ខេត្តសៀមរាប ៖ អាពាហ៍ពិពាហ៍គួរឱ្យភ្ញាក់ផ្អើលមួយ កាលពីថ្ងៃ១៧ ឧសភា បានធ្វើឱ្យមានការញ័រកក្រើកពេញស្រុកវ៉ារិន ហើយត្រូវបានបង្ហោះក្នុងបណ្តាញសង្គមហ្វេសប៊ុក គឺមង្គលការកូនកំលោះអាយុ៨៦ឆ្នាំ និងកូនក្រមុំអាយុ៧១ឆ្នាំ ។ នេះគឺជាស្នេហ៍វ័យចំណាស់មួយ ដែលបង្ហាញពីរលកជីវិតដ៏កម្រជួបប្រទះ ។
ភ្នាក់ងារកោះសន្តិភាពបានធ្វើដំណើរទៅដល់លំនៅឋានស្វាមីភរិយានេះ ក្នុងចម្ងាយផ្លូវ៧០គីឡូម៉ែត្រពីទី រួមខេត្ត ។ កោះសន្តិភាពត្រូវបានទទួលយ៉ាងរាក់ទាក់គួរឱ្យគោរពពីសំណាក់កូនកំលោះ និងកូនក្រមុំវ័យចំណាស់ ដែលទើបបានក្លាយជាប្តី-ប្រពន្ធ ដោយពេញមុខពេញមាត់ និងមានការទទួលគាំទ្រពីកូនចៅប្រុសស្រីរបស់ពួកគាត់ទាំង២ ។ លោកតា (កូនកំលោះ) ឈ្មោះ ប៉ែន យី មានអាយុ៨៦ឆ្នាំ រស់នៅភូមិកំបោរ ឃុំស្វាយ.ស ស្រុកវ៉ារិន បានរៀបរាប់ប្រាប់កោះសន្តិភាពថា លោកតាត្រូវបានប្រពន្ធស្លាប់ចោលអស់រយៈជាង១០ឆ្នាំមកហើយ និងមានកូន៦ (ប្រុស១ ស្រី៥នាក់) ។
ពួកគេបានចាកចេញពីលោកតាអស់ហើយ និងកសាងក្រុមគ្រួសាររៀងៗខ្លួន ប៉ុន្តែសព្វថ្ងៃលោកតារស់នៅជាមួយកូនប្រុសច្បងទី៣ ឈ្មោះ យី យ៉ាន់ អាយុ៤៨ឆ្នាំ ជាអនុប្រធានភូមិកំបោរ ដែលបានព្រមព្រៀងគ្នាជាមួយកូនៗទាំងអស់ ចូលស្តីដណ្តឹងលោក យាយ ស៊ង អាយុ៧១ឆ្នាំ តាមប្រពៃណី ។ លោកយាយក៏ជាស្ត្រីមេម៉ាយមានកូនប្រុស ស្រី ចំនួន៧នាក់ ហើយកូនចៅគាត់ក៏បានឯកភាពផងដែរ ។ លោកតាបានរៀបរាប់ពីដំណើរនៃការរៀបចំគ្រួសារក្នុងវ័យចំណាស់របស់គាត់ថា កូនៗបានឱ្យអ្នកជិតខាងជួយធ្វើជាមេអណ្តើកសួរនាំខាងស្រី ក្នុងរយៈពេល៣ថ្ងៃក៏សម្រេចរៀបការតែម្តង ទើបកូនទាំងអស់របស់លោកតាបានសម្រេចនាំរូបលោកតាហែ ហម លើកជំនូនបណ្តាការ យកទៅជូនខាងកូនក្រមុំ(អាយុ៧១ឆ្នាំ) ផ្សំផ្គុំឱ្យតែម្តងទៅ ។
កូនកំលោះអាយុ៨៦ឆ្នាំ បានរៀបរាប់បន្ថែមថា មុនពេលលោកតាសម្រេចចិត្តដណ្តឹងយកលោកយាយនេះ គឺមុនដំបូង រូបលោកតាត្រូវបានប្រពន្ធស្លាប់ចោលជាច្រើនឆ្នាំមកនោះ ក៏បានសំឡឹងឃើញលោកយាយ
ជាស្ត្រីមេម៉ាយប្តីស្លាប់ចោល អាយុប្រហែលជាង៧០ឆ្នាំ ដែលរស់នៅក្នុងភូមិជាមួយគ្នា ក៏មានចិត្តលួចស្រឡាញ់តែម្នាក់ឯងជាយូរឆ្នាំ ដោយរូបលោកយាយពុំបានដឹងអ្វីទាំងអស់ ។ ទីបំផុត លោកតាក៏សម្រេចចិត្តហ៊ាននិយាយប្រាប់កូនៗឱ្យចូលដណ្តឹងយកលោកយាយតែម្តង ។ លោកតា (កូនកំលោះ)បានរៀបរាប់បន្តថា បន្ទាប់ពីការរួច រូបលោកតាបានសម្រេចចិត្តសុំកូនធ្វើខ្ទមល្មមមួយរស់នៅជាមួយលោកយាយ ដើម្បីកុំឱ្យរំខានដល់កូនៗ គឺគ្រាន់បានមើលគ្នាទៅវិញទៅមក សម្រាប់សេចក្តីស្រឡាញ់ដែលមានលើរូបលោកយាយក្នុងគ្រាចុងក្រោយ ។
