ខេត្តរតនគិរី ៖ ដោយសារតែដំឡូងមីមានទីផ្សារល្អ ហើយតម្លៃក៏កើនឡើងនោះ ចូលដល់រដូវវស្សានេះ ប្រជាកសិករក្នុងខេត្តរតនគិរី បានចាប់ផ្តើមដាំដំឡូងមីឡើងវិញ ថែមទាំងពង្រីកផ្ទៃដីដាំដុះច្រើនជាងឆ្នាំមុនផងដែរ ។
បើតាមលោក កៅ គង់ រស់នៅស្រុកបរកែវ បានរៀបរាប់ថា លោកទើបនឹងប្រមូលផលកាលពីដើមឆ្នាំនេះ តែដោយសារតម្លៃដំឡូងមីកើនឡើង លោកក៏រូតរះចាប់ផ្ដើមដាំវិញ ព្រោះថាទីផ្សារដំឡូងមីហាក់កំពុងមានតម្រូវការខ្ពស់ ។
លោកបន្ដថា ៖« ចូលដល់ឆ្នាំ២០១៨នេះ យើងឃើញថា តម្លៃដំឡូងមីលើទីផ្សារមានភាពល្អប្រសើរជាងឆ្នាំមុនៗ ។ ចំណែកទិន្នផល ក៏ទទួលបានខ្ពស់ផងដែរ ដោយសារតែអាកាសធាតុអំណោយផល ។ ដូច្នេះ ក្រោយប្រមូលផលរួច ខ្ញុំក៏រូតរះដាំឡើងវិញ ដោយទិញដើមដំឡូងមីមកពីស្រុកអូរជុំ » ។
ចំណែកលោក លន់ វុន រស់នៅភូមិអូរមៀត សង្កាត់ឡាបានសៀក ក្រុងបានលុង បានឲ្យដឹងដែរថា កាលពីឆ្នាំ២០១៧ លោកបានដាំដំឡូងមីលើផ្ទៃដីចំនួន៣ហិកតា និងទទួលបានទិន្នផលខ្ពស់ ស្របពេលតម្លៃក៏កើនឡើង ធ្វើឲ្យលោកមានទឹកចិត្តបន្ដិច ។
លោកបន្ដថា ៖« ផ្ទៃដីចំនួន៣ហិកតាដែលខ្ញុំដាំនេះ កាលពីឆ្នាំ២០១៧ គឺទទួលបានទិន្នផលជិត១០០តោន ដោយក្នុង១តោន លក់ឲ្យឈ្មួញកណ្ដាលបានតម្លៃ៥៨ម៉ឺនរៀលសម្រាប់ដំឡូងមីស្ងួត គឺខ្ពស់ជាងឆ្នាំមុន ដែលមានតម្លៃត្រឹមតែ៤៧ម៉ឺនរៀលប៉ុណ្ណោះក្នុង១តោន ។ ដោយឃើញទីផ្សារល្អបែបនេះ ខ្ញុំក៏ចាប់ផ្ដើមដាំដុះឡើងវិញ ដោយរំពឹងថា តម្លៃនឹងនៅតែល្អប្រសើរ » ។
ដោយសារតែដំឡូងមីមានទីផ្សារល្អ និងតម្លៃខ្ពស់បែបនេះ ក៏បានផ្ដល់អំណោយផលដល់អ្នកប្រកបរបរនាំចូលដើមដំឡូងមកលក់ដល់កសិករផងដែរ ។
បើតាមអ្នកស្រី សាមាន ស្រីអុីម រស់នៅភូមិអូរជុំ ឃុំអូរជុំ ស្រុកអូរជុំ ជាអ្នកប្រកបរបរលក់ដើមដំឡូងមី បានឲ្យដឹងថា ដើមដំឡូងមីដែលលក់សព្វថ្ងៃនេះ គឺនាំចូលពីប្រទេសវៀតណាម តាមច្រកព្រំដែនដូងប្រាំពីរដើម ក្នុងខេត្តត្បូងឃ្មុំ ។
អ្នកស្រីថា ៖« ឆ្នាំនេះ ឃើញមានបងប្អូនមករកទិញដើមដំឡូងមីច្រើន ខុសពីឆ្នាំមុនៗ ដោយសារតែតម្លៃដំឡូងមីកើនឡើងខ្ពស់ អាចផ្ដល់លទ្ធភាពចំណេញខ្លះដល់ពួកគាត់ ។ អីចឹងហើយ ការលក់ដើមដំឡូងមី ក៏មានទីផ្សារល្អដែរ » ។
អ្នកស្រីបន្ដថា ៖« ក្នុងចន្លោះខែមេសា និងឧសភានេះ ខ្ញុំលក់បានជាង១ម៉ឺនបាច់ ដោយក្នុង១បាច់មានចាប់ពី១៨ទៅ២០ដើម ក្នុងតម្លៃ៤ពាន់រៀល ។ បើធៀបនឹងពេញមួយឆ្នាំ២០១៧ ខ្ញុំលក់មិនដល់១ម៉ឺនបាច់ផង ហើយតម្លៃថោកជាងនេះបន្ដិច ថែមទាំងពិបាកលក់ទៀត » ។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត លោក សយ សូណា បានឲ្យដឹងថា ដើមឆ្នាំ២០១៨នេះ ប្រជាកសិករទទួលបានទិន្នផលខ្ពស់ ដោយសារអាកាសធាតុអំណោយផលល្អសម្រាប់ដំណាំគ្រប់ប្រភេទ ។ ចំណែកតម្លៃកសិផលនានាក៏ល្អប្រសើរដែរ ពិសេសស្រូវ និងដំឡូងមី ។
លោកបានបន្ដថា ៖« តាមរបាយការណ៍បឋម ប្រជាកសិករទូទាំងខេត្ត អាចនឹងប្រមូលផលដំឡូងមីស្រស់បានចំនួនជាង២៤០ពាន់តោន។ រីឯតម្លៃវិញ ឆ្នាំនេះល្អសម្រាប់បងប្អូនប្រជាកសិករ គឺដំឡូងមីស្រស់នៅឆ្នាំនេះមានតម្លៃរហូតដល់៣០០រៀលក្នុង១គីឡូក្រាម » ។
លោកប្រធានមន្ទីរបន្ដថា ផ្ទៃដីដាំដុះដំឡូងមីក្នុងខេត្តរតនគិរី ឆ្នាំនេះ មានចំនួនជាង១៧ម៉ឺនហិកតា កើនឡើងជាងឆ្នាំមុន ដែលមានផ្ទៃដីចំនួនតែ១៥ម៉ឺនហិកតាប៉ុណ្ណោះ ក្នុងនោះស្រុកបរកែវ និងស្រុកអូរយ៉ាដាវ មានការដាំដុះច្រើនជាងគេ ៕
ចែករំលែកព័តមាននេះ