រាជធានីភ្នំពេញ ៖ តាមរយៈលោកវរសេនីយ៍ទោ សុំ សឿន នាយរងការិយាល័យផែនការនាយកដ្ឋានប្រតិបត្តិការសន្តិភាពនៃក្រសួងការពារជាតិ ដែលបានទៅធ្វើកម្មសិក្សានៅមជ្ឈមណ្ឌលសិក្សាសន្តិសុខអាស៊ីប៉ាស៊ីហ្វិក រដ្ឋហាវ៉ៃ សហរដ្ឋអាមេរិកកាលពីថ្ងៃទី២៥ វិច្ឆិកា ឆ្នាំ២០១០ កន្លងមកថ្មីៗនេះ មានបងប្អូនប្រជាពលរដ្ឋខ្មែររស់នៅជាសមាគមមិត្តភាពខ្មែរ-ហាវ៉ៃ និងសមាគមខ្មែរហាវ៉ៃ ក្នុងរដ្ឋហាវ៉ៃ សហរដ្ឋអាមេរិក បានបរិច្ចាគថវិការៀងៗខ្លួនតាមកំលាំងសទ្ធាជួយឧបត្ថម្ភដល់ប្រជាពលរដ្ឋខ្មែរដែលរងគ្រោះក្នុងឧបទ្ទវហេតុលើស្ពានពេជ្រកាលពីរាត្រីថ្ងៃទី២២ វិច្ឆិកា ឆ្នាំ២០១០ សរុបជាថវិកាមានចំនួន២.៤២៥ដុល្លារ ។
ចំពោះថវិការបស់សប្បុរសជនខាងលើនេះលោកសំ សឿន បានផ្តល់ជូនការិយាល័យកោះសន្តិភាព ដើម្បីធ្វើការបែងចែកជូនដល់ប្រជាពលរដ្ឋដែលរងគ្រោះ ។ ឆ្លើយតបចំពោះទឹកចិត្តដ៏សប្បុរសធម៌របស់បងប្អូនប្រជាពលរដ្ឋខ្មែរដែលរស់នៅឯនាយសមុទ្រនោះ ការិយាល័យនិពន្ធកោះសន្តិភាពសំរេចនាំយកថវិការបស់សប្បុរសជនទៅបែងចែកជូនដល់អ្នករងរបួសដែលកំពុងសំរាកព្យាបាលនៅតាមមន្ទីរពេទ្យក្នុងសបា្តហ៍នេះ ។
លោកវរសេនីយ៍ទោ សំ សឿន បានមានប្រសាសន៍ថា ឆ្លៀតឱកាសដែលរូបលោកបានទៅបំពេញបេសកកម្មការងារនៅសហរដ្ឋអាមេរិក រូបលោកបានលើកយកឧបទ្ទវហេតុនៃសោកនាដកម្មដ៏មហារន្ធត់នៅលើស្ពានពេជ្រ ជំរាបជូនបងប្អូនប្រជាពលរដ្ឋខ្មែរស់នៅសហរដ្ឋអាមេរិកឱ្យបានដឹង ។ ពេលនោះបងប្អូនខ្មែរយើងក៏បាននាំគ្នាបរិច្ចាគថវិកាតាមសទ្ធារៀងៗខ្លួនជួយឧបត្ថម្ភដល់បងប្អូនប្រជាពលរដ្ឋដែលរងគ្រោះដែលជាការចូលរួមរំលែកទុក្ខជាមួយក្រុមគ្រួសារពួកគេផងដែរតាមរយៈរូបលោក ។
លោកសំ សឿន បានមានប្រសាសន៍បន្តថា បងប្អូនប្រជាពលរដ្ឋខ្មែរយើងដែលរស់នៅក្នុងសមាគមទាំង២ខាងលើមានទំនុកចិត្តលើសារព័ត៌មានកោះសន្តិភាព ហើយឥឡូវបានឱ្យរូបលោកផ្ញើថវិកានេះតាមរយៈកោះសន្តិភាព ដើម្បីធ្វើការបែងចែកជូនដល់បងប្អូនពលរដ្ឋរងគ្រោះ ។ កោះសន្តិភាពនឹងផ្សាយបន្តពីការប្រគល់ប្រាក់អំណោយដែលបានបែងចែកទៅតាមមន្ទីរពេទ្យក្នុងលេខក្រោយទៀត ដោយមានរាយឈ្មោះបងប្អូនជាអ្នកបរិច្ចាគអំណោយផងដែរ ៕
ចែករំលែកព័តមាននេះ