រាជធានីភ្នំពេញ ៖ ក្រោយពេលដឹងពីភាពល្បីល្បាញនៃផលិតផលគុយទាវភ្នំពេញ នៅលើទីផ្សារទាំងក្នុងនិងក្រៅស្រុក ព្រមទាំងមានការទទួលស្គាល់នូវរសជាតិ និងគុណភាព ក្រសួងពាណិជ្ជកម្មកម្ពុជា បានជំរុញឲ្យចុះបញ្ជីកម្មសិទ្ធិបញ្ញាចំពោះគុយទាវភ្នំពេញ ដើម្បីឲ្យផលិតផលនេះកាន់តែមានភាពទាក់ទាញដល់ភ្ញៀវទេសចរបរទេស ព្រមទាំងអាចលើកតម្កើងប្រទេសជាតិ ។
លោក អប់ រ៉ាឌី ប្រធាននាយកដ្ឋានកម្មសិទ្ធិបញ្ញានៃក្រសួងពាណិជ្ជកម្ម បានមានប្រសាសន៍ថា គុយទាវភ្នំពេញ បានកកើតឡើងជាច្រើនឆ្នាំមកហើយនៅក្នុងប្រទេសកម្ពុជា និងត្រូវបានគេហៅឈ្មោះតៗគ្នាថាជា «គុយទាវភ្នំពេញ» ។ លោកថា ៖« គុយទាវនេះមិនទាន់មានការអភិវឌ្ឍ និងជំរុញឲ្យមានម៉ាកច្បាស់លាស់នៅឡើយទេ តែវាមានវត្តមាននៅតាមភោជនីយដ្ឋានតូចធំនានា នៅក្នុងប្រទេសកម្ពុជា » ។
លោកបន្តថា គុយទាវភ្នំពេញ មិនទាន់បានរៀបចំពីរបៀបចម្អិន និងរូបមន្តច្បាស់លាស់នៅឡើយ ក៏ប៉ុន្តែតាមគំនិតផ្ដួចផ្ដើមរបស់រដ្ឋមន្ត្រីក្រសួងពាណិជ្ជកម្ម លោកចង់ឲ្យមានការចុះបញ្ជី កម្មសិទ្ធិបញ្ញាលើគុយទាវភ្នំពេញនេះ ដោយនឹងបង្កើតជារូបមន្ត និងម៉ាកសម្គាល់ច្បាស់លាស់ ដើម្បីទាក់ទាញភ្ញៀវទេសចរ និងអាចឲ្យភ្ញៀវទេសចរបានងាយស្រួលសម្គាល់ ។
លោកនិយាយថា ៖ « ការជំរុញឲ្យគុយទាវភ្នំពេញ ចុះបញ្ជីកម្មសិទ្ធិបញ្ញា ពីព្រោះយើងចង់ឲ្យឈ្មោះនេះរីកសុះសាយកាន់តែខ្លាំងឡើងនៅក្នុងប្រទេស និងនៅលើពិភពលោកផងដែរ ហើយក្រសួងនឹងជំរុញម៉ាកនេះឲ្យមានការប្រើប្រាស់ជាសមូហភាព » ។
លោកបន្ថែមថា គម្រោងដាក់គុយទាវភ្នំពេញ ក្នុងបញ្ជីកម្មសិទ្ធិបញ្ញា កំពុងតែដំណើរការទៅមុខហើយ ក្នុងនោះក្រសួងពាណិជ្ជកម្មបាននិងកំពុងកែសម្រួលលក្ខ ខន្តិកៈមួយចំនួន ធ្វើយ៉ាងណា ឲ្យម៉ាកនេះមានលក្ខណៈគ្រប់គ្រងមួយច្បាស់លាស់ ដើម្បីឲ្យវាក្លាយជាផលិតផលដែលមានប្រយោជន៍រួមសម្រាប់អ្នកធ្វើអាជីវកម្មក្នុងវិស័យម្ហូបអាហារ ។
លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ផងដែរថា ការចុះបញ្ជីកម្មសិទ្ធិបញ្ញាគុយទាវភ្នំពេញនេះ ដោយសារភ្នំពេញជាឈ្មោះរាជធានីនៃព្រះរាជាណាចក្រកម្ពុជា ហើយនៅពេលដែលវាទៅដល់ប្រទេសណា ឈ្មោះនេះនឹងត្រូវបានគេស្គាល់កាន់តែខ្លាំង ហើយនៅពេលដែលគេឮឈ្មោះគុយទាវភ្នំពេញ គេប្រាកដជាដឹងថា វាមានប្រភពមកពីប្រទេសកម្ពុជា ជាក់ជាមិនខាន ។
លោកបន្តថា នេះក៏ជាការបន្ថែមនូវអត្តសញ្ញាណរបស់កម្ពុជា និងជាការទាក់ទាញភ្ញៀវទេសចរអន្តរជាតិបន្ថែមទៀតមកកាន់ព្រះរាជាណាចក្រកម្ពុជា ដោយមាននូវផលិតថ្មីៗសម្រាប់ទទួលភ្ញៀវទេសចរដែលមកកម្ពុជា ។ លោកថា ៖« សកម្មភាពនេះ វាក៏បានជួយដល់បងប្អូនប្រជាពលរដ្ឋកម្ពុជាបានមួយចំនួនផងដែរ ក្នុងនោះរួមមាន ឱកាសការងារសម្រាប់អ្នកបម្រើសេវាកម្មក្នុងភោជនីយដ្ឋាន និងជាឱកាសសម្រាប់សហគ្រាសខ្នាតតូច និងមធ្យម ក្នុងការផលិតនូវគុយទាវបន្ថែមប្រកបដោយអនាម័យខ្ពស់សម្រាប់បំពេញតម្រូវការនៅលើទីផ្សារទាំងក្នុង និងក្រៅប្រទេស » ។
លោកបញ្ជាក់ថា ៖« បច្ចុប្បន្ននេះ គុយទាវភ្នំពេញ មានភាពល្បីល្បាញច្រើនកន្លែងណាស់ ដូចជា នៅអាមេរិក បារាំង អាល្លឺម៉ង់ និងបណ្ដាប្រទេសអាស៊ីជាច្រើនទៀត ។ ដូចនេះហើយ ទើបយើងចង់លើកតម្កើងផលិតផលនេះឲ្យកាន់តែល្បីខ្លាំងឡើងៗ » ៕
ចែករំលែកព័តមាននេះ