រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានប្រតិកម្មភ្លាមៗនៅថ្ងៃទី១៧ ខែឧសភា ឆ្នាំ២០១៨ ទៅនឹងការបកស្រាយមួយចំនួនដែលថាមីន និងយុទ្ធភណ្ឌមិនទាន់ផ្ទុះនៅកម្ពុជា…
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានប្រតិកម្មភ្លាមៗនៅថ្ងៃទី១៧ ខែឧសភា ឆ្នាំ២០១៨ ទៅនឹងការបកស្រាយមួយចំនួនដែលថាមីន និងយុទ្ធភណ្ឌមិនទាន់ផ្ទុះនៅកម្ពុជា គឺស្អុយអស់ហើយដែលការបកស្រាយបែបនេះត្រូវបាននាយករដ្ឋមន្ត្រីកម្ពុជាបញ្ជាក់ថា ធ្វើឲ្យប្រជាពលរដ្ឋមានការយល់ច្រឡំបង្កឲ្យមានហានិភ័យដល់អាយុជីវិតប្រជាជនកម្ពុជា។ ក្នុងពិធីបិទសន្និបាតជាតិវិស័យសកម្មភាពមីន និងប្រកាសដាក់ឲ្យប្រើប្រាស់ផែនការយុទ្ធសាស្ត្រជាតិ សកម្មភាពមីន ឆ្នាំ២០១៨-២០២៥ ដែលធ្វើឡើងនៅវិមានសន្តិភាពសម្តេចនាយករដ្ឋមន្ត្រី ហ៊ុន សែន បានបញ្ជាក់់ថា សម្តេចបានឃើញនូវការបកស្រាយណាមួយនោះ ដែលថា «មីននៅកម្ពុជា វាស្អុយអស់ហើយនោះ» ដូច្នេះសម្តេចទាមទារឲ្យមានការបកស្រាយឲ្យច្បាស់បន្ថែមទៀត ព្រោះសម្តេចគ្រាន់តែបានឃើញព័ត៌មានតែប៉ុណ្ណោះ ប៉ុន្តែប្រសិនជាមានបញ្ហានេះមែន សម្តេចសូមស្នើឲ្យមានការកែតម្រូវឲ្យបានច្បាស់ ឬក៏ការបកស្រាយឲ្យបានច្បាស់។
សម្តេចតេជោ មានប្រសាសន៍បញ្ជាក់យ៉ាងដូច្នេះ៖ «ខ្ញុំគ្រាន់តែបានមើលសារព័ត៌មានមុនពេលដែលខ្ញុំចេញមក តែប៉ុណ្ណោះថា មានប្រតិកម្មពីអគ្គនាយកស៊ីម៉ាក ជាមួយនឹងការលើកឡើងរបស់ វាគ្មិនខ្លះថា គ្រាប់មីននៅកម្ពុជា វាស្អុយអស់ហើយ មិនដូច្នេះទេ។ បើទោះបីជាការបកស្រាយយ៉ាងណាក៏ដោយ ឬដូចថាការកែច្នៃគ្រាប់មីន មីនដែលកែច្នៃ វាដាក់ឈើចូលទៅជាមួយឈើវាអាចពុកក៏ប៉ុន្តែអាជាតិផ្ទុះ វាមិនពុកទេ វាមិនពុកទេ»។ សម្តេចបានទាមទារថា៖ «ត្រូវបកស្រាយបញ្ហានេះឡើងវិញ ដើម្បីចៀសវាងការភាន់ច្រឡំណាមួយក្នុងចំណោមប្រជាជនកម្ពុជា។ ព្រោះអ្វី? សព្វថ្ងៃនេះ យើងបង្ការខ្លាំងណាស់ ដើម្បីចៀសវាងឲ្យប្រជាជនកម្ពុជា រហូតទៅដល់កុមារកម្ពុជាចៀសឲ្យផុត ចៀសឲ្យឆ្ងាយ សូម្បីតែរើសគ្រាប់ដែលមានការសង្ស័យក៏មិនឲ្យប៉ះពាល់ផង»។
សម្តេចមានប្រសាសន៍បន្តថា តំបន់ខ្លះយើងទៅដោតតំបន់ដែលសង្ស័យថាមានមីន មិនទាន់ហ៊ានឲ្យប្រជាជនចូលទៅកាន់ទីនោះទេ។ យើងត្រូវតែរារាំង ដើម្បីទុកកន្លែងនោះ ដោះមីនឲ្យរួចរាល់សិន បានបែងចែកដីជូនប្រជាជន។ សម្តេចតេជោ ហ៊ុន សែន ក៏បានទាមទារបន្ថែមទៀតថា៖ «ខ្ញុំអំពាវនាវ សុំឲ្យមានការបកស្រាយឲ្យបានច្បាស់ទៅលើចំណុចនេះ។ សុំកុំប្រថុយប្រថាន។ ហើយប្រសិនជាមានការបកស្រាយបែបនេះតទៅទៀត ខ្ញុំក៏សុំអញ្ជើញអ្នកបកស្រាយទាំងនោះរួមគ្នាជាមួយនឹងអ្នកគាំទ្រនៃការបកស្រាយ ដែលថាមីននៅកម្ពុជា គ្រាប់មីនស្អុយ សុំធ្វើដំណើរទៅកាន់កន្លែងមីនសាកល្បងខ្លួនឯងទៅ។ នេះទើបដឹងរឿងពិត ព្រោះអាគ្រាប់កែច្នៃនេះ វាអាចឈើឬក៏ឫស្សី វាអាចពុក។ ម្យ៉ាងទៀតការបកស្រាយបែបនេះនឹង ធ្វើឲ្យប្រជាជនកម្ពុជាបាត់បង់ការប្រុងប្រយ័ត្ន»។ សម្តេចបន្តថា «មីនវាមិនចេះស្អុយទេ រាប់ទាំងមីន ដែលមានតាំងពីសង្គ្រាមលោកលើកទី១ និងលើកទី២» ព្រោះរំសេវវាមិនទាន់អស់ទេ៕
ចែករំលែកព័តមាននេះ