ខេត្តរតនគិរី ៖ ប្រជាពលរដ្ឋប្រាំគ្រួសារនៅស្រុកកូនមុំ ស្នើសុំឱ្យមន្ដ្រីសុរិយោដីខេត្ដ និងអាជ្ញាធរពាក់ព័ន្ធត្រួតពិនិត្យបណ្ណសម្គាល់កម្មសិទ្ធិដី លោកឡាយ លៀងទ្រី សង្ស័យប្រើប្រាស់ប្លង់ក្លែងក្លាយទៅរំលោភយកដីពួកគាត់ ។ អាជ្ញាធរមូលដ្ឋានថា ប្លង់ដីលោកឡាយ លៀងទ្រី មានទំហំមិនច្បាស់លាស់ដោយសារប្លង់មានភាពមិនប្រក្រតី ប៉ុន្ដែលោកឡាយ លៀងទ្រីថា នឹងប្រើប្រាស់អំណាចតុលាការ ដើម្បីចូលទៅកាន់កាប់ដីនៅតំបន់នោះ ។
ប្រជាពលរដ្ឋម្នាក់ក្នុងចំណោមប្រាំគ្រួសារនៅ ឃុំត្រពាំងក្រហម ស្រុកកូនមុំ បានរាបរាប់ថា កាលពីឆ្នាំ២០០៨គាត់រួម និងពលរដ្ឋមួយចំនួនទៀតបានទៅរស់នៅលើដីដែលមានទីតាំងដូចខាងលើ អ្នកខ្លះកាន់កាប់ដីចំនួនប្រាំពីរហិកតា អ្នកខ្លះទៀតមានបីទៅបួនហិកតា សម្រាប់ដាំស្រូវ និងដាំស្វាយចន្ទីចិញ្ចឹមជីវិត ។
ពលរដ្ឋម្នាក់នោះបានឱ្យដឹងទៀតថា ចាប់តាំងពីពួកគាត់បាននាំគ្នាទៅរស់នៅ និងបង្កបង្កើនផលនៅលើដីនោះអស់រយៈ៧ ,៨ឆ្នាំ ពុំដែលមានបញ្ហាអ្វីទេ ពោល គឺគ្នានអ្នកផ្សេងមករារាំងឡើយ ។ លុះមកដល់ដើមឆ្នាំ២០១៨ ស្រាប់តែលេចមុខបុរសម្នាក់ឈ្មោះឡាយ លៀងទ្រី នៅឯខេត្ដកំពង់ចាមបានអះអាងថា ដីដែលពលរដ្ឋប្រាំគ្រួសារកំពុងតែរស់នៅ និងអាស្រ័យផលនោះ គឺជាដីរបស់គេទៅវិញ ។ បុរសនោះបានបង្ហាញប្លង់សម្គាល់កម្មសិទ្ធិដែលមិនមែនជាច្បាប់ដើមថា ខ្លួនបានកាន់កាប់ដីនោះកាលពីអំឡុងឆ្នាំ២០០៧ ដែលមានទំហំក្បាលដី៥០០ម៉ែត្រ និងជម្រៅ៥០០ម៉ែត្រ ។
ក្រោយមកឈ្មោះឡាយ លៀងទ្រីបានប្រើគ្រប់រូបភាព ដើម្បីដេញប្រជាពលរដ្ឋទាំងប្រាំគ្រួសារនោះឱ្យចាកចេញពីដីនោះ ។ នៅថ្ងៃទី១ ខែឧសភា ឆ្នាំ២០១៨ អាជ្ញាធរឃុំត្រពាំងក្រហមបានកោះហៅប្រជាពលរដ្ឋប្រាំគ្រួសារនោះ និងភាគីម្ខាងទៀតឱ្យចូលខ្លួន ដើម្បីដោះស្រាយ ។ នៅចំពោះមុខអាជ្ញាធរលោកឡាយ លៀងទ្រី បានគំរាមពលរដ្ឋថា រឿងទំនាស់ដីនោះគេបានពិភាក្សារជាមួយតុលាការ រួចហើយ គឺត្រូវតែដកហូតយកទាំងអស់ដោយឥតសំណងឡើយ ។ នៅគ្រានោះដែរប្រជាពលរដ្ឋហាក់តក់ស្លុតយ៉ាងខ្លាំង បន្ទាប់ពី ឮបុរសនោះបានប្រើប្រាស់អំណាចតុលាការមកដកយកដីចម្ការ និងដីលំនៅដ្ឋានពីពួកគាត់ដោយឥតសំណង ។ អ្នកខ្លះបានបង្ហូរទឹកភ្នែករួចបង្ខំចិត្ដផ្ដិតមេដៃប្រគល់ដីរបស់ខ្លួនឱ្យទៅគេដោយក្ដីសោកស្ដាយនៅភោគផលដំណាំដែលខ្លួនបានដាំ និងអាស្រ័យផលជិត១០ឆ្នាំមកហើយនោះ ។
