ខេត្តសៀមរាប ៖ កម្លាំងនគរបាលប្រឆាំងបទល្មើសសេដ្ឋកិច្ចខេត្ត បានចាប់រថយន្តយីឌុបដឹកឈើល្មើស ច្បាប់មួយគ្រឿង ព្រមទាំងឃាត់ខ្លួនបានមនុស្សពីរនាក់ ប៉ុន្តែមានទីតាំងស្តុកឈើល្មើស ច្បាប់រាប់ពាន់ម៉ែត្រគូបមួយកន្លែង នៅក្នុងក្រុងសៀមរាប បែរជាសមត្ថកិច្ចមិនហ៊ានចូលទៅបង្ក្រាប ប្រហែលខ្លាចអំណាចម្ចាស់សណ្ឋាគារផ្កាយ៥ផងមើលទៅ។ បើតាមលោកវរសេនីយ៍ឯក សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តបានប្រាប់ឱ្យដឹងថា ការបង្ក្រាបរថយន្តបទល្មើសខាងលើនោះ គឺធ្វើឡើងនាព្រលឹមថ្ងៃទី១៨ ខែឧសភា ឆ្នាំ ២០១៨ ស្ថិតនៅលើកំណាត់ផ្លូវជាតិលេខ៦ ត្រង់ចំណុចផ្សាររការកំបុត ស្រុកប្រាសាទបាគង ហើយ រថយន្តនេះដឹកឈើពីប៉ែកខាងលើ នៃស្រុកស្វាយលើ ឆ្លងកាត់ស្រុកសូទ្រនិគម ចូលមកចែកចាយ ក្នុងក្រុងសៀមរាប។
លោកបន្តថា ក្នុងករណីឃាត់បានរថយន្តខាងលើនោះ គឺបានឃាត់ខ្លួនមនុស្សចំនួន២នាក់ គឺ ទី១/ឈ្មោះ ម៉ៅ រតនា ភេទប្រុស អាយុ២៨ឆ្នាំ មុខរបរ បើកបរឡានដឹកឈើ មានស្រុកកំណើតនៅភូមិត្រគៀត ឃុំត្រពាំងត្រែង ស្រុកមេសាង ខេត្តព្រៃវែង បើកបររថយន្តម៉ាក(ហ្វីសូ) FUSO ពណ៌ខៀវចាស់ ពាក់ស្លាកលេខ(ហ ០១៥៥ ភ្នំពេញ៣) និង ទី២/ឈ្មោះ ប៊ុន ហេង ភេទប្រុស អាយុ២៩ឆ្នាំ មុខរបរព្រូឡាន មានទីលំនៅភូមិកំពង់អូរជ្រឹង ឃុំពង្រ ស្រុកកោះសូទិន ខេត្តកំពង់ចាម។ ចំណែកម្ចាស់ឡានដឹកឈើ បានបើកឡានមួយគ្រឿងផ្សេង ទៀតគេចខ្លួនបាត់ ដែលមិនអាចស្គាល់ឈ្មោះនោះឡើយ។ លោកបានបញ្ជាក់ថា ចំណែកឈើប្រភេទលេខ២ ដែលបង្ក្រាបនោះ ក្នុងការប៉ាន់ស្មានថា មានចំនួនជាង១០ម៉ែត្រគូប ហើយ វត្ថុតាងទាំងអស់នោះ គឺប្រគល់ឱ្យទៅរដ្ឋបាលព្រៃឈើជាអ្នកអនុវត្តបន្តទៅតាមនីតិវិធីច្បាប់ព្រៃឈើ។ លោកបញ្ជាក់ថា នៅតាមដងផ្លូវរាប់ពីស្រុកស្វាយលើ មកដល់ក្រុងសៀមរាប មានប៉ុស្តិ៍សមត្ថកិច្ចច្រើនណាស់ តែរថយន្តដឹកបទល្មើសនេះអាចចូលមកក្នុងក្រុងបាន ដោយមមិនមានទាក់ភ្នែកពួកសមត្ថកិច្ចទាំងនោះបន្តិចសោះ។
ជុំវិញករណីខាងលើនេះដែរ លោក ម៉ុង ប៊ុនលិម ប្រធានខណ្ឌរដ្ឋបាលព្រៃឈើខេត្តសៀមរាប បានប្រាប់តាមទូរស័ព្ទថា ឈើ និងឡាន ដែលសមត្ថកិច្ចឃាត់បានទាំងមនុស្ស២នាក់នោះ ត្រូវបានប្រគល់ឱ្យមន្ត្រីរដ្ឋបាលព្រៃឈើ យកមករក្សាទុកនៅរដ្ឋបាលព្រៃឈើឃុំព្រះដាក់ ស្រុកបន្ទាយស្រី ដើម្បីឱ្យម្ចាស់ចូលខ្លួន បង់ពិន័យជាអន្តរកាលរយៈពេល៣០ថ្ងៃ ក្នុងករណីមិនចូលខ្លួននឹងត្រូវបញ្ជូនទៅតុលាការ។ ចំណែមនុស្សពីនាក់ដែលឃាត់ខ្លួន គឺធ្វើកំណត់ហេតុ និងសាកសួររកម្ចាស់ឈើពិត ហើយឱ្យពួកគេវិលទៅផ្ទះវិញ។ គួរបញ្ជាក់ថា ជាមួយនឹងការបង្ក្រាបឡានដឹកឈើខាងលើនេះ ក៏ធ្លាយព័ត៌មានថា មានសណ្ឋាគារលំដាប់ផ្កាយ៥មួយកន្លែង ស្ថិតនៅភូមិខា្នរ សង្កាត់ជ្រាវ ក្នុងក្រុងសៀមរាប បានកំពុងសម្រុកទិញឈើល្មើសច្បាប់ពីគ្រប់ទិសទីយ៉ាងគំហុក។
ព័ត៌មានបន្ថែមថា សណ្ឋាគារមួយនេះ ក្នុងមួយថ្ងៃៗឡានដឹកឈើគ្រប់ម៉ាក ដឹកចូលទៅលក់មិនតិចជាង១០ឡានទេ។ គេបានបញ្ជាក់ថា នៅក្នុងសណ្ឋាគារផ្កាយ៥ មួយនេះមានឈើស្តុកទុកមិនតិចជាង២០០០ម៉ែត្រគូបទេ តែសមត្ថកិច្ចហាក់មិនហ៊ានទៅក្បែរសោះឡើយ ប្រហែលខ្លាចអំណាចម្ចាស់សណ្ឋាគារទេដឹង។ មន្ត្រីប៉ូលិសមួយរូបសុំមិនបញ្ចេញឈ្មោះ បានបង្ហើបប្រាប់អ្នកព័ត៌មានថា សណ្ឋាគារ៥នេះទោះមិន បញ្ជាក់ឈ្មោះ ក៏សមត្ថកិច្ចគ្រប់ស្ថាប័នស្គាលរួចទៅហើយ តែគ្មានអ្នកណាហ៊ានទៅក្បែរនោះទេ លើកលែងតែខាងក្រសួងទើបអាចចូលចុះ។ នេះសអាចបញ្ជាក់ឱ្យឃើញថា ឧក្រិដ្ឋជនព្រៃឈើគឺ អ្នកនៅក្បែរក្លៀកសោះ ដោយគ្មានសមត្ថកិច្ចហ៊ាន៕
https://youtu.be/yHatPMcUhgA
ចែករំលែកព័តមាននេះ