រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា នៅឆ្នាំ២០១៩ ប្រជាពលរដ្ឋរាប់ពាន់គ្រួសាររស់នៅតំបន់ជាយក្រុង ស្ថិតក្នុងសង្កាត់ភ្លើងឆេះរទេះ ខណ្ឌពោធិ៍សែនជ័យ នឹងមានប្រព័ន្ធទឹកស្អាតរបស់រដ្ឋប្រើប្រាស់ ខណៈបច្ចុប្បន្ននេះ កំពុងពន្លឿនប្រព័ន្ធតភ្ជាប់ ។
លោក ឃួង ស្រេង អភិបាលរាជធានីភ្នំពេញ បានអះអាងនៅចំពោះមុខប្រជាពលរដ្ឋកាលពីថ្ងៃទី១០ ឧសភា កន្លងមកថា តាមគម្រោងរបស់រដ្ឋាករទឹកស្វយ័តក្រុងភ្នំពេញ សង្កាត់ភ្លើងឆេះរទេះ ខណ្ឌពោធិ៍សែនជ័យនេះ នឹងតបណ្តាញទឹកស្អាតជូនប្រជាពលរដ្ឋប្រើប្រាស់នៅឆ្នាំ២០១៩នេះ ប៉ុន្តែដើម្បីដោះស្រាយជូនប្រជាពលរដ្ឋបានប្រើប្រាស់ទឹកជាបណ្តោះអាសន្ន រដ្ឋបាលរាជធានីភ្នំពេញបាន សម្រេចទិញទឹកពីរដ្ឋាករទឹក ដោយប្រើប្រាស់រថយន្ដទឹកដឹកជញ្ជូនយកទៅលក់បន្តជូនប្រជាពលរដ្ឋដល់មុខផ្ទះតែម្តង គឺលក់ជូនក្នុងតម្លៃ៧០០រៀលក្នុង១ម៉ែត្រគូប ។
លោកបន្តថា ៖« ចំពោះតម្លៃ៧០០រៀលនេះ ជាតម្លៃថោកបំផុតហើយ គឺរដ្ឋបាលរាជធានី បានទិញទឹកពីរដ្ឋាករទឹកក្នុងតម្លៃ៥០០រៀល ។ ចំណែក២០០រៀលទៀតទុកសម្រាប់ផ្តល់ជូនអ្នកបើកបរ និងចែកចាយទឹក ។ រីឯថ្លៃសាំង និងការខូចខាតរថយន្តជាបន្ទុករបស់រដ្ឋបាលរាជធានីភ្នំពេញ » ។
លោកបញ្ជាក់ថា ៖« ប្រជាពលរដ្ឋរស់នៅក្នុងសង្កាត់ភ្លើងឆេះរទេះនេះ មានចំនួន៨ភូមិ ស្មើនឹងរាប់ពាន់គ្រួសារមិនទាន់មានទឹកស្អាតប្រើនៅឡើយទេ ដែលកន្លងមក ពួកគាត់បានប្រើប្រាស់ទឹកអណ្តូងឬទឹកស្រះ ដែលបូម និងចែកចាយដោយផ្នែកឯកជនមានតម្លៃថ្លៃ គឺពិតជាមានការលំបាក និងអាចប៉ះពាល់ដល់សុខភាពទៀតផង ។ ដូចនេះ ក្រុមការងាររាជធានីភ្នំពេញបានចុះមកផ្ទាល់ ដើម្បីពិនិត្យលទ្ធភាព និងជំរុញផែនការតភ្ជាប់បណ្តាញទឹកសម្រាប់ផ្តល់ជូនពួកគាត់ឲ្យបានឆាប់ ប៉ុន្តែជំហានដំបូងនេះត្រូវដោះស្រាយ និងផ្គត់ផ្គង់ទឹកស្អាត តាមរយៈការដឹកជញ្ជូនដោយរថយន្តជាបណ្តោះអាសន្នសិន ក្នុងគោលបំណងកាត់បន្ថយការលំបាក ឬការចំណាយថវិកាច្រើន និងបញ្ហាសុខភាពផងដែរ » ។
យោងតាមរបាយការណ៍របស់រដ្ឋាករទឹកស្វយ័តក្រុងភ្នំពេញបានឲ្យដឹងថា ក្នុងឆ្នាំ២០១៨នេះ ដើម្បីធានាការផ្គត់ផ្គង់ទឹកស្អាតឲ្យស្របតាមតម្រូវការទីផ្សាររបស់ប្រជាពលរដ្ឋនៅតំបន់ សេវាមានស្រាប់ និងតំបន់សេវាថ្មី រដ្ឋាករទឹកក្រុងភ្នំពេញបានគ្រោងផលិត និងផ្គត់ផ្គង់ទឹកស្អាតប្រចាំឆ្នាំចំនួន២០៩.១៣៧.០២០ម៉ែត្រគូប ស្មើជាមធ្យមប្រមាណ៥៧២.៩៦២ម៉ែត្រគូបក្នុង១ថ្ងៃ ។ បរិមាណផលិតទឹកនៅឆ្នាំនេះ មានកំណើនប្រមាណ៧% ធៀបនឹងបរិមាណផលិតឆ្នាំ២០១៧ ។
របាយការណ៍បញ្ជាក់ថា ៖« ផែនការផលិតទឹកស្អាតក្នុងឆ្នាំ២០១៨ មានអត្រា៩៧,១១% ធៀបនឹងសមត្ថភាពផលិតទឹកសរុប ។ អត្រានេះ យើងឃើញថា រោងចក្រទាំង៤ បានខិតខំផលិតអស់ពីសមត្ថភាព ដើម្បីបម្រើប្រជាពលរដ្ឋប្រើប្រាស់ក្នុងជីវភាពប្រចាំថ្ងៃ » ៕
ចែករំលែកព័តមាននេះ