រាជធានីភ្នំពេញ ៖ ស្ត្រីម្នាក់ដែលមានវិបត្តិគ្រួសារ បានជិះម៉ូតូឌុបមកប៉ងលោតទឹកសម្លាប់ខ្លួននៅលើស្ពានជ្រោយចង្វា តែត្រូវបានសមត្ថកិច្ចឃាត់ទាន់ពេលវេលា កាលពីវេលាម៉ោង៣ទៀបភ្លឺថ្ងៃទី១៧ ឧសភា តាមបណ្តោយស្ពានជ្រោយចង្វារថ្មី ស្ថិតក្នុងសង្កាត់ស្រះចក ខណ្ឌដូនពេញ ។
សាក្សីដែលបានស្គាល់និងដឹងពីរឿងរ៉ាវខ្លះៗឱ្យដឹងថា ស្ត្រីដែលប៉ងលោតទឹកសម្លាប់ខ្លួននេះឈ្មោះ បូរី អូណារី អាយុ៣៣ឆ្នាំ មានមុខរបរបំរើការនៅក្នុងហាងមួយកន្លែង ស្នាក់នៅម្តុំបឹងកក់ ខណ្ឌទួលគោក ។ តាមសាក្សីដដែលបន្តថា ស្ត្រីរូបនេះ ជាអ្នករ៉ាប់រងចិញ្ចឹមគ្រួសារទាំងមូល តែនាងមានការអាក់អន់ចិត្តខណៈពេលដែលគាត់ខ្ចីទូរស័ព្ទរបស់ប្អូនប្រុសជីដូនមួយយកទៅតេ ក៏ត្រូវប្អូនប្រុសរូបនោះស្តីបន្ទោសស្រែកគំហក ធ្វើឱ្យគាត់ខឹង បានសម្រេចចិត្តជិះម៉ូតូឌុបមកដល់លើស្ពានជ្រោយចង្វារ បានចុះពីលើម៉ូតូឌុបទៅឈរតោងបង្កាន់ដៃស្ពាន យំខ្សឹកខ្សួលបម្រុងនឹងលោតទឹកសម្លាប់ខ្លួន ។ អ្នកធ្វើដំណើរលើស្ពានប្រទះឃើញបានចុះទៅរាយការណ៍ប្រាប់សមត្ថកិច្ចប្រចាំការនៅគល់ស្ពាន មកជួយឃាត់សួរនាំទាន់ពេលវេលា ។
សាក្សីរូបនេះ មិនច្បាស់ទេថា តើគ្រាន់តែអន់ចិត្តបែបនេះមកលោតទឹកវាដូចជាប្រមាថដល់ជីវិតខ្លួនឯងពេកហើយ ព្រោះជីវិតមនុស្សម្នាក់ៗមានតម្លៃណាស់ តែគាត់មិនបានប្រាប់ពីបញ្ហាអ្វីផ្សេងទៀតឬបែបណានោះទេ ។ខណៈពេលសមត្ថកិច្ចបានមកដល់ឃើញស្ត្រីដែលប៉ុនប៉ងលោតទឹកសម្លាប់ខ្លួននោះក៏បាន និយាយលួងលោមយ៉ាងត្រជាក់ឱ្យត្រឡប់ទៅផ្ទះវិញអស់រយៈពេលជិតកន្លះម៉ោង ទើបស្ត្រីរូបនោះព្រមតាមសមត្ថកិច្ចឡើងជិះម៉ូតូកង់បីត្រឡប់ទៅផ្ទះវិញបាត់ទៅ ៕
ចែករំលែកព័តមាននេះ