រាជធានីភ្នំពេញ ៖ កម្មវិធីប្រឡងចម្រៀងនាពេលបច្ចុប្បន្នមានច្រើន រៀបចំដោយស្ថានីទូរទស្សន៍នានា ដោយរៀបចំក្នុងទម្រង់ ផ្សេងៗគ្នា ។ ចំណែកកម្មវិធីប្រឡងសម្រស់មិនសូវមានទេ ។ តើមកពីហេតុអ្វី ?
តាមទស្សនៈយល់ឃើញរបស់មហាជន កាលពីពេល ថ្មីៗកន្លងមកថា ការប្រឡងសម្រស់នៅតាមស្ថានីយទូរទស្សន៍ ល្បីៗមួយចំនួនមានលក្ខណៈបច្ចេកទេសមិនសុក្រឹតចេញពីផ្ទៃក្នុង ។ វេទិកាប្រឡងកញ្ញាឯក ឬសម្រស់តែងតែលេចឮថាមានខ្សែ បក្សពួក បើសិនជាបេក្ខជនណាមានអ្វីជាថ្នូរ ឬចេះថ្វាយចំចំណុចសំខាន់អាចឡើងវគ្គបន្ត សំខាន់ៗដែលអាចធ្វើឲ្យមហាជន ។
លើសពីនេះទៀតស្ទើរតែអស់សង្ឃឹមដែលពេលប្រឡងបានបញ្ចប់ហើយនោះ ការប្រជែងទីផ្សារសិល្បៈវិញហាក់នៅមានភាពកំសោយ មិនអាចឆក់បានភាពលេចធ្លោគ្រប់គ្នាបាន ។ ប្រសិនបើសាមីខ្លួនជាម្ចាស់ជ័យលាភីមិនមានវិធានការនឹករកទីបង្អែកនោះ ច្បាស់ជាលឹបបាត់ឈ្មោះពីពិភពសិល្បៈ ។ មានស្រីស្អាតប្រុសស្អាតមួយចំនួនថមថយឈ្មោះ ខ្លះបាត់មុខទាំងស្រុង ខ្លះបន្តក្រាញននៀលវាយលុកទាំងចំបែងចិត្តបំផុតលើដងវិថីសិល្បៈដែលប៉ែងជើងគ្នានេះ ។
ក្រឡេកមើលកម្មវិធីប្រឡងចម្រៀងវិញម្តងតាំងពីស្ថានីយទូរទស្សន៍ខ្លះចាប់ផ្តើមទិញកម្មវិធីប្រឡងចម្រៀងកម្រិតពិភពលោកមកឃើញថាសន្ទុះអ្នកមកដាក់ពាក្យប្រឡងច្រើនកកកុញរាប់សិបម៉ឺននាក់ពីមួយរដូវកាលទៅមួយរដូវកាល។ បើទោះខ្លះធ្លាក់ពីការប្រកួតក៏ព្យាយាមដុះខាត់សំឡេង និងសមត្ថភាពវិលចូលរួមប្រឡងម្តងហើយម្តងទៀត ។ ជាក់ស្តែងទាំងលោកនី រតនា និងឈិន ម៉ានិច្ច សុទ្ធតែធ្លាប់បរាជ័យការប្រឡងចម្រៀងមុនបានក្លាយជាម្ចាស់ពានរង្វាន់ ។ ភាពល្បីល្បាញដល់ពេលនេះគឺស៊ូទ្រាំដួលហើយងើបវិញ រហូតក្លាយជាតារាចែងចាំងនៅលើសួនសិល្បៈ ។
ប្រការទាំងនេះមកពីអ្នកដាក់ពាក្យប្រឡងឱ្យតម្លៃលើគណៈកម្មការសុក្រឹត បើភ្លាត់គឺធ្លាក់ ហើយការជាប់ស្ថិតលើទស្សនិកជនវាយតម្លៃបោះឆ្នោតរើស ពិតៗចេញពីការយល់ឃើញហើយមួយវិញទៀត ជាកម្មវិធីបរទេសលំដាប់សាកលលោក បើធ្វើមិនបានល្អនោះម្ចាស់ដើមនឹងបិទមិនឲ្យមានជាបន្តទៀត ។
អតីតកញ្ញាឯកសាប៊ូលុច្ស ឆ្នាំ២០០៧កញ្ញាឃឹម ចរិយា សមាជិកស្រីស្អាតជំនាន់នាងត្រូវបានរំសោយរកទ្រនំរៀងខ្លួន ខ្លះមានស្វាមី ខ្លះលាឈប់ពីសិល្បៈបិទទំព័រសិល្បៈទាំងស្រុង។ លើកលែងតែឃឹម ចរិយា នៅបន្តចាក់ឫសក្នុងសិល្បៈរហូតមកដល់សព្វថ្ងៃ មានការពេញនិយមមួយរយៈចុងក្រោយនេះ ។ ពីមុនសាមីខ្លួនស្ទើរតែចង់ដកថយ ម្តងៗ ។
