រាជធានីភ្នំពេញ ៖ មន្ត្រីធនាគារជាតិនៃកម្ពុជាបានឲ្យដឹងថា គិតមកដល់បច្ចុប្បន្ននេះ មានម៉ាស៊ីនATM ជាង១,៥ពាន់គ្រឿងបាននិងកំពុងដាក់ឱ្យអតិថិជនប្រើប្រាស់នៅតាមទីសាធារណៈ និងនៅតាមគ្រឹះស្ថានធនាគារ និងហិរញ្ញវត្ថុនានា ខណៈការប្រើប្រាស់កាតឥណពន្ធ និងកាតឥណទាន…
រាជធានីភ្នំពេញ ៖ មន្ត្រីធនាគារជាតិនៃកម្ពុជាបានឲ្យដឹងថា គិតមកដល់បច្ចុប្បន្ននេះ មានម៉ាស៊ីនATM ជាង១,៥ពាន់គ្រឿងបាននិងកំពុងដាក់ឱ្យអតិថិជនប្រើប្រាស់នៅតាមទីសាធារណៈ និងនៅតាមគ្រឹះស្ថានធនាគារ និងហិរញ្ញវត្ថុនានា ខណៈការប្រើប្រាស់កាតឥណពន្ធ និងកាតឥណទាន សរុបប្រមាណជាង២,៥លានកាត ។
លោកបណ្ឌិត ឃូ វុឍ្ឍី អគ្គនាយករងបច្ចេកទេសធនាគារជាតិនៃកម្ពុជា មានប្រសាសន៍កាលពីថ្ងៃទី១៦ ឧសភា ថា ៖« ចាប់ពីឆ្នាំ២០០៨ មកដល់ខែកុម្ភៈ ឆ្នាំ២០១៨នេះ ប្រទេសកម្ពុជាមានម៉ាស៊ីនATM ចំនួន១.៥១៨គ្រឿង, ប័ណ្ណឥណពន្ធ(Debit Card)ចំនួន១,៨លាន និងប័ណ្ណឥណទាន(Credit Card) មាន៧៦ម៉ឺន » ។
លោកបណ្ឌិតបន្តថា ៖« ស្របពេលវិស័យធនាគារ និងហិរញ្ញវត្ថុមានការរីកចម្រើន នៅតាមគ្រឹះស្ថានធនាគារ និងហិរញ្ញវត្ថុ បានបំពាក់នូវបច្ចេកវិទ្យាទំនើបៗ ហើយមុននឹងធ្វើការចាយវាយអ្វីមួយតាមATM ឬដកលុយពីក្រេឌីដកាត ត្រូវមានការយល់ព្រមតាមទូរស័ព្ទ ដើម្បីបញ្ជាក់ថា យើងជាម្ចាស់លុយពិតប្រាកដ » ។
បើតាមលោកបណ្ឌិត ការបំពាក់បច្ចេកវិទ្យាទំនើបនៅតាមវិស័យធនាគារ និងហិរញ្ញវត្ថុនៅកម្ពុជា ធ្វើទៅតាមប្រទេសអភិវឌ្ឍន៍ ដើម្បីការពារសុវត្ថិភាព ព្រោះមានក្រុមលួចលុយតាមបច្ចេកវិទ្យា ហើយករណីនេះជាបញ្ហាមួយដែលធនាគារជាតិមានការពង្រឹងសុវត្ថិភាព និងសមត្ថភាពសម្បើមណាស់ ។ នៅប្រទេសផ្សេងៗ ប្រឈមមុខខ្ពស់ពីការលួចលុយតាមបច្ចេកវិទ្យា តួយ៉ាង ប្រទេសបង់ក្លាដែស មានគេលួចលុយពីធនាគារអស់មួយចំនួន ។
លោកបណ្ឌិតបន្តថា ៖« បច្ចុប្បន្ន ធនាគារជាតិនៃកម្ពុជា មានការពង្រឹងសុវត្ថិភាពខ្លាំងទៅលើបច្ចេកវិទ្យា ។ យើងអនុញ្ញាតឱ្យបច្ចេកវិទ្យារីកចម្រើន តែយើងពង្រឹងការត្រួតពិនិត្យលើផ្នែកនេះ » ។
លោក យុន សុវណ្ណា នាយកប្រតិបត្តិនៃសមាគមមីក្រូហិរញ្ញវត្ថុកម្ពុជា មានប្រសាសន៍ថា គ្រឹះស្ថានមីក្រូហិរញ្ញវត្ថុ ដែលមានអាជ្ញាប័ណ្ណទទួលប្រាក់បញ្ញើសន្សំពីធនាគារជាតិ មានម៉ាស៊ីនATM ចំនួន៣៥៥គ្រឿង ។
លោកបន្តថា ៖« នៅមួយរយៈកន្លងមកនេះ យើងសង្កេតឃើញថា គ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើ កំពុងព្យាយាមវិនិយោគទៅលើបច្ចេកវិទ្យា ដើម្បីផ្តល់សេវាទៅដល់អតិថិជនរបស់ខ្លួន ដូចជា តាមរយៈATM ឬប្រព័ន្ធធនាគារចល័តប្រើប្រាស់អុីនធើរណេត ជាដើម ដើម្បីបង្ខិតសេវាទៅជិតអតិថិជន ដែលនេះជាការអភិវឌ្ឍវិជ្ជមានមួយ និងមានភាពងាយស្រួល និងសន្សំសំចៃពេលវេលាដល់អតិថិជន » ។
លោក Norihiko Kato ប្រធាននាយកប្រតិបត្តិធនាគារស្ថាបនា បានមានប្រសាសន៍ថា ធនាគាររបស់លោកបានដាក់ឲ្យប្រើប្រាស់ម៉ាស៊ីនអេធីអឹម ប្រមាណ៥០គ្រឿងមកហើយនៅទូទាំងប្រទេស ហើយពេលនេះ កំពុងតែធ្វើការវិនិយោគលើម៉ាស៊ីនអេធីអឹម ដែលបំពាក់បច្ចេកវិទ្យាទំនើបចុងក្រោយបំផុត ដើម្បីផ្តល់ភាពងាយស្រួលដល់អតិថិជនបន្ថែមទៀត ។
លោកថ្លែងថា ៖« ការប្រើប្រាស់ម៉ាស៊ីនអេធីអឹម គឺមានភាពងាយស្រួល រហ័សទាន់ចិត្ត និងមានសុវត្ថិភាពក្នុងការប្រើប្រាស់នៅទូទាំងព្រះរាជាណាចក្រកម្ពុជា » ៕
ចែករំលែកព័តមាននេះ