លោកឡាយ លៀងទ្រីដែលរងការចោទប្រកាន់ពីប្រជាពលប្រាំគ្រួសារដូចខាងលើ នៅថ្ងៃទី១៧ ខែឧសភានេះ អ្នកយកព័ត៌មានយើងមិនអាចសុំការបំភ្លឺបានទេ ។ លោកគីមហួរប្រធានក្រុមប្រឹក្សាឃុំត្រពាំងក្រហមបានបញ្ជាក់ប្រាប់ក្រុមអ្នកយកព័ត៌មានឱ្យដឹងតាមទូស័ព្ទកាលពីថ្ងៃទី១៧ ខែឧសភា ឆ្នាំ២០១៨នេះ ថា ពាក់ព័ន្ធរឿងដីប្រជាពលរដ្ឋប្រាំគ្រួសារនៅទីតាំងដូចខាងលើយើងសង្ស័យបង្កាន់ដីលោកឡា លៀងទ្រីនោះមានភាពមិនប្រក្រតី គឺកោសលុបមួយផ្នែកនៅត្រង់ចំណុចបណ្ដោយដីដែលមានទំហំចំនួន៥០០ម៉ែត្រ ។
ប្រធានក្រុមប្រឹក្សាឃុំបានបញ្ជាក់ថា លោកបានប្រាប់ឱ្យភាគីលោកឡាយលៀងទ្រីយកលិខិតសម្គាល់កម្មសិទ្ធិដីរបស់ខ្លួននៅតំបន់នោះមកបង្ហាញនៅសាលាឃុំ ប៉ុន្ដែថ្ងៃកោះប្រជុំគេបានយកតែច្បាប់ថតចំលងមកបង្ហាញធ្វើជាការសំអាង តែយើងមិនអាចយកជាផ្លូវការណ៍បានទេ ហើយខាងតុលាការក៏រឹតតែមិនអាចយកធ្វើជាភស្ដុតាង ដើម្បីទៅរឹបអូសយកដីរបស់ពលរដ្ឋនៅតំបន់នោះបានដែរ ។
ប្រធានភូមិបាលស្រុកកូនមុំលោថេត បានបញ្ជាក់ឱ្យដឹងតាមទូរស័ព្ទកាលពីរសៀលថ្ងៃទី១៧ ខែឧសភា ឆ្នាំ២០១៨ថា រឿងដីរបស់ឈ្មោះឡាយ លៀងទ្រី លោកមិនចាំថា មានទទឹងប៉ុន្មានម៉ែត្រ និងជម្រៅចំនួនប៉ុន្មានម៉ែត្រនោះឡើយ ប៉ុន្ដែប្លង់ចាស់ដែលបញ្ជាក់ដោយអាជ្ញាធរមូលដ្ឋានដីនោះមានទំហំ២០ហិកតា ។
ប្រធានភូមិបាលស្រុកបានបញ្ជាក់ថា កាលពីដើមឆ្នាំ២០១៨លោកបានចុះទៅវាស់វែងដីនោះកាលណោះលោកឡាយ លៀងទ្រីក៏មិនបានផ្ដល់ប្លង់ដីឱ្យ ដើម្បីយកទៅផ្ទៀងផ្ទាត់ដែរ ។ ជុំវិញបញ្ហាប្លង់ដីនោះលោកថេតថា លោកក៏ចង់ឱ្យម្ចាស់ដីបង្ហាញប្លង់ពិតប្រាកដដែរ ។
ទោះជាយ៉ាងនេះក្ដីប្រជាពលរដ្ឋចំនួនប្រាំគ្រួសារនៅស្រុកកូនមុំ ដែលបានផ្ដិតមេដៃប្រគល់ដីរួម និងដំណាំស្វាយចន្ទីជាច្រើនហិកតាឱ្យទៅលោកឡាយ លៀងទ្រីបានសំណូមពរយ៉ាងទទូចឱ្យទៅខាងមន្ទីរសុរិយោដីខេត្ដ និងអាជ្ញាធរពាក់ព័ន្ធ សូមបើកការត្រួតពិនិត្យប្លង់ដីរបស់លោកឡាយលៀងទ្រីដោយផ្ទៀងផ្ទាត់ឱ្យបានត្រឹមត្រូវកុំឱ្យចេះតែដើរយកដីពលរដ្ឋស្លូតត្រង់តទៅទៀត ៕
ចែករំលែកព័តមាននេះ