ខេត្តកំពត ៖ យុវជនម្នាក់បានស្លាប់យ៉ាងអាណោចអាធ័មពេលបញ្ជូនដល់មន្ទីរពេទ្យ បន្ទាប់ពីជួបហេតុ
ការណ៍គ្រោះថ្នាក់ចរាចរណ៍ជិះម៉ូតូជ្រុលចង្កូតទៅបុកគល់ដើមគគីរនៅក្បែររបងមន្ទីរពេទ្យបង្អែកខេត្តទល់មុខអគារសម្ភព កាលពីវេលាម៉ោង៣និង២០នាទីរសៀលថ្ងៃទី១៩ ខែឧសភា ឆ្នាំ ២០១៨ នៅផ្លូវលេខ៧២០ ស្ថិតក្នុងភូមិកំពង់បាយខាងត្បូង សង្កាត់កំពង់បាយ ក្រុងកំពត ខេត្តកំពត។
សមត្ថកិច្ចនគរបាលចរាចរក្រុងកំពតបានឲ្យដឹងថា មុនពេលកើតហេតុ មានម៉ូតូមួយគ្រឿងម៉ាកនិក ពណ៌ស ពាក់ស្លាកលេខ កំពត ១I-៩២២០ បើកបរដោយឈ្មោះ ចាន់ ជុតិម៉ា ភេទប្រុស អាយុ១៩ឆ្នាំ មានទីលំនៅភូមិក្រាំង សង្កាត់ក្រាំងអពឹល ក្រុងកំពត ជិះតែម្នាក់ឯង បើកបរក្នុងទិសដៅពីត្បូងទៅជើង លុះដល់ផ្លូវកែងបានបត់ស្តាំ ក៏ជ្រុលចង្កូតទៅបុកគល់ដើមគគី បណ្តាលឲ្យដួលម៉ូតូរងការខូចខាតស្រាល ចំណែកអ្នកបើកបរម៉ូតូបោកក្បាលនឹងថ្នល់រងរបួសធ្ងន់ ហើយក៏បានស្លាប់ពេលបញ្ជូនដល់មន្ទីរពេទ្យ ។
ក្រោយពេលកើតហេតុ ម៉ូតូត្រូវបានសមត្ថកិច្ចប្រគល់ជូនក្រុមគ្រួសារជនរងគ្រោះវិញ។ ចំណែកសពត្រូវបានក្រុមគ្រួសារដឹកទៅលំនៅឋានដើម្បីរៀបចំធ្វើបុណ្យតាមប្រពៃណី៕
ចែករំលែកព័តមាននេះ