ខេត្តកំពង់ឆ្នាំង ៖ លោក ឃួន សៅរុំ អភិបាលស្រុកបរិបូណ៌នៅព្រឹកថ្ងៃទី១៦ ខែឧសភា ឆ្នាំ២០១៨ បាននាំយកថវិកាដែលជាអំណោយរបស់សប្បុរជនចំនួន៦៤ ម៉ឺនរៀលទៅប្រគល់ជូនស្ត្រីឈឺពោះសម្រាលកូន តែគ្មានប្រាក់ចំនួន១០ម៉ឺនរៀលបង់ថ្លៃរថយន្តមណ្ឌលសុខភាព ស្រុកបរិបូរណ៌ ហើយបានជិះម៉ូតូតុតុ មកមន្ទីរពេទ្យខេត្តកំពង់ឆ្នាំងដោយខ្លួនឯង ។
នៅក្នុងមន្ទីរពេទ្យបង្អែកខេត្តកំពង់ឆ្នាំងលោកអភិបាលស្រុកបរិបូរណ៌បានបញ្ជាក់ថា បន្ទាប់ពីមានការផ្សព្វផ្សាយតាមសារព័ត៌មាន និងបណ្តាញសង្គមស្តីពីស្ត្រីដែលត្រូវឆ្លងទន្លេគ្មានប្រាក់បង់ថ្លៃរថយន្តរបស់មណ្ឌលសុខភាពស្រុកបរិបូណ៌រួចមក ក៏មានសប្បុរសជនជាច្រើនបានផ្តល់ប្រាក់ឧបត្ថមដល់ស្ត្រីរូបនោះ តាមរយៈរូបលោកផ្ទាល់ មានចំនួន៦៤ម៉ឺនរៀល ដែលបានមកពីសប្បុរជនមាន ៖ ឯកឧត្តម ឧកញ៉ា កុយ សុវណ្ណ ក្រុមការងារថ្នាក់កណ្តាល គណៈបក្សប្រជាជន ចុះជួយស្រុកកំពង់ត្រឡាច ចំនួន១០ម៉ឺនរៀល , រូបលោកផ្ទាល់ (ឃួន សៅរុំ ) ចំនួន១៥ម៉ឺនរៀល ,លោក សួង ប៊ុនសុង៥ម៉ឺនរៀល , លោក គីរី ពេជ្រ ៥ម៉ឺនរៀល ,វិទ្យុFM ខេត្តបាត់ដំបង៤ម៉ឺនរៀល លោក អ៊ុក សារុន អភិបាលរងស្រុកបរិបូរណ៌៤ម៉ឺនរៀល លោកសាំង គិមស៊ន មេឃុំឆ្នុកទ្រូ១០ម៉ឺនរៀល និងស្នាក់ការគណៈបក្ស ប្រជាជនស្រុកបរិបូរណ៌ ៥ម៉ឺនរៀល ។
ក្នុងនាមលោកជាអាជ្ញាធរស្រុកបរិបូរណ៌ជំនួសមុខឲ្យស្ត្រីឈឺពោះសម្រាលកូន សូមថ្លែងអំណរគុណចំពោះសប្បុរជនទាំងអស់ដែលមានទឹកចិត្តឈឺឆ្អាលជួយក្នុងគ្រាលំបាកនេះ ។
បញ្ជាក់ដែរថា នៅល្ងាចថ្ងៃទី១៥ ខែឧសភានេះ លោកផែង វណ្ណៈ តាមរយៈលោកឈុន ហាក់នៅខេត្តកំពង់ឆ្នាំងបានឧបត្ថមស្ត្រីខាងលើចំនួន២០ម៉ឺនរៀលផងដែរ ។
