ប្រទេសគុយបា ៖ ការធ្លាក់យន្តហោះដឹកអ្នកដំណើរ១គ្រឿងនៅគុយបា កាលពីថ្ងៃទី១៨ឧសភា បើតាមតុល្យការថ្មីប្រកាសដោយរដ្ឋមន្ត្រីដឹកជញ្ជូនប្រទេសនេះ លោក ABDEL YZQUIERD ថា អ្នកស្លាប់មានដល់១១០នាក់ ហើយមនុស្ស៣នាក់រងរបួស។
រដ្ឋមន្ត្រីរូបនេះបញ្ជាក់នៅមុខសារព័ត៌មានថា ក្នុងចំណោមអ្នកស្លាប់ទាំង១១០នាក់ មានជនជាតិគុយបា៩៩នាក់ សមាជិកក្រុមយានិកជនជាតិម៉ិចស៊ិក៦នាក់ អ្នកទេសចរបរទេស៣នាក់ គឺជនជាតិម៉ិចស៊ិកម្នាក់ និងប្ដីប្រពន្ធជនជាតិ អាហ្សង់ទីន រួចជនជាតិអាហ្វ្រិក២នាក់ ក៏ស្ថិតក្នុងចំណោមអ្នកស្លាប់ដែរ។ តុល្យការលើកមុនរបស់អាជ្ញាធរ រៀបរាប់ពីមនុស្ស៣នាក់នៅរស់រានមានជីវិត ក្នុងចំណោមអ្នកដំណើរ១១០នាក់។
កាលពីថ្ងៃទី១៩ ឧសភា គុយបាចាប់ផ្ដើមការកាន់មរណទុក្ខរយៈពេល២ថ្ងៃ។ យន្តហោះធុនប៊ូអ៊ីង737-200នោះ បានធ្លាក់លើតំបន់ពុំមានមនុស្សរស់នៅមួយ កាលពីវេលាថ្ងៃត្រង់ ថ្ងៃទី១៨ ឧសភា ខណៈវាទើបហោះចេញពីព្រលានយន្តហោះក្រុងឡាហាវ៉ាន ទៅកាន់ទីក្រុងហូលហ្គីន។
រហូតដល់ថ្ងៃទី១៩ ឧសភា គេនៅពុំទាន់ដឹងពីមូលហេតុនៃការធ្លាក់យន្តហោះនេះដែលកើតមានក្រោយហោះចេញនៅឡើយ ក៏ប៉ុន្តែរដ្ឋមន្ត្រីដឹកជញ្ជូនគុយបា ប្រកាសថា ប្រអប់ខ្មៅមួយក្នុងចំណោម ប្រអប់ខ្មៅទាំង២ត្រូវបានរកឃើញនៅល្អ។ យន្តហោះនេះជួលដោយក្រុមហ៊ុនអាកាសចរណ៍រដ្ឋគុយបា CUBANA DE AVIACION ពីក្រុមហ៊ុនម៉ិចស៊ិក MEXICAIN GLOBAL AIR។.
ក្រោយគ្រោះថ្នាក់នេះប្រធានាធិបតីគុយបា លោក MIGUEL DIAZ CANEL ប្រកាសភ្លាមៗពីការបើកការស៊ើបអង្កេតមួយ៕
ចែករំលែកព័តមាននេះ