រាជធានីភ្នំពេញ ៖ តារាសម្តែងពេជ្រ អាវីហ្សា បានរៀបចំកម្មវិធីខួបកំណើតវ័យ២៩ឆ្នាំនៅភោជនីយដ្ឋានវីហ្វ្រេនបឹងត្របែក កាលពីយប់ថ្ងៃទី១៦ ឧសភា ២០១៨ ក្រោមការចូលរួមពីសិល្បករជាច្រើនដួង ។…
រាជធានីភ្នំពេញ ៖ តារាសម្តែងពេជ្រ អាវីហ្សា បានរៀបចំកម្មវិធីខួបកំណើតវ័យ២៩ឆ្នាំនៅភោជនីយដ្ឋានវីហ្វ្រេនបឹងត្របែក កាលពីយប់ថ្ងៃទី១៦ ឧសភា ២០១៨ ក្រោមការចូលរួមពីសិល្បករជាច្រើនដួង ។
ក្នុងឈុតសម្លៀកបំពាក់សិចស៊ីទាន់សម័យ ពេជ្រ អាវីហ្សា និយាយថា នាងចង់សម្តែងភាពយន្តជាបន្តទៀត តែដោយសារតែសំឡេងនិយាយមិនសូវច្បាស់ទើបខ្លាចខុសពាក្យបានជាមិនហ៊ានទទួលថត ។ នាងទទួថតតែស្ប៉ត ថតសំអាងការ និងសម្តែងតាមកញ្ចក់ទូរទស្សន៍នានាប៉ុណ្ណោះ ព្រោះមិនមានបញ្ហាពីការនិយាយសំឡេងផ្ទាល់ ។
កញ្ញាពេជ្រ អាវីហ្សា ដែលធ្លាប់ជាប់ឈ្មោះជាតារាសិចស៊ីនៅក្នុងសង្គមសិល្ប:នោះ បានប្រកាសទម្លាក់ចោលតំណែងមួយនេះ បើទោះជានាងតុបតែងខ្លួនបែបស្រគត់ស្រគំ ទទួលបានប្រជាប្រិយភាពតិចជាងសិចស៊ីក្តី ។ នាងថា«ខ្ញុំដល់ដំណាក់កាលត្រូវកាត់បន្ថយ ឬបញ្ចប់ភាពសិចស៊ីជាផ្លូវការហើយ ដោយសុខចិត្តទុកតំណែងមួយនេះឲ្យតារាស្រករក្រោយជាអ្នកក្ដោបក្ដាប់ជំនួសចុះ»។
ចាប់តាំងពីប្រឡូកការងារសិល្បៈច្រើនឆ្នាំកន្លងមកនេះ សម្រាប់ការងារសិល្បៈ និងភាពល្បីល្បាញកញ្ញាពេជ្រ អាវីហ្សា និយាយថានាងស្កប់ស្កល់ហើយ ។ ចំពោះបំណងធំ២ដែលនាងមិនទាន់បានសម្រេច គឺឱកាសទិញផ្ទះធំទ្រនំខ្ពស់ដើម្បីឱ្យឪពុកម្ដាយបានរស់នៅស្រុកស្រួល និងជីវិតគូស្រករដើម្បីឱ្យឪពុកម្ដាយរបស់នាងអស់ការបារម្ភ ។
ពេជ្រ អាវីហ្សា និយាយថា«បើទោះជានាងខ្ញុំមិនទាន់ចង់បានស្វាមីក្តី ប៉ុន្តែនាងខ្ញុំនៅប្រាថ្នាជីវិតមួយនេះនាពេលណាមួយ ដើម្បីភាពកក់ក្ដៅក្នុងជីវិត ។ ដរាបណានាងខ្ញុំមិនទាន់មានលទ្ធភាពទិញផ្ទះធំទ្រនំខ្ពស់ឱ្យម្ដាយឪពុកនាងខ្ញុំបានរស់នៅទេនោះ គឺនាងខ្ញុំមិនទាន់អាចចូលរោងការជាមួយបុរសណាម្នាក់បានទេ ។ នាងខ្ញុំប៉ងប្រាថ្នាបំណងធំ២ គឺសុំឱ្យនាងខ្ញុំមានលុយទិញផ្ទះធំសម្រាប់គ្រួសារ និងសុំឱ្យបានជួបស្វាមីដែលមានគុណធម៌ ហើយអាចឱ្យនាងខ្ញុំផ្ញើជីវិតដោយកកក់ក្ដៅ »៕
ចែករំលែកព័តមាននេះ