ឃឹម ចរិយានិយាយថា ព្រោះតែការស្រឡាញ់សិល្បៈនាងបានព្យាយាមតស៊ូរាប់ឆ្នាំទម្រាំបានមកដល់ចំណុចល្អបែបនេះ បើទោះជានាងល្បីឈ្មោះមិនខ្លាំងក៏សប្បាយចិត្តដែលការងារមានច្រើន ទាំងនៅតាមកម្មវិធីនានាថតសម្តែង និងកិច្ចការនៅតាមស្ថានីយទូរទស្សន៍នានា ។ ឃឹម ចរិយាជាពិធីការិនី ជាតារាសម្តែង និងជាតារាបង្ហាញម៉ូដ ។
កញ្ញាខ្លឹម ស្រីគាMiss Grand Cambodiaកាលពីមុន ក្រោយបានពាក់មកុដមកឃើញថាបានព្យាយាមពង្រឹងសមត្ថភាពទេពកោសល្យជាបន្តបន្ទាប់រហូតក្លាយជាតារាសម្តែងមានទីផ្សារគួរឲ្យកត់សម្គាល ់។ សព្វថ្ងៃនាងបានគ្រងតួឯកប៉ុន្មានរឿងមកហើយ និងថតឈុតស្ប៉តឈុតសាច់រឿងខ្លីឲ្យស្ថានីយទូរទស្សន៍មួយ ។ ក្រៅពីនេះនាងបានក្លាយជាគ្រូបង្វឹកការប្រឡងបង្ហាញម៉ូដរកតារាម៉ូរបស់កម្មវិធីមួយដែលមានការជម្រុះជារៀងរាល់អាទិត្យ ។
តារាចម្រៀងសួស វីហ្សា ដែលទើបតែឡើងកាលីបក្លាយជាគណៈកម្មការវាយតម្លៃការប្រឡងចម្រៀងកុមាររដូវកាលទី២បានឲ្យដឹងថាទម្រាំនាងមានថ្ងៃនេះ គឺឆ្លងកាត់ការពុះពារការងារសិល្បៈជាច្រើន ស្ទើរតែមិនស្មានដល់ថា ខ្លួនមានឱកាសក្លាយជាតារាល្បី។ នាងស្រឡាញ់សិល្បៈតាំងពីក្មេង មើលគំរូតារារៀមច្បងច្រៀងគ្រប់កម្មវិធី ដូចជាលោកព្រាប សុវត្ថិ កញ្ញាឱក សុគន្ឋកញ្ញា សុទ្ឋតែជាអាយដលតាំងពីនាងមិនទាន់ល្បី។ ដូចនេះរលកក្រោយត្រូវតែព្យាយាមហ្វឹកហាត់ដុសខាត់ខ្លួនឯងឲ្យល្អ ហើយព្យាយាមជាសំខាន់បើមិនស៊ូជាមួយសិល្បៈទេមិនអាចទៅមុខរួចឡើយនឹងមិនមែនធ្វើការងារសិល្បៈ១ថ្ងៃ ឬ២ថ្ងៃជោគជ័យឡើយគឺរាប់ខែឆ្នាំឯណោះ ។
កញ្ញាម៉ង់ ចាន់កញ្ញា អតីតបេក្ខជនប្រឡងចម្រៀងខេមបូឌាអាយដល រដូលកាលទី២ក៏ធ្លាប់ឆ្លងកាត់ការប្រឡងចម្រៀងប៉ុន្មានដងដែរ តែនៅទីបំផុតនាងអាចស្តារកេរ្តិ៍ឈ្មោះលេចធ្លោមួយរយៈនេះ ។ នាងត្រូវបានទូរទស្សន៍ហង្សមាសផ្តល់វេទិកាសម្តែងចម្រៀងជាបន្តបន្ទាប់ហើយក្តាប់ឱកាសសាងស្នាដៃក្នុងសិល្បៈ ។ ម៉ង់ ចាន់កញ្ញា បានសន្យាថានឹងព្យាយាមរក្សាតំណែងលេចធ្លោនេះឲ្យល្អ ហើយគោរពថ្នាក់ដឹកនាំគោរពរៀមច្បង ស្តាប់តាមការណែនាំចំណុច ល្អៗរបស់រៀមច្បងផ្តល់ជូន ។
លោកវង្ស ថាណាន់ ចូលប្រឡងចម្រៀងនៅហង្សមាស កម្មវិធីលំដាប់ពិភពលោកដោយមិនបានលើកពានរង្វាន់ទេ ប៉ុន្តែលោកមិនដែលដកថយប្រឹងវាយលុកសិល្បៈរហូតក្លាយជាតារាលេចធ្លោត្រូវគេហៅសម្តែងជាបន្តបន្ទាប់ក្នុងកម្មវិធីប្រគំតន្ត្រីចុងសប្តាហ៍ ៕
ចែករំលែកព័តមាននេះ