ចំពោះមុខភ្នាក់ងារកោះសន្តិភាព កូនក្រមុំដែលទើបរៀបការរួចកាលពីថ្ងៃទី១៧ ឧសភា គឺលោកយាយឈ្មោះ ស៊ង អាយុ៧១ឆ្នាំ មានប្រសាសន៍ថា លោកយាយមានកូនចំនួន៧នាក់ (ប្រុស៤ ស្រី៣នាក់)ពួក
គេបានរៀបការអស់ហើយ សព្វថ្ងៃលោកយាយរស់នៅជាមួយកូនច្បងទី៤ ។ និយាយដល់ការចែចូវពីលោកតា ដើម្បីភ្ជាប់ចំណងបេះដូងលោកយាយបានរៀបរាប់ថា មុនពេលរូបលោកយាយសម្រេចចិត្តរៀបការជាមួយលោកតា គឺដោយសារកូនៗជាអ្នកឱ្យលោកយាយយក គ្រាន់បានមើលថែគ្នាក្នុងវ័យចំណាស់នេះ ប៉ុន្តែការរៀបចំនេះលោកយាយបានប្រាប់កូនៗថា ពួកយើងអត់មានលុយកាក់ទេ ឱ្យត្រឹមសែនបានហើយ តែកូនៗបានប្រាប់លោកយាយវិញថា ខាងកូនប្រុសជាអ្នកចេញមុខចាត់ចែងមង្គលការទាំងអស់ ទើបរូបគាត់សម្រេចចិត្តតាមកូនៗទៅ ។ លោកយាយបានរៀបរាប់បន្តថា ក្រោយការរួចរូប លោកយាយក៏ដេកនៅជាមួយកូនៗធម្មតា ហើយលោកតាក៏ទៅដេកនៅជាមួយខាងកូនប្រុសគាត់ដែរ ប៉ុន្តែរូបលោកយាយបានគិតថា បើកូនៗឱ្យការហើយមានតែសម្រេចចិត្តសុំកូនធ្វើផ្ទះតូចមួយ ដើម្បីរស់នៅជាមួយគ្នាជាប្រពន្ធ-ប្តី គ្រាន់បានមើលថែគ្នាទៅវិញទៅមក ។
លោកយាយថា ការរៀបមង្គលការឱ្យពួកគាត់ប្រហែលពួកកូនៗទាំងសងខាងចង់ឱ្យពួកខ្ញុំទាំង២នាក់សប្បាយចិត្តហើយ ។ ចំណែកកូនស្រីច្បងទី៤ ខាងកូនក្រមុំអ្នកស្រី កើត សាក់ អាយុ៣៧ឆ្នាំ បានរៀបរាប់ថា ពួកគាត់ជាកូនៗ ប្រុសស្រីចំនួន៧នាក់ បានសម្រេចចិត្តឱ្យគាត់រៀបការជាមួយកូនកំលោះអាយុ៨៦ឆ្នាំ នោះពិតជាសប្បាយចិត្តខ្លាំងណាស់រកអ្វីមកប្រៀបផ្ទឹមពុំបាន ដោយសារឃើញពួកគាត់ចេះស្រឡាញ់គ្នា ដូចក្មេងដែលទើបរៀបការថ្មោងថ្មីនោះដែរ ។
រីឯកូនប្រុសច្បងទី៣ ខាងកូនកំលោះលោក យី យ៉ាន់ អាយុ៤៨ឆ្នាំ ជាអនុប្រធានភូមិកំបោរ ដែលបានព្រមព្រៀងគ្នាជាមួយបងប្អូនប្រុសស្រីចំនួន៦នាក់ ព្រមទាំងកូនៗផងនោះបានសម្រេចចិត្តចូលស្តីដណ្តឹងលោកយាយ ស៊ង តាមគន្លងប្រពៃណីទំនៀមទំលាប់របស់ខ្មែរ ដើម្បីឱ្យឪពុកសប្បាយចិត្ត ព្រោះគាត់បាននិយាយប្រាប់តាំងពីម្តាយស្លាប់អស់រយៈពេលជាង១០ឆ្នាំ ទើបពួកគាត់ជំនុំគ្នារកស្ត្រីមេម៉ាយណាម្នាក់ឱ្យបានសក្តិសមនិងលោកឪពុក ។ ប៉ុន្តែដល់គាត់ប្រាប់ប៉ះចំលោកយាយស៊ង ដែលរស់នៅក្នុងភូមិផងរបងជាមួយឪពុកខ្ញុំ គាត់លួចស្រលាញ់យូរឆ្នាំមកហើយ និងហ៊ាននិយាយប្រាប់កូនៗ ទើបពួកខ្ញុំសម្រេចចិត្តនាំគ្នាចូលស្តីដណ្តឹងរូបលោកយាយធ្វើជាម្តាយទី២តទៅ ហើយរៀបចំផ្ទះល្មមមួយដើម្បីឱ្យពួកគាត់បានរស់នៅសមរម្យជាមួយគ្នា ។
កោះសន្តិភាព មិនមានការអត្ថាធិប្បាយអ្វីឱ្យលើសនេះទេ មានតែការជូនពរឱ្យរលកស្នេហ៍វ័យចំណាស់ជួបតែសុភមង្គលតទៅ និងសង្ឃឹមថា រាត្រីទឹកឃ្មុំជួបតែភាពត្រជាក់ត្រជុំ ៕
ចែករំលែកព័តមាននេះ