កោះកុង ៖ មនុស្សចំនួន៥នាក់ និងសត្វឆ្កែឆ្កែ៣ក្បាលត្រូវរន្ទះបាញ់ស្លាប់ និងក្មេងស្រីម្នាក់រងរបួសធ្ងន់ កាលពីវេលាម៉ោង៣រសៀលថ្ងៃទី១៧ ខែឧសភា ឆ្នាំ២០១៨ ខណៈពេលជនរងគ្រោះបាននាំគ្នាទៅជួយលើកផ្ទះអ្នកភូមិដែលកំពុងសាងសង់ថ្មី នៅចំណុចអូរទាពង ស្ថិតក្នុងភូមិប្រឡាយ ឃុំប្រឡាយ ស្រុកថ្មបាំង ខេត្តកោះកុង ។
សមត្ថកិច្ចស្រុកថ្មបាំងបានឲ្យដឹងថា កាលពីវេលាម៉ោងខាងលើ ផ្ទៃមេឃចាប់ផ្តើមមានភ្លៀងផ្គរ និងរន្ទះយ៉ាងខ្លាំង ហើយបានកើតបាតុភូតរន្ទះបាញ់ចំហ្វូងមនុស្សដែលកំពុងអង្គុយផ្តុំគ្នាក្រោមផ្ទះ បណ្តាលឲ្យស្លាប់អស់ចំនួន៥នាក់ និងរងរបួសធ្ងន់ក្មេងស្រីម្នាក់យ៉ាងធ្ងន់ធ្ងរក្នុងនោះរួមមានទី១ -ឈ្មោះ សៀម សាវឿន ទី២- ឈ្មោះ សៀម សឿន ទី៣-ឈ្មោះ ទិល សារុណ ភេទប្រុស អាយុ៣៧ឆ្នាំ ទី៤-ឈ្មោះ ផាន់ វ៉ាធី ភេទប្រុស អាយុ៤ឆ្នាំ ទី៥-ឈ្មោះ ភិន ភឿន ភេទប្រុស អាយុ២៦ឆ្នាំ មានទីលំនៅភូមិប្រឡាយ ឃុំប្រឡាយ ស្រុកថ្មបាំង ។ ចំណែកក្មេងស្រីរងរបួសម្នាក់ឈ្មោះ ធឿន ចាន់ថា ភេទស្រី អាយុ១៤ឆ្នាំ មានទីលំនៅភូមិច្រកឫស្សី ឃុំជំនាប់ ស្រុកថ្មបាំង ខេត្តកោះកុងកំពុងត្រូវបានដឹកយកមកសង្គ្រោះនៅមន្ទីរពេទ្យខេត្ត ។ ព្រមជាមួយគ្នានោះ សត្វឆ្កែចំនួន៣ក្បាលក៏ត្រូវងាប់ដោយសារគ្រាប់រន្ទះនេះផងដែរ ។
ពាក់ព័ន្ធនឹងករណីគ្រោះធម្មជាតិនេះនៅព្រឹកថ្ងៃទី១៨ ខែឧសភា ឆ្នាំ២០១៨ នេះផងដែរ អាជ្ញាធេខេត្តរួមនឹងសាខាកាកបាទក្រហមខេត្តបាននាំយកអំណោយមួយចំនួន ដើម្បីចុះទៅសាកសួរសុខទុកដល់ក្រុមគ្រួសារនៃសព និងអ្នករងរបួសដល់កន្លែងកើតហេតុនឹងបានអំពាវនាវសូមបងប្អូនប្រជាពលរដ្ឋមានការប្រុងប្រយ័ត្នឲ្យបានខ្ពស់ ជៀសវាងគ្រោះថ្នាក់ជាយថាហេតុនៅពេលក្រោយៗទៀត ៕
ចែករំលែកព័តមាននេះ