្រោះភ្លាមៗនៅមន្ទីរពេទ្យបង្អែកស្រុកបាភ្នំ។
ប៉ុន្តែជាអកុសលពេលទៅដល់មន្ទីរពេទ្យភ្លាម ជនរងគ្រោះឈ្មោះ សឺង ក៏ដាច់ខ្យល់ស្លាប់តែម្តង។ ចំពោះមូលហេតុនៃគ្រោះថ្នាក់ចរាចរណ៍នេះ ត្រូវបានគេសន្និដ្ឋានថា ទំនងមកពីអ្នកបើកបរងងុយដេក ហើយងោកមួយភាំងពេលកំពុងបើកបរ ទើបបណ្តាលឲ្យរថយន្តរេចង្កូតទៅបុករបងផ្ទះអ្នកស្រុកបែបនេះទៅ។ ទោះជាយ៉ាងណាក៏ដោយ គ្រោះថ្នាក់នេះមិនបានបណ្តាលឲ្យអ្នកដំណើរណាផ្សេង ព្រមទាំងអ្នកស្រុកដែលនៅក្បែរកន្លែងកើតហេតុ រងរបួសនោះទេ ក្រៅតែធ្វើឲ្យបាក់ខូចរបងផ្ទះអស់មួយផ្ទាំងធំ និងរថយន្តរងការខូចខាតទាំងស្រុង ហើយក្រោយពីកើតហេតុ សមត្ថកិច្ចបានអូសរថយន្តយកទៅរក្សាទុក នៅប៉ុស្តិ៍រដ្ឋបាលស្ដៅកោង ចំណែកសាកសពប្រគល់ឲ្យទៅបងប្អូន យកទៅប្រទេសវៀតណាមវិញ៕
ចែករំលែកព័តមាននេះ