ខេត្តព្រៃវែង ៖ ហេតុការណ៍គ្រោះថ្នាក់ចរាចរណ៍ដ៏គួរឱ្យរន្ធត់មួយ បានបង្កឱ្យមានការភ្ញាក់ផ្អើលដល់ប្រជាពលរដ្ឋ និងអ្នកដំណើរនាំគ្នាចោមរោមមើលយ៉ាងកកកុញនៅលើកំណាត់ផ្លូវជាតិលេខ៨អា ត្រង់ចំណុចខាងកើតស្ពានក្រចាបចម្ងាយ២០០ម៉ែត្រ ស្ថិតក្នុងភូមិក្រចាបទី៣ ឃុំព្រៃខ្លា ស្រុកស្វាយអន្ទរ ខេត្តព្រៃវែង កាលពីវេលាម៉ោង៤និង៣០នាទីរសៀលថ្ងៃទី១៦ ឧសភា ដោយម្នាក់ៗសម្លឹងទៅរថយន្ត១គ្រឿងម៉ាកសាំយ៉ុង ដែលធ្លាក់ទឹកឃើញតែដំបូលក្នុងអារម្មណ៍សង្ស័យថា មានមនុស្សជិះក្នុងរថយន្តនោះច្រើនអាចនឹងឈ្លក់ទឹកស្លាប់ ក្នុងរថយន្តដែលធ្លាក់ទឹកនោះ ។ ហេតុការណ៍នេះ បានបណ្តាលឱ្យបុរសម្នាក់ឈ្មោះ ស្រេង សុខ អាយុ២៩ឆ្នាំ មានទីលំនៅក្នុងភូមិពានរោង ឃុំព្រៃខ្លា ស្រុកស្វាយអន្ទរ ស្លាប់បាត់បង់ជីវិតភ្លាមៗ ដោយសារជិះម៉ូតូទៅបុកនឹងរថយន្ត ហើយត្រូវរថយន្តកិនអូសជាង៥ម៉ែត្រមុនពេលរថយន្តជ្រុលចង្កូតធ្លាក់ចូលក្នុងទឹក ។
ទាក់ទិននឹងហេតុការណ៍គ្រោះថ្នាក់ខាងលើនេះ ត្រូវបានសមត្ថកិច្ចប្រាប់ឱ្យដឹងថា មុនពេលកើតហេតុ គេឃើញជនរងគ្រោះជិះម៉ូតូមួយគ្រឿងម៉ាកហុងដា សេ១២៥ ស៊េរីឆ្នាំ២០១៤ពណ៌ខ្មៅ ពាក់ស្លាកលេខព្រៃវែង ១I-០១៤១ ធ្វើដំណើរម្នាក់ឯង ក្នុងទិសដៅពីលិចទៅកើត លុះមកដល់ចំណុចកើតហេតុ ម៉ូតូបានរេចង្កូតទៅបុកនឹងរថយន្តសាំយ៉ុងមួយគ្រឿង ពណ៌បៃតងចាស់ ដែលបើកមកបញ្ច្រាសទិសគ្នា ចំពីមុខពេញទំហឹងបណ្តាលឱ្យជនរងគ្រោះជាអ្នកបើកម៉ូតូ ស្លាប់ភ្លាមៗនៅនឹងកន្លែង ចំណែករថយន្តសាំយ៉ុងដោយសារខំប្រឹងបួងចង្កូតគេច ក៏ជ្រុលចង្កូតធ្លាក់ចេញពីផ្លូវចូលទៅក្នុងប្រឡាយទឹកលិចរថយន្តបាត់មើលឃើញតែដំបូល ។
ដោយសារតែមានមន្ទិលថា មានមនុស្សស្លាប់ច្រើននាក់នៅក្នុងរថយន្តទើបនៅវេលាល្ងាចថ្ងៃដដែល សមត្ថកិច្ចបានទាក់ទងហៅរថយន្តមកស្ទូចរថយន្តសាំយ៉ុង ដែលលិចទឹកប្រឡាយក្បែរផ្លូវនោះទាញមកលើគោក ។ ជាលទ្ធផលការសង្ស័យនានាគឺខុសស្រឡះ មិនមានសាកសពមនុស្សណាម្នាក់នៅក្នុងរថយន្តទេ រួមទាំងអ្នកបើកបរផងដែរ គឺមានន័យថា អ្នកបើកបរបានលូនចេញពីក្នុងរថយន្តគេចខ្លួនបាត់ទៅហើយ ។
សមត្ថកិច្ចបានបញ្ជាក់ថា គ្រោះថ្នាក់ចរាចរណ៍នេះចាត់ទុកថា ជាសំណាងមួយហើយ ដែលរថយន្តសាំយ៉ុងនោះគ្មានអ្នកដំណើរជិះ គឺមានតែអ្នកបើកបរម្នាក់ឯងតែប៉ុណ្ណោះ បើសិនជាមានអ្នកដំណើរច្រើនជិះក្នុងរថយន្តនោះវិញ ច្បាស់ជាមានអ្នកស្លាប់និងរបួសជាក់ជាមិនខាន ព្រោះរថយន្តធ្លាក់ពីផ្លូវចូលប្រឡាយលិចបាត់ឃើញតែដំបូល ។ ក្រោយពេលកើតហេតុប្រមាណជា១៥នាទី សមត្ថកិច្ចបានទៅដល់កន្លែងកើតហេតុជួយសម្រួលចរាចរណ៍កុំឱ្យកកស្ទះ និងបានទាក់ទងហៅសាច់ញាតិជនរងគ្រោះ ទៅទទួលយកសពត្រឡប់ទៅផ្ទះធ្វើបុណ្យតាមប្រពៃណី និងបានស្ទូចយករថយន្តពីក្នុងប្រឡាយយកទៅរក្សាទុកនៅអធិការដ្ឋានរង់ចាំការដោះស្រាយនៅពេលក្រោយ ៕
ចែករំលែកព័តមាននេះ