រាជធានីភ្នំពេញ ៖ អ្នកនាងចាន់ តារាគន្ធី ជាតារាចម្រៀងជើងចាស់ដែលបាត់មុខជាយូរ។ ពេលសម្រេចចិត្តងាកមករកការងារសិល្បៈវិញត្រូវអ្នកដឹកនាំកម្មវិធីទូរទស្សន៍មួយចំនួនចាប់អារម្មណ៍ទាក់ទងឲ្យចូលរួមសម្តែងជាបន្តបន្ទាប់ធ្វើឱ្យប្រជាប្រិយភាពចាប់ផ្តើមលូតឡើងវិញ ។ អ្នកនាងចាន់ តារាគន្ធី ភាគច្រើនបង្ហើរសំឡេង…
រាជធានីភ្នំពេញ ៖ អ្នកនាងចាន់ តារាគន្ធី ជាតារាចម្រៀងជើងចាស់ដែលបាត់មុខជាយូរ។ ពេលសម្រេចចិត្តងាកមករកការងារសិល្បៈវិញត្រូវអ្នកដឹកនាំកម្មវិធីទូរទស្សន៍មួយចំនួនចាប់អារម្មណ៍ទាក់ទងឲ្យចូលរួមសម្តែងជាបន្តបន្ទាប់ធ្វើឱ្យប្រជាប្រិយភាពចាប់ផ្តើមលូតឡើងវិញ ។
អ្នកនាងចាន់ តារាគន្ធី ភាគច្រើនបង្ហើរសំឡេង និងកាយវិការតាមរយៈកម្មវិធីតន្ត្រីដូចជា«តន្ត្រីស្រុកស្រែ» និងកម្មវិធី«តន្ត្រីឆ្នាំថ្មីអង្គរសង្ក្រាន្ត» កាលពីបុណ្យចូលឆ្នាំជាដើម ។
បាត់មុខជាយូរដោយសារតែកត្តាគ្រួសារ គឺមានស្វាមី និងកូនស្រី២នាក់ នាងយកពេលរាប់ឆ្នាំមើលថែស្វាមី និងកូន ។ ជាអកុសលស្វាមីនាងទទួលមរណភាពដោយជំងឺ ធ្វើឱ្យបាត់ចន្ទល់គ្រួសារ ទើបតម្រូវឱ្យនាងត្រូវប្រឹងប្រែងដើម្បីគ្រួសារវិញម្តង ។ គ្មានអ្វីក្រៅពីប្រកបអាជីពតាមជំនាញទេទាំងពេលខ្លះបាក់ទឹកចិត្តដែរ តែចេះតែប្រឹងទ្រាំដើម្បី កូនៗ។ ក្នុងស្ថានភាពជីវិតជួបការលំបាកបានអ្នកនាងឈួន សុវណ្ណឆៃ ជួយលើកទឹកចិត្តឱ្យវិលមកច្រៀងវិញ ព្រោះមានសមត្ថភាព មិនអាចទុកចោលបាន ។
ទឹកដមសំឡេងរបស់អ្នកនាងចាន់ តារាគន្ធី មានលក្ខណៈថ្នម ចេះប្រើបច្ចេកទេសល្អ ។
អ្នកនាងចាន់ តារាគន្ធី ជាតារាចម្រៀងដែលធ្លាប់សាងស្នាដៃក្នុងវិថីសិល្បៈតាំងពីអំឡុងឆ្នាំ២០០០ ដោយបានពង្រីកកេរ្តិ៍ឈ្មោះល្បីល្បាញជាមួយក្រុមតារាចម្រៀងជើងចាស់មួយចំនួនទៀត ។ បាត់មុខជិត១០ឆ្នាំតារាចម្រៀងរូបនេះទើបតែវិលមកកាន់ពិភពសិល្បៈវិញ ដោយក្រៅពីដើម្បីជីវភាពគ្រួសារក្នុងចិត្តគិតថា«គ្រាន់តែចង់កំដរភាពរីករាយសាងអ្វីដែលល្អក្នុងវ័យពាក់កណ្តាលជីវិតប៉ុណ្ណោះ »។
អ្នកនាងចាន់ តារាគន្ធី ធ្លាប់លេចធ្លោកាលជំនាន់លោកហ្វៃ សំអាង ដឹកនាំកម្មវិធីកម្សាន្តជាច្រើននៅទូរទស្សន៍ប៉ុស្តិ៍លេខ៣ ។ សម័យនោះមានតារាចម្រៀងជាច្រើនសាងស្នាដៃចម្រៀងទទួលបានប្រជាប្រិយភាពខ្លាំង ហើយក៏មានតារាជាច្រើនចេញទៅរស់នៅអាមេរិក បារាំង អូស្ត្រាលីជាដើម ។
អ្នកនាងចាន់ តារាគន្ធី ឱ្យដឹងថាកាលពីនាងនៅក្មេងច្រើនលេចមុខក្នុងកម្មវិធី «ពិភពតន្ត្រី»របស់ទូរទស្សន៍ប៉ុស្តិ៍លេខ៣ និងប៉ុស្តីលេខ៥ ។ ក្រោយមកមានស្វាមីសាងជីវិតថ្មីក៏ផ្អាកសកម្មភាពមួយចំនួន តែនៅច្រៀងតាមរោងការ តាមហាងដោយមិនទទួលឡើងប៉ុស្តិ៍ទេ ។
អ្នកនាងចាន់ តារាគន្ធី និយាយថា«ពេលនេះត្រឡប់មកច្រៀងពេញមុខឡើងវិញក្រោយពេលដែលនាងខ្ញុំបានកូនស្រី២នាក់ ។ ដំណើរចូលមកកាន់វេទិកាចម្រៀងតាមស្ថានីយទូរទស្សន៍នេះ ព្រោះតែការនឹកនាផង ការចង់រំសាយភាពហ្មងសៅ រំលឹកអតីតកាល ហើយមិនចង់ឱ្យគេភ្លេចមុខឡើយ ។ ពេលនេះមិនស្អាតដូចមុនឡើយ ហើយក៏មិនប្រជែងជាមួយតារារូបណាដែរ ពិសេស ប្អូនៗ មានតែសរសើរដែលអ្នកចម្រៀងសម័យឥឡូវ ពូកែៗ ហើយមានសមត្ថភាពជាការចូលរួមចំណែកលើកមុខមាត់សិល្បៈ ។ ការត្រឡប់មកវិញក៏ព្រោះតែបានមិត្តភក្តិឈួន សុវណ្ណឆៃ ប្រាប់ណែនាំកុំលាក់មុខទៀតខ្លាចគេភ្លេច ទើបគិតថាចង់ជួបសិល្បករជើងថ្មីវិញផង ទើបសម្រេចចូលមកវិញ» ៕
ចែករំលែកព័តមាននេះ