រាជធានីភ្នំពេញ ៖ បណ្ដាវិនិយោគិនមកពីទីក្រុងស៊ិនជិន ប្រទេសចិន កំពុងសម្លឹងឃើញឱកាសវិនិយោគនៅកម្ពុជា និងចង់យកបទពិសោធន៍មកអភិវឌ្ឍន៍ខេត្តព្រះសីហនុ ឲ្យរីកចម្រើនដូចទីក្រុងស៊ិនជិនរបស់ខ្លួនផងដែរ ។
បើតាមលោក Cong Cao អគ្គលេខាធិការប្រតិបត្តិនៃតំបន់សេដ្ឋកិច្ចពិសេសទីក្រុងស៊ិនជិន ប្រទេសចិន បានថ្លែងនៅក្នុងវេទិកាមួយនៅទីស្ដីការក្រុមប្រឹក្សាអភិវឌ្ឍន៍កម្ពុជា កាលពីពេលថ្មីៗនេះថា ក្នុងនាមជាប្រទេសមានសម្ព័ន្ធភាពខ្លាំងមួយជាមួយកម្ពុជា លោកបានកៀងគរបណ្ដាវិនិយោគិន និងគ្រឹះស្ថានអប់រំជាច្រើននៅទីក្រុងស៊ិនជិន មកសិក្សាឈ្វេងយល់បន្ថែមពីការអភិវឌ្ឍរបស់ខ្លួន ចែករំលែកបទពិសោធន៍ និងបណ្ដាក់ទុនវិនិយោគនៅកម្ពុជា ជាពិសេសខេត្តព្រះសីហនុ ។
លោកបន្តថា ក្នុងនាមជាទីក្រុងរីកចម្រើនមួយនៅប្រទេសចិន ក៏ដូចជានៅលើពិភពលោក ស៊ិនជិននឹងយកបទពិសោធន៍របស់ខ្លួនមកអភិវឌ្ឍន៍កម្ពុជា ឲ្យរីកចម្រើនដូចជាទីក្រុងស៊ិនជិនដែរ ។ លោកនិយាយថា ៖«បើនិយាយពីទីក្រុងស៊ិនជិន កាលពីជាង៣០ឆ្នាំមុន វាគ្រាន់តែភូមិតូចមួយប៉ុណ្ណោះ ហើយមានមូលដ្ឋានមិនអំណោយផលសម្រាប់ការអភិវឌ្ឍទេ ក៏ប៉ុន្តែដោយសារតែមានទស្សនវិស័យមួយរបស់ថ្នាក់ដឹកនាំយើង ទើបយើងអាចកែប្រែភូមិតូចមួយ ក្លាយជាតំបន់ដែលល្បីជាងគេមួយនៅលើពិភពលោកបាន » ។
លោកបន្ថែមថា ៖« យើងមិនអាចវាយតម្លៃខ្លួនឯងថា មានបទពិសោធន៍ល្អឥតខ្ចោះនោះទេ ក៏ប៉ុន្តែស៊ិនជិនបានធ្វើរឿងត្រូវជាច្រើនក្នុងការបង្កើតតំបន់សេដ្ឋកិច្ចពិសេស ។ ដូចនេះហើយទើបយើងចង់យកនូវបទពិសោធន៍ និងឆន្ទៈរបស់ខ្លួនមកចែករំលែកដល់កម្ពុជា ក្នុងការអភិវឌ្ឍតំបន់សេដ្ឋកិច្ច ជាពិសេសនៅក្នុងខេត្តព្រះសីហនុផ្ទាល់តែម្ដង ដែលជាខេត្តមានសក្ដានុពលខ្លាំងមួយសម្រាប់អភិវឌ្ឍន៍តំបន់សេដ្ឋកិច្ច » ។
លោក នុត អ៊ុនវ័ណរ៉ា អគ្គលេខាធិការរងគណៈកម្មការធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានឲ្យដឹងថា តំបន់សេដ្ឋកិច្ចពិសេសត្រូវបានប្រទេសជាច្រើនទទួលស្គាល់ថា ជាសរសៃឈាមដ៏សំខាន់ក្នុងការអភិវឌ្ឍសេដ្ឋកិច្ចប្រទេសនីមួយៗ ។ ជាក់ស្ដែង វាបានបង្កើតការងារជូនប្រជាពលរដ្ឋក្នុងស្រុក និងបង្កើននូវឧត្តមភាពប្រកួតប្រជែងរបស់ប្រទេស ដោយសារការបណ្ដាក់ទុននូវវិស័យថ្មីៗជាច្រើនពីសំណាក់វិនិយោគិនក្នុង និងក្រៅប្រទេស ។
លោកបន្តថា ដោយមើលឃើញពីសារសំខាន់នៃតំបន់សេដ្ឋកិច្ចពិសេសសម្រាប់ប្រទេសជាតិបែបនេះ ទើបរាជរដ្ឋាភិបាលកម្ពុជាបានបង្កើតឲ្យមានការគ្រប់គ្រងត្រឹមត្រូវមួយលើតំបន់សេដ្ឋកិច្ច ព្រមទាំងទាក់ទាញវិនិយោគក្នុងនិងក្រៅស្រុកបន្ថែមទៀតមកបណ្ដាក់ទុន និងវិនិយោគលើតំបន់សេដ្ឋកិច្ចក្នុងប្រទេសកម្ពុជា ។
លោកថា ៖« ក្នុងឆ្នាំ២០១៧កន្លងទៅនេះ ក្រុមប្រឹក្សាអភិវឌ្ឍន៍កម្ពុជា បានអនុញ្ញាតឲ្យគម្រោងថ្មីចំនួន៤៧បន្ថែមទៀត វិនិយោគក្នុងតំបន់សេដ្ឋកិច្ចពិសេសចំនួន១១នៅកម្ពុជា ដែលមានទុនវិនិយោគសរុបចំនួន៤៨៤លានដុល្លារអាមេរិក ព្រមទាំងបង្កើតការងារបានប្រមាណជិត២ម៉ឺនកន្លែង » ។
បើតាមលោក នុត អ៊ុនវ័ណរ៉ា គម្រោងវិនិយោគថ្មីៗនៅក្នុងតំបន់សេដ្ឋកិច្ចពិសេសនានាក្នុងប្រទេសកម្ពុជា ក្នុងរយៈពេលចុងក្រោយនេះ ឃើញថា ភាគច្រើនផលិតនូវផលិតផលដែលមានតម្លៃខ្ពស់សម្រាប់នាំចេញ ។ ជាក់ស្ដែង ដូចជា រោងចក្រដំឡើងរថយន្ត ម៉ូតូ កង់, ការផលិតគ្រឿងបន្លាស់រថយន្ត គ្រឿងបន្លាស់បរិក្ខារពេទ្យ ម៉ូទ័រខ្នាតតូច ឧបករណ៍អគ្គិសនី និងសម្ភារកីឡា ជាដើម ខណៈសកម្មភាពវិនិយោគក្នុងតំបន់សេដ្ឋកិច្ចពិសេសកាលពីមុននេះ ភាគច្រើនគឺផ្ដោតលើវិស័យកាត់ដេរសម្លៀកបំពាក់ និងស្បែកជើង ៕
ចែករំលែកព័តមាននេះ