ខេត្តកំពង់ឆ្នាំង ៖ លោក កែវ ពៅ អនុប្រធានគណៈកម្មការសុវត្ថិភាពចរាចរណ៍ផ្លូវគោក និងជាប្រធានមន្ទីរសាធារណការ និងដឹកជញ្ជូន ខេត្តកំពង់ឆ្នាំង បានអំពាវនាវដល់ប្រជាពលរដ្ឋ មន្ត្រីរាជការទាំងអស់ សូមគោរពច្បាប់ចរាចរណ៍ទាំងអស់គ្នា ដើម្បីការពារអាយុ ជីវិតខ្លួនយើង និងក្រុមគ្រួសារ។ សេចក្តីអំពាវនាវនេះបានធ្វើឡើង ក្នុងការចុះពង្រឹងច្បាប់ចរាចរណ៍ផ្លូវគោក និងចែកមួកសុវត្ថិភាពដល់ប្រជាពលរដ្ឋនៅមុខផ្សារពង្រ ក្នុងភូមិពង្រ ឃុំពង្រ ស្រុករលាប្អៀរ។ លោក បានបញ្ជាក់ថា ការចុះពង្រឹងសុវត្ថិភាពចរាចរណ៍ផ្លូវគោកនៅទីនេះគឺ ទី១ ដើម្បីចូលរួមអបអរសាទរ ព្រះរាជពិធី បុណ្យចម្រើនព្រះជន្ម ព្រះករុណាព្រះបាទសម្ដេចនរោត្តមសីហមុនី ព្រះជន្ម៦៥ព្រះវស្សា យាងចូល៦៦ព្រះវស្សា និងទី២គឺ ដើម្បីផ្សព្វផ្សាយច្បាប់ចរាចរណ៍ឲ្យបងប្អូនយល់កាន់តែច្បាស់ ពីស្លាកសញ្ញាចរាចរណ៍ ដោយឲ្យបងប្អូនប្រជាពលរដ្ឋឆើ្លយនូវសំណួរ៣សំណួរ ដើម្បីទទួលបានមួកសុវត្ថិភាព១ ដោយឥតគិតថ្លៃ ជាជាងកាលលើកមុន ផាកពិន័យ១៥.០០០រៀល ហើយឲ្យមួកនោះទេ។
ជីវិតមនុស្សយើងមានតម្លៃខ្លាំងណាស់ មិនមែនដាក់លក់តាមទីផ្សារនោះទេ ហេតុនេះហើយសូមបងប្អូនចូលរួមគោរពច្បាប់ចរាចរណ៍ទាំងអស់គ្នាដោយអ្នកជិះម៉ូតូត្រូវតែពាក់មួកសុវត្ថិភាព ចំណែកបើកបររយន្តត្រូវតែដាក់ខ្សែក្រវាត់ និងត្រូវប្រកាន់ស្ដាំជានិច្ច។ កំណើននៃការធ្វើចរាចរណ៍ នៅលើដងផ្លូវកាន់តែច្រើនឡើង ពីមួយថ្ងៃទៅមួយថ្ងៃ ហេតុនេះកត្តា គ្រោះថ្នាក់ចរាចរណ៍នៅតែជាបញ្ហា ប្រឈមបំផុត ហេតុនេះសូមបងប្អូនធ្វើដំណើរតាមដងផ្លូវត្រូវមានការប្រុងប្រយត្ន័ឲ្យបានខ្ពស់។
ម្យ៉ាងវិញទៀត នៅពេលបើកបរ សូមប្រកាន់ខ្ជាប់នូវក្រមសីលធម៌ដូចជា ចេះយោគយល់អធ្យាស្រ័យគ្នាទៅវិញទៅមក មិនត្រូវបើកបរក្រោមឥទ្ធិពលជាតិស្រវឹង មិនត្រូវបើកបរដោយការប្រើប្រាស់គ្រឿងញៀន និងមិនត្រូវបើកបរក្នុងស្ថានភាពងោកងុយជាដើម។ តាមការបញ្ជាក់ពីលោកប្រធានមន្ទីរសាធារណៈការ និងដឹកជញ្ជូនខេត្តកំពង់ឆ្នាំង បានបញ្ជាក់ថា ក្នុងថ្ងៃចុះពង្រឹងច្បាប់ចរាចណ៍នៅចំណុចមុខផ្សារពង្រ គឺបានចែកមួកសុវត្ថិភាព ដល់ប្រជាពលរដ្ឋ ចំនួន៥០មួក ហើយនេះក៏ជាការអនុវត្តពង្រឹងសុវត្ថិភាពលើកទី១១ផងដែរ បន្ទាប់ពីលើកទី១០ ធ្វើនៅចំណុចចំណតបេនរថយន្តផ្សារលើខេត្តកំពង់ឆ្នាំង ដោយបានចែកមួកចំនួន៦៨៕
ចែករំលែកព័តមាននេះ