រាជធានីភ្នំពេញ ៖ ដើម្បីពង្រឹងការធ្វើកិច្ចសហប្រតិបតិការពិសេសនោះការប្រើប្រាស់ភាសាបារាំងរដ្ឋសភា និងព្រឹទ្ធសភាកម្ពុជាបានធ្វើម្ចាស់ផ្ទះបើសិក្ខាសាលាស្តពី ហ្វ្រង់កូហ្វូនី ភាសាបារាំង និងការងារសភា ។
សិក្ខាសាលាសភាស្តីពីហ្វ្រង់កូហ្វូនី ភាសាបារាំង និងការងារសភា រៀបចំក្រោមកិច្ចសហការរៀបចំដោយក្រុមសភាជាតិកម្ពុជានៃសភានិយាយភាសាបារាំង និងកម្មវិធីណូរីយ៉ា (Noria-APF) បានប្រារព្ធធ្វើរយៈពេលពីរថ្ងៃ ចាប់ថ្ងៃទី១៧ ដល់ថ្ងៃទី១៨ ខែឧសភា នេះនៅសណ្ឋាគារ Raffles Le Royal រាជធានីភ្នំពេញ ។
លោក ឡេង ប៉េងឡុង អគ្គលេខាធិការដ្ឋានរដ្ឋសភាថ្លែងថា សិក្ខាសាលានេះក៏មានការចូលរួមពីសមាជិក សមាជិកា ព្រឹទ្ធសភា រដ្ឋសភា វាគ្មិនជាតិ អន្តរជាតិ តំណាងមកពី ក្រសួងអប់រំ យុវជន និងកីឡា ក្រសួងការបរទេស និងសហប្រតិបត្តិការ អន្តរជាតិ វិទ្យាស្ថានបារាំងនៅកម្ពុជា ដេប៉ាតឺម៉ង់ភាសាបារាំង នៃសាកលវិទ្យាល័យភូមិន្ទភ្នំពេញ វិទ្យាស្ថានបច្ចេកវិទ្យាកម្ពុជា ទីភ្នាក់ងារឧត្តមសិក្សា នៃប្រទេសប្រើភាសាបារាំង(AUF) អង្គការអន្តរជាតិ ហ្វ្រង់កូហ្វូនី(OIF) និងមន្ត្រីអគ្គលេខាធិ-ការដ្ឋានព្រឹទ្ធសភា-រដ្ឋសភា ដែលធ្លាប់សិក្សាភាសាបារាំងក្នុងគម្រោងជំនួយរបស់កម្មវិធីណូរីយ៉ា (Noria) ក្នុងគោលបំណងលើកកម្ពស់ ការប្រើប្រាស់ភាសាបារាំងនៅកម្ពុជា ពិសេសក្នុងវិស័យសភានេះហើយក៏នឹងពិភាក្សាលើប្រធានបទមួយចំនួនដូចជា លំហរនៃប្រទេសនិយាយភាសាបារាំងកាលានុវត្តភាពអន្តរជាតិ សម្រាប់សភាកម្ពុជា ភាសាបារាំង វ៉ិចទ័រការងារការទូតសភា និងឧបករណ៍នៃការផ្លាស់ប្តូរ ផ្នែកសេដ្ឋកិច្ច ផ្នែកឧត្តមសិក្សា និងផ្នែកវប្បធម៌ កិច្ចសហប្រតិបត្តិការ សេដ្ឋកិច្ចរវាងក្រុមប្រទេស និយាយភាសាបារាំង និងប្រទេសសមាជិកអាស៊ាន(ASEAN) ភាសាបារាំងមធ្យោបាយការងា រសភា ភាសាបារាំង និងការវិវត្តវិជ្ជាជីវៈរបស់មន្ត្រីសភាកម្ពុជា ។
ចំណែកលោក យូ ហុកគ្រី អនុប្រធានទី១រដ្ឋសភាបានមានប្រសាសន៍លើកឡើងដោយយោងលើសារលិខិតរបស់លោក Jacques Krabal សមាជិករដ្ឋសភាបារាំង និងជាអគ្គលេខាធិការសភា APF ផ្ញើជូនសភាកម្ពុជាកាលពីថ្ងៃទី១៣ ខែកុម្ភៈ ឆ្នាំ២០១៨ នោះគឺ «ការពង្រឹងការប្រើប្រាស់ និងការអភិវឌ្ឍភាសាបារាំង»នៅក្នុងប្រទេសកម្ពុជាដែលជាកម្មវត្ថុចម្បងនៃការរៀបចំសិក្ខាសាលានេះ ។
លោកបន្តថា គោលដៅជាក់លាក់របស់ Noria ពោលគឺសំដៅធ្វើឱ្យ សម្រេចនូវលទ្ធផលរំពឹងទុក គឺការពង្រឹងនិងធ្វើឱ្យកាន់តែប្រសើរឡើងនូវដំណើរការរបស់ការិយាល័យហ្វ្រង់កូហ្វូនីពង្រឹងការប្រើប្រាស់ភាសាបារាំង និងបង្កើតកម្មវិធី និងផ្នែកផ្សេងៗដែលជាចលករសម្រាប់ជម្រុញ និងបង្កើតនូវជំនាញថ្មីដែលទាក់ទងនឹងការប្រើប្រាស់ភាសាបារាំង ។
លោកបញ្ជាក់ថា«ខ្ញុំសង្ឃឹមជឿជាក់ថា អង្គសិក្ខាសាលាទាំងមូលនឹងពិភាក្សាផ្លាស់ប្តូរបទពិសោធន៍គ្នាក្នុ ងស្មារតីសាមគ្គីភាព និងទទួលបានលទ្ធផលល្អៗ ជាគុណប្រយោជន៍ដល់ការពង្រឹងសហប្រតិបត្តិការរវាងសភានិយាយភាសាបារាំង និងសភាកម្ពុជា» ៕
ចែករំលែកព័តមាននេះ