សូមរំឮកថា ស្ត្រីខាងលើឈ្មោះ ហឹម គិមឈីម អាយុ២២ឆ្នាំ មានទីលំនៅចំណុចកោះមនោ ភូមិឆ្នុកទ្រូ ឃុំឆ្នុកទ្រូ ស្រុកបរិបូណ៌ ។ ចំណែកបុរសជាប្តីឈ្មោះ ម៉ក់ តាក់ អាយុ២៦ឆ្នាំ ។ នៅពេលនាងឈឺពោះ បុរសជាប្តីបានយកនាងទៅមណ្ឌលសុខភាពស្រុកបរិបូរណ៌ ដើម្បីសម្រាលកូន កាលពីរសៀលថ្ងៃទី១៤ ខែឧសភា ឆ្នាំ២០១៨ ។ មកដល់មន្ទីរពេទ្យ ក្រោយពេលពិនិត្យពោះស្ត្រីនោះហើយ គ្រូពេទ្យប្រាប់ថា ស្បូននាងទើបបើកបាន២កាំទេ ហើយទឹកភ្លោះតិចដែលទាមទារទៅសម្រាលកូននៅមន្ទីរពេទ្យខេត្តកំពង់ឆ្នាំង ដោយគ្រូពេទ្យប្រាប់ថា បើយករថយន្តមណ្ឌលសុខភាពត្រូវបង់សេវ៉ា១០ម៉ឺនរៀល តែបើគ្មានលុយទេ កាក់ឡានតាមផ្លូវជិះ ទៅថោកត្រឹមតែ៥ពាន់ ទៅ១ម៉ឺនរៀលជិះបានហើយ ។ (នេះជាការអះអាងរបស់ប្តីប្រពន្ធទាំងពីរនាក់ខាងលើ ) ពួកគាត់បានបន្តថា ក្រោយមកពួកគាត់មកហៅឡានជិះតែមិនបាន ហើយណាឈឺពោះខ្លាំងផងក៏ជួលម៉ូតូតុតុជិះ ក្នុងតម្លៃ៤ម៉ឺនរៀល ។
ប៉ុន្តែពេលជិះដល់ស្ពានសាបអង្កាមដែលមានចម្ងាយជាង១០គីឡូម៉ែត្រពីមណ្ឌលសុខភាព ស្រុកបរិបូរណ៌ ស្រាប់តែឃើញរថយន្តរបស់មណ្ឌលសុខភាពស្រុកបរិបូរណ៌បានមកទាន់ ហើយបានដឹកពួកគាត់បន្តមកមន្ទីរពេទ្យខេត្តកំពង់ឆ្នាំង ។ ពួកគាត់បញ្ជាក់ថា ពេលតាមទាន់ម៉ូតូតុតុ គ្រូពេទ្យបានបន្ទោសថា «បើអត់លុយម៉េចមិនប្រាប់គេ» ។
ចំពោះមូលហេតុដែលរថយន្តរបស់មណ្ឌលសុខភាពស្រុកបរិបូរណ៌ ដេញតាមដឹកស្ត្រីឈឺពោះឆ្លងទន្លេខាងលើ គឺបន្ទាប់ពីមានការអន្តរាគមន៍របស់លោក ឃួន សៅរុំ អភិបាលស្រុកបរិបូរណ៌ បន្ទាប់ពីមានសេចក្តីរាយ ការណ៍ពីប្រជាពលរដ្ឋពីបាតភាពអាក្រក់នេះ ។ (នេះជាការបញ្ជាក់របស់លោកឃួន សៅរុំ អភិបាលស្រុកបរិបូរណ៌)ដោយផ្ទាល់ ។
យ៉ាងនេះក្តីដោយមានការយកចិត្តទុកដាក់ពីក្រុមគ្រូពេទ្យខេត្តស្ត្រីរូបនោះបានសម្រាលកូន ដោយសុវត្ថិភាព នៅវេលាម៉ោង៩យប់ថ្ងៃទី១៤ ខែឧសភា ឆ្នាំ២០១៨ ជាកូនប្រុសមានទម្ងន់៣,៨គីឡូក្រាម គឺជាកូនទី២ ។
សូមបញ្ជាក់ថា ជុំវិញករណីនេះប្រធានមណ្ឌលសុខភាពស្រុកបរិបូរណ៌លោក ឈុន ប៊ុនថា មិនអាចធ្វើការទំនាក់ទំនងបានទាល់តែសោះ ៕
ចែករំលែកព័តមាននេះ