ខេត្តបន្ទាយមានជ័យ ៖ តាយាយ២នាក់ប្តី-ប្រពន្ធ បានបង្ខំចិត្តចាកចេញពីលំនៅឋានដើរស្វែងរកសុំទាន
នៅក្រុងប៉ោយប៉ែត ដើម្បីចិញ្ចឹមជីវិត ព្រោះគ្មានទីពឹងក្រោយព្រះអគ្គីឆេះផ្ទះរបស់ពួកគាត់អស់ កាលពីដើមឧសភា ២០១៨ នៅភូមិគំនរបេង ឃុំសិរីមានជ័យ ស្រុកសំពៅលូន ខេត្តបាត់ដំបង ។ តាយាយទុរគតខាងលើ ប្តីឈ្មោះ ទិត្យ ស៊ុនអាយុ៧៣ឆ្នាំ ប្រពន្ធឈ្មោះ ហ៊ឹម ព្រេន អាយុ៦៣ឆ្នាំ ។
តាយាយចំណាស់ទាំង២ បានសុំព្រះសង្ឃគង់ក្នុងវត្តបាលិលេយ្យ ក្នុងក្រុងប៉ោយប៉ែត ដើម្បីស្នាក់នៅបណ្តោះអាសន្ន ដើម្បីសុំទានរកប្រាក់ចិញ្ចឹមជីវិត ។ លោកតារូបនេះអះអាងថា គាត់ជាប្រធានអាចារ្យនៅ
វត្តបេងបរមី ស្ថិតក្នុងភូមិគំនរបេង ឃុំសិរីមានជ័យ ។ គាត់បានរៀបរាប់ទាំងទឹកភ្នែកថា ផ្ទះរបស់គាត់ទំហំ៣ម៉ែត្រ គុណនឹង៤ម៉ែត្រ សង់ពីឈើប្រក់ស័ង្កសី ត្រូវបានភ្លើងឆេះអស់គ្មានសល់ និងមិនដឹងពីមូលហេតុខណៈគាត់រវល់ទៅព្យាបាលជំងឺនៅមន្ទីរពេទ្យធំឯខេត្តបាត់ដំបង ។
តាយាយទុរគតខាងលើប្រាប់ថា គាត់មានកូនប្រុសម្នាក់ហើយគេមានគ្រួសារបែកទៅនៅកន្លែងផ្សេងថែមទាំងក្រីក្រទៀត មិនអាចឱ្យពួកគាត់ពឹងពាក់បាន ។ ពួកគាត់ថា ដោយសារបញ្ហាជីវភាព ហើយផ្ទះក៏ត្រូវភ្លើងឆេះអស់ ទើបបង្ខំចិត្តនាំតាយាយមកកាន់ក្រុងប៉ោយប៉ែត ដើម្បីដើរសុំទានរកប្រាក់ចិញ្ចឹមជីវិត ។ យ៉ាងណាក៏ដោយលោកតានិយាយថា គាត់មិនដើរសុំទានទេគឺស្នាក់នៅក្នុងវត្ត គ្រាន់មើលថែយាយពេលយប់ព្រោះយាយគាត់តែងឈឺញឹកញាប់ មិនអាចដើរចោលបាន ។ ពួកគាត់ទទូចសុំសប្បុរសជនក្នុងនិងក្រៅប្រទេសមេត្តាជួយផង ដើម្បីបានរស់សម្រាប់ដង្ហើមចុងក្រោយ ។
ជុំវិញករណីខាងលើសមាជិកភូមិគំនរបេង លោកស្រី ហ៊ឹម យ៉ាវ ប្រាប់កោះសន្តិភាពតាមទូរស័ព្ទថា គ្រួសារខាងលើ ត្រូវភ្លើងឆេះផ្ទះអស់កាលពីដើមខែឧសភា ២០១៨ ពិតប្រាកដមែន ។ ហើយថា ក្រោយកើតហេតុភ្លើងឆេះនោះ អាជ្ញាធរឃុំនិងស្រុកបានយកអំណោយជាគ្រឿងឧបភោគបរិភោគ និងថវិកាមួយចំនួនចែកជូនដែរ តែតាយាយខាងលើមិនបានទទួលទេ ព្រោះរវល់ទៅមន្ទីរពេទ្យនៅឯខេត្តបាត់ដំបង គឺកូនគាត់និងគ្រួសារទទួលជំនួស ។ គួរបញ្ជាក់ថា ព្រះសង្ឃ១អង្គព្រោះតែអាណិតបានជួយថវិកាតាយាយខាងលើមួយចំនួនដើម្បីទិញម្ហូបអាហារហូបបណ្តោះអាសន្ន ៕
ចែករំលែកព័តមាននេះ