ខេត្តកណ្ដាល ៖ ដើម្បីដោះស្រាយរាល់សំណូមពរ និងទុក្ខលំបាកពីការលិចលង់នៃទឹកជំនន់ទឹកភ្លៀង ដែលតែងតែកើតឡើងជារៀងរាល់ឆ្នាំ ជាពិសេសនៅក្នុងរដូវវស្សា ឆ្នាំ២០១៧ កន្លងមកនេះ ។ អាជ្ញាធរស្រុកអង្គស្នួលបាន…
ខេត្តកណ្ដាល ៖ ដើម្បីដោះស្រាយរាល់សំណូមពរ និងទុក្ខលំបាកពីការលិចលង់នៃទឹកជំនន់ទឹកភ្លៀង ដែលតែងតែកើតឡើងជារៀងរាល់ឆ្នាំ ជាពិសេសនៅក្នុងរដូវវស្សា ឆ្នាំ២០១៧ កន្លងមកនេះ ។ អាជ្ញាធរស្រុកអង្គស្នួលបាន សហការណ៍ជាមួយក្រុមគណៈពង្រឹងចុះជួយឃុំឆក់ឈើនាង និងសប្បុរសជនបានធ្វើពិធី
បើកការដ្ឋានដាក់លូរំដោះទឹកជំនន់ទឹកភ្លៀងនារដូវវស្សានេះ។ ពិធីបើកការដ្ឋាននេះបានប្រព្រឹត្តទៅកាលពីវេលាម៉ោង៨ព្រឹកថ្ងៃទី១៨ ខែឧសភា ឆ្នាំ២០១៨ នៅក្នុងភូមិឈូកធំ ឃុំឆក់ឈើនាង ស្រុកអង្គស្នួល ខេត្តកណ្ដាល។
ក្រោមអធិបតីភាពលោកនាយឧត្តសេនីយ៍ ស៊ូ គឹមស៊ុន ប្រធានគណៈពង្រឹងឃុំឆក់ឈើនាងនិងជាអនុប្រធានគណៈពង្រឹងស្រុកអង្គស្នួល លោក នីម នីរ៉ាដេត អភិបាលស្រុកអង្គស្នួល លោកតាក់ ជីឡៅ អនុប្រធានគណៈពង្រឹងឃុំឆក់ឈើនាង ព្រមទាំងមានការអញ្ជើញចូលរួមពីសំណាក់អាជ្ញាធរឃុំឆក់ឈើនាង និងប្រជាពលរដ្ឋផងដែរ ។ លោកតាក់ ជីឡៅ អនុប្រធានក្រុមគណៈពង្រឹងឃុំឆក់ឈើនាងបានថ្លែងប្រាប់ថា លូដែលត្រូវដាក់រំដោះទឹកនាពេលនេះ មានទំហំមុខកាត់ ១,៥ម៉ែត្រ(១ម៉ែត្រកន្លះ)និងត្រូវដាក់កាត់ទទឹងផ្លូវរថភ្លើងថ្មីឬផ្លូវបង្គោលភ្លើងប្រវែង១៥ម៉ែត្រប៉ុន្តែត្រូវដាក់៣ជួរដូច្នេះសរុបប្រវែង៤៥ម៉ែត្រ។
ផ្លូវនេះកសាងឡើងក្នុងរបបប្រល័យពូជសាសន៍ប៉ុលពត ហើយត្រង់ចំណុចនេះក៏មានលូដែរប៉ុន្តែលូចាស់ហើយតូចនិងមានតែមួយមិនអាចឲ្យទឹកហូរទាន់ដូច្នេះទើបដាក់លូថ្មី។ដែល ត្រូវចំណាយអស់ថវិការចំនួន១៧,៥០០ដុល្លារ ក្នុងនោះថវិការផ្ទាល់របស់លោកផ្ទាល់ចំនួន៥,០០០ដុល្លារ,លោកនីម នីរ៉ាដេត អភិបាលស្រុកអង្គស្នួលចំនួន៣,០០០ដុល្លារ ,លោកនាយឧត្តមសេនីយ៍ ស៊ូ គឹមស៊ុន ប្រធានក្រុមការងារចុះជួយឃុំឆក់ឈើនាង ចំនួន៦,៥០០ដុល្លារ, ព្រមទាំងអនុប្រធានគណៈពង្រឹងចំនួន៣នាក់ទៀតរួមមាន ,លោក យ៉ែម យ៉ុន ចំនួន១,០០០ដុល្លារ ,លោក ឃឿន សម្បត្តិ ចំនួន១,០០០ដុល្លារ, លោក ជា សារ៉េត ចំនួន១,០០០ដុល្លារ។
