ខេត្តព្រៃវែង ៖ ហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់មួយបានបង្កឲ្យមានការភ្ញាក់ផ្អើលដល់ប្រជាពលរដ្ឋ និងក្រុមអ្នកដំណើរនាំគ្នាចោមរោមមើលយ៉ាងកកកុញ នៅលើកំណាត់ផ្លូវជាតិលេខ៨ A ត្រង់ចំណុចខាងកើតស្ពានក្រចាបចម្ងាយ២០០ម៉ែត្រ ស្ថិតក្នុងភូមិក្រចាបទី៣ ឃុំព្រៃខ្លា ស្រុកស្វាយអន្ទរ…
ខេត្តព្រៃវែង ៖ ហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់មួយបានបង្កឲ្យមានការភ្ញាក់ផ្អើលដល់ប្រជាពលរដ្ឋ និងក្រុមអ្នកដំណើរនាំគ្នាចោមរោមមើលយ៉ាងកកកុញ នៅលើកំណាត់ផ្លូវជាតិលេខ៨ A ត្រង់ចំណុចខាងកើតស្ពានក្រចាបចម្ងាយ២០០ម៉ែត្រ ស្ថិតក្នុងភូមិក្រចាបទី៣ ឃុំព្រៃខ្លា ស្រុកស្វាយអន្ទរ ខេត្តព្រៃវែង កាលពីវេលាម៉ោង៤និង៣០នាទីល្ងាច ថ្ងៃទី១៦ ឧសភានេះ ។
ហេតុការណ៌នេះបានបណ្តាលឲ្យបុរសម្នាក់ឈ្មោះ ស្រេង សុខ អាយុ២៩ឆ្នាំ មានទីលំនៅក្នុងភូមិពានរោង ឃុំព្រៃខ្លា ស្រុកស្វាយអន្ទរ ស្លាប់បាត់បង់ជីវិតភ្លាមៗនៅហ្នឹងកន្លែងកើតហេតុ ដោយសារជិះម៉ូតូទៅបុក និងរថយន្ត ហើយត្រូវរថយន្តកិនអូសជាង៥ម៉ែត្រ ។
ទាក់ទិន និងហេតុការណ៍គ្រោះថ្នាក់ខាងលើនេះ ត្រូវបានសមត្ថកិច្ចប្រាប់ឲ្យដឹងថា ពេលកើតហេតុគេឃើញជនរងគ្រោះជិះម៉ូតូមួយគ្រឿងម៉ាកហុងដាសេ១២៥ ស៊េរីឆ្នាំ២០១៤ ពណ៌ខ្មៅ ពាក់ស្លាកលេខព្រៃវែង ១I- ០១៤១ ធ្វើដំណើរម្នាក់ឯងក្នុងទិសដៅពីលិចទៅកើត លុះមកដល់ចំណុចកើតហេតុ ម៉ូតូបានរេចង្កូតឆ្លងថ្នល់ ចូលទៅបុករថយន្តសាំយ៉ុងមួយគ្រឿង ពណ៌បៃតងចាស់ ដែលបើកមកបញ្ច្រាសទិសគ្នា ចំពីមុខពេញទំហឹង បណ្តាលឲ្យជនរងគ្រោះជាអ្នកបើកម៉ូតូស្លាប់ភ្លាមៗនៅហ្នឹងកន្លែង ។ ចំណែករថយន្តសាំយ៉ុងដោយសារខំប្រឹងគេច ក៏ជ្រុលចង្កូតធ្លាក់ចេញពីផ្លូវធ្លាក់ចូលទៅក្នុងប្រឡាយលិចរថយន្តបាត់ មើលឃើញតែដំបូល ហើយអ្នកបើករថយន្តបានលូនចេញពីរថយន្តហែលទឹកឡើងគោក និងរត់គេចខ្លួនបាត់ភ្លាមៗតែម្តង ។
សមត្ថកិច្ចបានបញ្ជាក់ថា គ្រោះថ្នាក់ចរាចរណ៍នេះចាត់ទុកថា ជាសំណាងមួយហើយដែលរថយន្តសាំយ៉ុងនោះគ្មានអ្នកដំណើរជិះ គឺមានតែអ្នកបើកបរម្នាក់ បើសិនជាមានអ្នកដំណើរច្រើននាក់ជិះក្នុងរថយន្តនោះវិញ ច្បាស់ជាមានអ្នកស្លាប់ និងរបួសច្រើនជាក់ជាមិនខានព្រោះរថយន្តធ្លាក់ពីផ្លូវចូលប្រឡាយលិចបាត់ឃើញតែដំបូលប៉ុណ្ណោះ ។
ក្រោយកើតហេតុប្រមាណជា១៥នាទី សមត្ថកិច្ចបានទៅកន្លែងកើតហេតុជួយសម្រួលចរាចរណ៍កុំឲ្យកកស្ទះ និងបានទាក់ទងហៅសាច់ញាតិជនរងគ្រោះទៅទទួលយកសពត្រឡប់ទៅផ្ទះ និងបានស្ទូចយករថយន្តពីក្នុងប្រឡាយយកទៅរក្សាទុកនៅអធិការដ្ឋាន រង់ចាំការដោះស្រាយនៅពេលក្រោយ ៕
ចែករំលែកព័តមាននេះ