ខេត្តកណ្តាល ៖ នៅល្ងាចថ្ងៃទី១៦ ខែឧសភា ឆ្នាំ២០១៨ អ្នកស្រី ពេជ្រ ម៉ារ៉ែន ចៅក្រមស៊ើបសួរសាលាដំបូងខេត្តកណ្តាល បានសម្រេចចេញដីកាឃុំខ្លួនចោរលួចរថយន្តពីនាក់នៅស្រុកកណ្តាលស្ទឹងដាក់ពន្ធនាគារ
បណ្តោះអាសន្នពីបទ «លួចមានស្ថានទម្ងន់ទោស» ដែលប្រព្រឹត្តនៅភូមិតាកុច ឃុំដើមឬស ស្រុកកណ្តាលស្ទឹង ខេត្តកណ្តាល កាលពីថ្ងៃទី១៤ ខែឧសភា ឆ្នាំ២០១៨ តាមមាត្រា៣៥៣ និងមាត្រា៣៥៧ នៃក្រមព្រហ្មទណ្ឌ។ បទល្មើសនេះត្រូវកំណត់ផ្តន្ទាទោសពីបី(៣)ឆ្នាំ ទៅដប់(១០)ឆ្នាំ។
ជនត្រូវចោទទី១-ឈ្មោះរិទ្ធ ធារ៉ា ភេទប្រុស អាយុ៣៩ឆ្នាំ មានទីលំនៅផ្ទះជួលក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ និងទី២-ឈ្មោះ រ៉ា ប៊ុនរិទ្ធ ភេទប្រុស អាយុ៣៧ឆ្នាំ មានទីលំនៅផ្ទះជួលក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។
ចំណែកម្ចាស់រថយន្តឈ្មោះវណ្ណ សុភក្ត័ ភេទប្រុស អាយុ ៣១ឆ្នាំ រស់នៅភូមិឃុំកើតហេតុ មុខរបរបុគ្គលិកក្រុមហ៊ុន ។
សូមបញ្ជាក់ថា កាលពីវេលាម៉ោង៦យប់ថ្ងៃទី១៣ ខែឧសភា ឆ្នាំ២០១៨ ម្ចាស់រថយន្តបានទុករថយន្តនៅខាងមុខផ្ទះ រួចក៏ទៅខេត្តព្រៃវែង ជិះរថយន្តផ្សេង លុះដល់វេលាកើតហេតុបងប្អូនម្ចាស់រថយន្តបានទូរសព្ទ័ប្រាប់ថា រថយន្តបងបាត់ហើយ ពេលនោះម្ចាស់រថយន្តបានទូរសព្ទ័ទៅក្រុមហ៊ុនឆែកGPSមើល ឃើញរថយន្តនៅរង្វង់មូលស្រុកស្វាយអន្ទរ ខេត្តព្រៃវែង រួចម្ចាស់រថយន្តបានប្តឹងសមត្ថកិច្ទនៅទីនោះឃាត់រថយន្ត និងឃាត់ជនសង្ស័យបានចំនួន២នាក់ខាងលើ នៅចំណុចផ្ទះលក់បាយមួយកន្លែង ស្ថិតក្នុងភូមិស្វាយអន្ទរ ឃុំស្វាយអន្ទរ ស្រុកស្វាយអន្ទរ ខេត្ដព្រៃវែង ។
វត្ថុតាងរួមមានរថយន្ដពណ៌ស្ករ ពាក់ស្លាកលេខ កំពង់ឆ្នាំង ២A-១០៣០ (ក្លែងក្លាយ) មួយគ្រឿង សោរអក្សអិល ដែកចុងស្រួចសម្រាប់កាច់សោរថយន្ដមួយ ទូរស័ព្ទណូគាអិនចុចពិលចំនួន២គ្រឿង នាឡិកាពណ៌ខ្មៅ មួយគ្រឿង ចិញ្ចៀនលោហៈធាតុពណ៌លឿងមួយ ៕
ចែករំលែកព័តមាននេះ