ខេត្តសៀមរាប ៖ កម្លាំងការិយាល័យបទល្មើសព្រហ្មទណ្ឌកងរាជអាវុធហត្ថខេត្តសៀមរាបដឹកនាំដោយលោកវរសេនីយ៍ត្រី អ៊ុយ ចយ នាយការិយាល័យបទល្មើសព្រហ្មទណ្ឌសហការជាមួយកងរាជអាវុធហត្ថរាជធានីភ្នំពេញ និងអាវុធហត្ថខណ្ឌមានជ័យបានឃាត់ខ្លួនជនសង្ស័យចំនួន៣នាក់ ដែលជាប់ពាក់ព័ន្ធនឹងករណី អំពើលួចកាច់សោរ.កម៉ូតូដែលពួកគេបានធ្វើសកម្មភាពលួចក្នុងទីរួមខេត្តសៀមរាប កាលពីថ្ងៃទី១២ ខែឧសភា ឆ្នាំ២០១៨ ដោយឃាត់ខ្លួនជនសង្ស័យជាបន្តបន្ទាប់ចំនួន៣នាក់នៅចំណុចភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប រួចយកមកសួរនាំនៅការនិយាល័យជំនាញរួចបន្តយកទៅនៅភ្នំពេញចំនួន២នាក់ទៀត ។
ប្រភពបានប្រាប់ថា ជនសង្ស័យដែលចាប់ខ្លួនទាំង៣នាក់មុនគេនោះមាន ទី១-ឈ្មោះ ម៉េង ពិសិទ្ធ ភេទប្រុស អាយុ២៣ឆ្នាំ មុខរបរមិនពិតប្រាកដ ទីកន្លែងកំណើតសង្កាត់ចាក់អង្រេ ខណ្ឌចំការមន រាជធានីភ្នំពេញ ទីលំនៅបច្ចុប្បន្នមិនពិតប្រាកដ, ទី២-ឈ្មោះ សាក់ សិទ្ធ ភេទប្រុស អាយុ១៩ឆ្នាំ មុខរបរជាងអគ្គីសនី ទីលំនៅបច្ចុប្បន្នផ្ទះ៣០៩ ផ្លូវលំ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ និងទី៣-ឈ្មោះ សុខ បញ្ញា ភេទប្រុស អាយុ២៤ឆ្នាំ មុខរបរមិនពិតប្រាកដ ទីលំនៅបច្ចុប្បន្ន ភូមិព្រែកទល់ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ក្នុងនោះដកហូតបានវត្ថុតាងមាន ស្លាកលេខចំនួន១១បន្ទះ, ម៉ូតូចំនួន២គ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៨ ពណ៌ខ្មៅ លេខតួម៉ាស៊ីន 5237632 (ពាក់ស្លាកលេខក្លែងក្លាយ ព្រៃវែង ១L-៦៥៥៨) និងម៉ាកហុងដា Zoomer-X ពណ៌ក្រហមលាយខ្មៅ ស៊េរីឆ្នាំ២០១៧ លេខលេខម៉ាស៊ីន 5118483 (ពាក់ស្លាកលេខក្លែងក្លាយ ភ្នំពេញ ១GY-១២៧៩) និងសម្ភារៈកាច់សោរ.កមួយចំនួនធំ ។
រហូតដល់ម៉ោង១និង០០នាទីរសៀល ថ្ងៃទី១២ ខែឧសភា កម្លាំងប៉េអឹមខេត្តបានសហការជាមួយប៉េអឹមរាជធានីភ្នំពេញសហការជាមួយប៉េអឹមខណ្ឌមានជ័យឃាត់ខ្លួនបានជនសង្ស័យម្នាក់ទៀតឈ្មោះ គឹម ណាយ៉ា ភេទប្រុស អាយុ៤៩ឆ្នាំ មុខរបរព្រូឡាន រស់នៅភូមិចាន់សង្កាត់កោះកុង ក្រុងកោះកុងខេត្ត កោះកុង ឃាត់បាននៅចំណុចមុខពេទ្យរុស្សី ផ្លូវ២៧១ សង្កាត់ទំនប់ទឹក ខណ្ឌមានជ័យ រាជធានីភ្នំពេញ ដកហូតបានម៉ូតូម៉ាកស្គូបពី ពណ៍ស ស៊េរីឆ្នាំ២០១៣ ផ្លាកលេខ ភ្នំពេញ ១G-៩៥៨៩ ។ រហូតដល់រសៀល ថ្ងៃទី១៣ ខែឧសភា ឆ្នាំ២០១៨ កម្លាំងប៉េអឹមខេត្តសៀមរាបបានសហការជាមួយកម្លាំងប៉េអឹមរាជធានី និងប៉េអឹមខណ្ឌសែនសុខ ចុះទៅនៅចំណុចវត្តខ្មួញភូមិខ្មួញ សង្កាត់ខ្មួញ ខណ្ឌសែនសុខ រាជធានីភ្នំពេញ ឈានដល់ធ្វើការឃាត់ខ្លួនជនដង្ស័យម្មាក់ទៀតឈ្មោះ សំ រស្មី ភេទប្រុស អាយុ២៧ឆ្នាំ រស់នៅផ្ទៈជួល ភូមិ2 សង្កាត់ខ្មួញ ខណ្ឌសែនសុខ រាជធានីភ្នំពេញ ហើយបានដកហូតតាងមួយចំនួនទៀត ។
ប្រភពបានបញ្ជាក់ថា នៅវេលាម៉ោង០១និង០០នាទីរសៀល ថ្ងៃទី១៤ ខែឧសភា ដោយមានការសម្របសម្រួលពីលោក ជីវ ចាន់តារា ព្រះរាជអាជ្ញាអមសាលាដំបូងខេត្តតាកែវបានចុះទៅដល់លំនៅដ្ឋានរបស់លោក ណៃ ប៊ុនថន ភេទប្រុស អាយុ៤៩ឆ្នាំ មុខរបរលក់ម៉ូតូ, រថយន្ត (គេចខ្លួន) និងប្រពន្ធឈ្មោះ គៀន សុលេខ ទីលំនៅបច្ចុប្បន្ន ភូមិព្រៃជ័រ ឃុំខ្វាវ ស្រុកសំរោង ខេត្តតាកែវ ។ ដោយមានការអនុញ្ញាតពីម្ចាស់ផ្ទះទើបកម្លាំងជំនាញបានធ្វើការឆែកឆេរក្នុងនោះរកឃើញវត្ថុតាងជាច្រើនបន្ថែមទៀត ។ បច្ចុប្បន្នកម្លាំងជំនាញកំពុងកសាងសំណុំរឿងបញ្ជូនជនសង្ស័យ និងវត្ថុតាងទៅសាលាដំបូងខេត្តសៀមរាបដើម្បីចាត់ការទៅតាមផ្លូវច្បាប់ ៕
ចែករំលែកព័តមាននេះ