នៅក្នុងឱកាលនោះលោកអភិបាលស្រុកអង្គស្នួលបានលើកឡើងពីការលិចលង់ពីទឹកជំនន់ទឹកភ្លៀងគឺបានកើតឡើងដោយសារការអភិវឌ្ឍន៍ ដែលមានការចាក់ដីលុបវាលទំនាបជាមួយឆ្នាំទៅមួយឆ្នាំនិងមានការរីកចម្រើនឥតឈប់ឈរ។ជាងនេះទៀតប្រសិនបើមិនឲ្យមានការចាក់ដីលុបដើម្បីសាងសង់សំណង់ផ្សេងៗក៏មិនកើតដែរ ប៉ុន្តែយើងត្រូវតែរកវិធីរំដោះទឹកចេញ។ម្យ៉ាងទៀតមិនអាចបិទរណ្ដៅដី មិនឲ្យមានការជីកនិងដឹកដីបានទេ ព្រោះជាតំបន់កំពុងមានការអភិវឌ្ឍន៍ប៉ុន្តែត្រូវឲ្យការជីករណ្ដៅដី និងដឹកដីឲ្យបានត្រឹមត្រូវតាមបទដ្ឋានបច្ចេកទេសនិងការណែនាំរបស់ច្បាប់និងមន្ត្រីជំនាញ។ លោកអភិបាលស្រុកបានបញ្ជាក់បន្ថែមថា បន្ទាប់ពីមើលឃើញពីទុក្ខលំវាករបស់បងប្អូនប្រជាពលរដ្ឋរួមផ្សំនិងសំណូមពរ របស់ពួកគាត់ផងនោះទើបដាក់លូនៅត្រង់ចំណុចខាងលើនេះ ហើយវាមិនត្រឹមតែរំដោះទឹកចេញពីក្នុងឃុំឆក់ឈើនាង ស្រុកអង្គស្នួល ខេត្តកណ្ដាលនេះប៉ុណ្ណោះទេ ។ គឺរំដោះទាំងទឹកចេញពីភូមិមួយចំនួនរបស់សង្កាត់កំបូល ខណ្ឌពោធិ៍សែនជ័យ រាជធានីភ្នំពេញផងដែរ។
លោកបានស្នើសុំឲ្យបងប្អូនប្រជាពលរដ្ឋយោគយល់រាល់ផលប៉ះពាល់ក្នុងការអភិវឌ្ឍន៍មូលដ្ឋាន ហើយសុំអញ្ជើញទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ខាងមុខនេះកុំបីខានហើយកុំជឿតាមពាក្យញោះញង់ពីជនខិលខូចដែលអំពាវនាវមិនឲ្យទៅបោះឆ្នោតនោះឲ្យសោះ។ព្រោះប្រទេសយើងមានលទ្ធិប្រជាធិបតេយ្យពេញលេញមានបក្សច្រើនណាស់ដែលចូលរួមចុះឈ្មោះដើម្បីឲ្យបងប្អូនបោះឆ្នោតជូន។ លោកនាយឧត្តមសេនីយ៍ ស៊ូ គឹមស៊ុន ប្រធានក្រុមគណៈ ពង្រឹងឃុំឆក់ឈើនាង បានសំណូមពរសុំឲ្យបងប្អូនប្រជាពលរដ្ឋរួបរួមសាមគ្គីគ្នាឲ្យកាន់តែរឹងមាំ ដើម្បីរួមចំណែកជាមួយរាជរដ្ឋាភិបាលសព្វថ្ងៃ ក្នុងកាកសាងប្រទេសជាតិឲ្យកាន់តែរីកចម្រើន។
ជាពិសេសសូមថែរក្សាសុខភាពឲ្យបានល្អដើម្បីការពារជម្ងឺដង្កាត់ផ្សេងៗ រង់ចាំមើលការរីកចម្រើនរបស់ប្រទេសជាតិ បន្តទៀត ក្រោមការដឹកនាំរបស់គណបក្សប្រជាជនកម្ពុជា ហើយគណបក្សប្រជាជនកម្ពុជា មិនដែលសន្យាខ្យល់ដូចអ្នកផ្សេងទេ តែសន្យាគឺធ្វើហើយ។មិនតែប៉ុណ្ណោះកុំជឿតាមការញោះញង់របស់ជនមួយចំនួនដែលកំពុងអំពាវនាវមិនឲ្យទៅបោះឆ្នោតនោះឲ្យសោះ ព្រោះការបំផុសបែបនេះវាគ្រោះថ្នាក់ខ្លាំងណាស់ដល់ប្រទេសជាតិ ដូច្នេះត្រូវទៅបោះឆ្នោតទាំងអស់គ្នាកុំបីខាន ៕
ចែករំលែកព័តមាននេះ