ខេត្តព្រះសីហនុ ៖ ក្នុងពេលផឹកស៊ីមានតែគ្នា២នាក់ប៉ុណ្ណោះ ពេលស្រវឹងជោករៀងៗខ្លួន បង្កជាជម្លោះហិង្សាចាក់បុរសម្នាក់បណ្តាលឱ្យស្លាប់ភ្លាមៗនៅនឹងកន្លែងកើតហេតុ កាលពីវេលាម៉ោងជិត១១យប់ថ្ងៃទី១៧ ខែ ឧសភា ឆ្នាំ២០១៨ ស្ថិតនៅក្រុម២៧…
ខេត្តព្រះសីហនុ ៖ ក្នុងពេលផឹកស៊ីមានតែគ្នា២នាក់ប៉ុណ្ណោះ ពេលស្រវឹងជោករៀងៗខ្លួន បង្កជាជម្លោះហិង្សាចាក់បុរសម្នាក់បណ្តាលឱ្យស្លាប់ភ្លាមៗនៅនឹងកន្លែងកើតហេតុ កាលពីវេលាម៉ោងជិត១១យប់ថ្ងៃទី១៧ ខែ ឧសភា ឆ្នាំ២០១៨ ស្ថិតនៅក្រុម២៧ ភូមិ៣ សង្កាត់លេខ១ ក្រុងព្រះសីហនុ។
លោកវរសេនីយ៍ទោ ភុល ភស្តា អធិការនគរបាលក្រុងព្រះសីហនុបានឲ្យដឹងថា ជនរងគ្រោះ ឈ្មោះយ៉ែម តក់ ហៅធា ភេទប្រុស អាយុ៤៥ឆ្នាំ មានស្រុកកំណើតភូមិមេលង ឃុំព្រៃខ្លា ស្រុកកោះអណ្តែត ខេត្តតាកែវ មុខរបរជាអ្នកបើកទូកនេសាទស្នាក់នៅលើទូក បានស្លាប់នៅនឹងកន្លែងកើតហេតុ ។ រីឯជនសង្ស័យឈ្មោះឆាយ រ៉ា ហៅប្រុស អាយុ៥៤ឆ្នាំ មុខរបរកម្មករនេសាទ មានទីលំនៅក្រុម១៩ ភូមិ៣ សង្កាត់លេខ១ ក្រុងព្រះសីហនុ ខេត្តព្រះសីហនុ ។
តាមការរៀបរាប់របស់ជនសង្ស័យបានឲ្យដឹងថា មុនពេលកើតហេតុ ពួកគេទាំង២នាក់បានអង្គុយផឹកស៊ីនៅលើផែចតទូកដែលជាកន្លែងកើតហេតុខាងលើ ហើយបានជជែកគ្នាពីរឿងជនសង្ស័យបានប្រើឲ្យជនរងគ្រោះវាស់ប្រវែងមងជាឧបករណ៍នេសាទខុស ក៏បានស្តីបន្ទោសបន្តិចបន្តួចទៅលើជនរងគ្រោះ ធ្វើឲ្យជនរងគ្រោះខឹងក៏ស្ទុះមកដាល់ចំនួន២ដៃទៅលើផ្ទៃមុខជនសង្ស័យ បណ្តាលឲ្យហូរឈាមយ៉ាងខ្លាំង ។ ពេលនោះជនសង្ស័យក៏ខឹងច្រឡោត ហើយក៏បានយកកូនកាំបិតចុងស្រួចដងឈើស្ទុះទៅចាក់ចំដើមទ្រូងខាងឆ្វេងមួយកាំបិត បណ្តាលឲ្យជនរងគ្រោះស្លាប់ភ្លាមៗនៅកន្លែងកើតហេតុ ។ ក្រោយធ្វើសកម្មភាពចាក់សម្លាប់រួច ជនសង្ស័យបានជិះម៉ូតូមួយគ្រឿងរត់គេចខ្លួន ហើយត្រូវបានកម្លាំងនគរបាលប៉ុស្តិ៍រដ្ឋបាលសង្កាត់លេខ១ សហការជាមួយកម្លាំងនគរបាលអធិការដ្ឋានក្រុងព្រះសីហនុដាក់កម្លាំងពួនស្ទាក់តាមផ្លូវគ្រប់ច្រកល្ហក ទើបឃាត់ខ្លួនជនសង្ស័យបាននៅវេលាម៉ោង១១យប់ថ្ងៃដដែលនៅតាមបណ្តោយផ្លូវចុះមកពីស្ថានីយប្រេងមួយកន្លែងចូលមកផ្សារលើក្រុងព្រះសីហនុ ។
ក្រោយពេលឃាត់ខ្លួន ជនសង្ស័យត្រូវបាននគរបាលជំនាញព្រហ្មទណ្ឌនៃអធិការនគរបាលក្រុងព្រះសីហនុធ្វើការសាកសួរដើម្បីកសាងសំណុំរឿងបញ្ជូនទៅស្នងការរដ្ឋាននគរបាលខេត្តព្រះសីហនុ ចាត់ការបន្តទៅតាមនីតិវិធី ។
ចែករំលែកព័តមាននេះ