ខេត្តរតនគិរី ៖ សមត្ថកិច្ចបានចាប់ឃាត់ខ្លួនបុរសម្នាក់ជាឪពុកចុងពីបទរំលោភកូនស្រីអាយុ៩ឆ្នាំ និងបានបញ្ជូនទៅសាលាដំបូងខេត្ត កាលពីថ្ងៃទី១៦ ខែឧសភា ។ ប្រភពពីសមត្ថកិច្ចបានឱ្យដឹងថា នៅវេលាម៉ោង១១ព្រឹកថ្ងៃទី១៥ ខែឧសភា ប៉ុស្តិ៍នគរបាលរដ្ឋបាលកាឡែង បានទទួលពាក្យបណ្តឹងពីបុរសម្នាក់នៅឃុំកាឡែងដែលបានប្តឹងថា កាលពីប្រមាណ២ខែមុន នៅផ្ទះរបស់ឈ្មោះ ស្ខូ សាន់ដាន់ ក្នុងឃុំកាឡែង ស្រុកលំផាត់ មានករណីរំលោភសេពសន្ថវៈក្មួយស្រីរបស់គាត់ ។
ជនសង្ស័យដែលសមត្ថកិច្ចឃាត់ខ្លួនឈ្មោះ ស៊ីណាតខាក អាយុ៣៦ឆ្នាំ ជនជាតិឡាវ ជាកសិករនិងត្រូវជាឪពុកចុងរបស់ក្មេងស្រី ។ ជនសង្ស័យត្រូវបានឃាត់ខ្លួនជាបណ្ដោះអាសន្ននៅអធិការដ្ឋាននគរបាលស្រុកលំផាត់ ដើម្បីកសាងសំណុំរឿងបញ្ជូនបន្តទៅសាលាដំបូងខេត្ត ។
ដោយឡែក នៅខេត្តកណ្តាលវិញ បុរសជាឪពុកចុងម្នាក់ បានត្រូវនគរបាលស្រុកពញាឮចាប់ឃាត់ខ្លួនកាលពីថ្ងៃទី១៦ ខែឧសភា បន្ទាប់ពីបែកការណ៍និងមានពាក្យបណ្ដឹងរឿងចាប់រំលោភកូនស្រីអាយុ៨ឆ្នាំ ជាបន្តបន្ទាប់ ច្រើនលើកពេលម្ដាយនាងមិននៅ ។ អធិការនគរបាលស្រុកពញាឮ លោក ដួង តេង បានឱ្យដឹងថា ជនជាឪពុកចុងនេះឈ្មោះ ហង្ស វ៉ន ហៅតួ អាយុ៣១ឆ្នាំ ជាកម្មករសំណង់មានទីលំនៅក្នុងឃុំភ្នំបាត ស្រុកពញាឮ ។
នៅអំឡុងចុងឆ្នាំ២០១៧ ជននេះនិងប្រពន្ធព្រមទាំងកូនៗ បាននាំគ្នាទៅដើររើសអេតចាយនៅជិតវត្តមហាមន្ត្រី ក្នុងរាជធានីភ្នំពេញ ។ ឆ្លៀតពេលដែលប្រពន្ធទៅដើររើសអេតចាយបាត់ ជនជាឪពុកចុងរូបនេះនាំកូនស្រីខាងលើចូលក្នុងចេតិយវត្ត ហើយចាប់រំលោភបានម្តងនិងបានគំរាមមិនឱ្យប្រាប់ម្តាយនិងអ្នកដទៃឲ្យដឹងឡើយ ។ចំណែកកូនស្រី ដោយភ័យខ្លាចការគំរាមនេះក៏បានលាក់រហូត មិនប្រាប់អ្នកណាឲ្យដឹងទេសូម្បីតែម្តាយក៏ដោយ ។
លុះនៅថ្ងៃទី៧ ខែមេសា ឆ្នាំ២០១៨ វេលាម៉ោងប្រហែល៧យប់ ឪពុកចុងរូបនេះបាននាំនាងទៅក្បែរផ្ទះចាស់ដែលគេធ្វើទុកចោលនៅក្បែរព្រៃខាងក្រោយភូមិ ហើយរំលោភម្តងទៀត។មកដល់ថ្ងៃទី២ ខែឧសភា វេលាម៉ោងប្រហែល៨យប់ ឆ្លៀតពេលប្រពន្ធមិននៅផ្ទះ ជននេះក៏ចូលទៅក្នុងផ្ទះខ្លួន ឃើញនាងកំពុងដេកលើគ្រែជាមួយប្អូនៗ ក៏បានចាប់រំលោភទៀត ។
នៅព្រឹកថ្ងៃទី១៦ ខែឧសភា ខណៈក្មេងស្រីរងគ្រោះទៅលាងចានឱ្យអ្នកភូមិម្នាក់គ្រាន់បានប្រាក់កម្រៃខ្លះៗ នាងក៏និយាយរៀបរាប់ប្រាប់អ្នកជិតខាងពីសកម្មភាពឪពុកចុងចាប់រំលោភនាងនាពេលកន្លងមក ។ បន្ទាប់មក អ្នកជិតខាងក៏នាំក្មេងស្រីទៅដាក់ពាក្យបណ្តឹងនៅប៉ុស្តិ៍នគរបាលភ្នំបាត ហើយជនគម្រក់នេះក៏ត្រូវបានសមត្ថកិច្ចចាប់ខ្លួន ៕
ចែករំលែកព័តមាននេះ