រាជធានីភ្នំពេញ ៖ អ្នកនាំចូលរថយន្តនៅកម្ពុជាបានអះអាងថា ការទិញរថយន្ដបង់រំលស់កំពុងកើនឡើងគួរឲ្យកត់សម្គាល់ ខណៈពួកគេកំពុងជំរុញឲ្យគ្រឹះស្ថានហិរញ្ញវត្ថុនានាផ្តល់កម្ចីរយៈពេលវែង និងការប្រាក់កាន់តែទាបជាងមុន ។
លោក ពាង ម៉ាន អគ្គនាយកក្រុមហ៊ុនGreat Wall Cambodia បានថ្លែងកាលពីពេលថ្មីៗនេះថា ការទិញរថយន្តបង់រំលស់បានកើនឡើងច្រើននៅកម្ពុជា ដោយសារយើងបានធ្វើការជាមួយធនាគារ និងស្ថាប័នហិរញ្ញវត្ថុដទៃទៀត ដើម្បីផ្តល់សេវាកម្មបង់រំលស់ដល់អតិថិជន ។
លោកបន្តថា ប្រសិនជាធនាគារ ឬគ្រឹះស្ថានមីក្រូហិរញ្ញវត្ថុបន្ថយអត្រាការប្រាក់មកកាន់តែទាប ឬផ្តល់ការបង់រំលស់រយៈពេលវែង ដូចនៅប្រទេសជឿនលឿននានានោះ ការបង់រំលស់នឹងកើនឡើងកាន់តែច្រើនថែមទៀត ។
លោកបន្តថា ៖« តាមរយៈក្រុមហ៊ុនរបស់ខ្ញុំ ខ្ញុំគិតថា អ្នកទិញរថយន្តរហូតដល់៧០ទៅ៨០% បានប្រើប្រាស់សេវាកម្មបង់រំលស់នាពេលបច្ចុប្បន្ននេះ » ។ លោកបន្ថែមថា ៖ «អ្នកខ្លះគាត់មានប្រាក់ច្រើនគ្រប់គ្រាន់សម្រាប់ទិញ តែពួកគេនៅតែបង់រំលស់ ដោយសារពួកគេចង់យកលុយទុកធ្វើអ្វីផ្សេងៗវិញ » ។
អគ្គនាយកផ្នែកបច្ចេកទេសយានយន្តនៃក្រុមហ៊ុន RMA Asia លោក សេង វឹង បានទទួលស្គាល់ថា ការទិញរថយន្តបង់រំលស់ពិតជាកើនឡើង ប៉ុន្តែកំណើននៅមិនទាន់ខ្ពស់នៅឡើយ ដោយសារអត្រាការប្រាក់នៅស្រុកយើងនៅតែមានកម្រិតខ្ពស់ ធៀបនឹងប្រទេសរបស់គេ ។ ការទិញបង់រំលស់ជាជម្រើសមួយល្អ ព្រោះពួកគេចង់ជិះរថយន្ត មិនចាំបាច់យកលុយទាំងអស់មកទិញ ។
លោកបន្តថា ៖« អ្នកខ្លះទៀត គេចង់ទុកលុយធ្វើអាជីវកម្ម និងពង្រីកអាជីវកម្មរបស់គេ ហេតុនេះ ពួកគេសុខចិត្តបង់បន្តិចៗប្រចាំខែ ហើយទុកលុយពួកគេឲ្យកើតកូនចំណេញជាង»។
នាយកផ្នែកទីផ្សារ និងលក់នៃក្រុមហ៊ុនតូយ៉ូតា ខេមបូឌា លោក លី ប៊ុនហៃ បានមានប្រសាសន៍ស្រដៀងគ្នាថា ការលក់រថយន្តកាលពីឆ្នាំមុនមានសញ្ញាល្អប្រសើរ ធៀបនឹងឆ្នាំ២០១៦ ដោយក្រុមហ៊ុនសម្រេចបានកំណើនលក់ចន្លោះពី២០ទៅ៣០% ។ លោកបន្តថា សម្រាប់ឆ្នាំ២០១៨នេះ លោកនៅតែមានសុទិដ្ឋិនិយម ដោយសារសេដ្ឋកិច្ច និងប្រាក់ចំណូលរបស់ប្រជាពលរដ្ឋនៅតែរក្សាបានកំណើនល្អប្រសើរ គួបផ្សំនឹងលក្ខខណ្ឌនៃការផ្ដល់កម្ចីមានភាពងាយស្រួល។ ចំណែក ស្ថានភាពនយោបាយគ្មានអ្វីគួរឲ្យចាប់អារម្មណ៍ទេ ។
លោកថា ៖« ឆ្នាំ២០១៨ ខ្ញុំគិតថា អ្វីៗនឹងប្រសើរឡើង ព្រោះយើងអ្នករកស៊ី មិនសូវគិតពីបញ្ហានយោបាយទេ យើងគិតពីសេដ្ឋកិច្ច បើសេដ្ឋកិច្ចល្អ យើងនៅតែបន្តរីកចម្រើន »។
លោកបន្តថា ៖« ការលក់រថយន្តកើនឡើងមួយផ្នែក ដោយសារប្រជាពលរដ្ឋបានទិញរថយន្តបង់រំលស់កាន់តែច្រើន ព្រោះពួកគេគិតពីការដាំលុយ ។ ដូច្នេះ ពួកគេមិនយកលុយទាំងដុំទៅទិញរថយន្តទេ ពួកគេទុកលុយរកស៊ី វាជាការដាំលុយ ឬធ្វើឲ្យលុយកើតកូន » ។
ប្រធាននាយកប្រតិបត្តិធនាគារអេស៊ីលីដា ភីអិលស៊ី លោកបណ្ឌិត អ៊ិន ចាន់នី បានថ្លែងថា ឥណទានសម្រាប់ប្រើប្រាស់ពិតជាបានកើនឡើងនៅកម្ពុជា ប៉ុន្តែមិនទាន់ឈានដល់កម្រិតគួរឲ្យព្រួយបារម្ភនៅឡើយទេ ដោយសារនៅមានកម្រិតទាបនៅឡើយ ។
លោកបន្តថា ឥណទានបែបនេះ បើកើនឡើងខ្ពស់ពេក មានហានិភ័យដល់សេដ្ឋកិច្ច ព្រោះឥណទានបែបនេះមិនបានជួយជំរុញការផលិត បង្កើតការងារ ដើម្បីជំរុញដល់កំណើនសេដ្ឋកិច្ចទេ ។
លោកបន្តថា ៖« ឥណទានទិញរថយន្ត ឬរបស់ប្រើប្រាស់ដទៃទៀត មិនបានជួយបង្កើនផលិតភាពសេដ្ឋកិច្ចទេ ការទិញរថយន្ត ឬរបស់ប្រើប្រាស់មានតែខាត » ៕
ចែករំលែកព័តមាននេះ