ខេត្តស្ទឹងត្រែង ៖ ហ្វូងរថយន្តសាំងយ៉ុងដឹកឈើជាក្រុមពុំមានលិខិតអនុញ្ញាតដែលតែងតែបង្កគ្រោះថ្នាក់ចរាចរណ៍ដល់ប្រជាពលរដ្ឋជារឿយៗនៅតែបង្កើនសកម្មភាពបន្ត ត្រូវសមត្ថកិច្ច និងជំនាញរដ្ឋបាលព្រៃឈើគ្រាប្រដេញស្ទាក់ ។
ជាក់ស្តែងកាលពីវេលាម៉ោងប្រមាណជាជាង០៧និង០០យប់ ថ្ងៃទី១៥ ខែឧសភាឆ្នាំ២០១៨ កម្លាំងរដ្ឋបាលព្រៃឈើដោយមានការសហការជាមួយកងកម្លាំងប្រដាប់អាវុធទៀតនោះបានចុះទប់ស្កាត់ និងបង្ក្រាប់ចាប់រថយន្តដឹកឈើពុំមានលិខិតអនុញ្ញាតចរាចរណ៍លើកំណាត់ផ្លូវជាតិលេខ៧A ក្នុងគោលដៅឆ្ពោះទៅខេត្តក្រចេះ ។
ស្ថិតក្រោមប្រតិបត្តិការបង្ក្រាប់ចាប់រថយន្តដឹកឈើប្រភេទលេខ២ជាហ្វូងនោះ មន្ត្រីរដ្ឋបាលព្រឈើបានឱ្យដឹងថា ក្រុមឈ្មួញរកស៊ីផ្ទុយនឹងច្បាប់ទាំងនោះបានផ្តុំគ្នាជាក្រុមប្រមូលទិញឈើពីក្រុមអ្នកអារពីព្រៃស្តុកលើរថយន្តសាំងយ៉ុងជាច្រើនរថយន្ត បើកបរជាក្រុមៗមានចេញម្តង៥រថយន្ត និងក្រុមខ្លះទៀតចេញម្តង១០គ្រឿង ឬច្រើន និងតិចជាងនេះក៏មាន ។
មន្ត្រីរដ្ឋបាលព្រៃឈើដដែលបន្ថែមថា ក្រុមទាំងនោះបើកបរក្នុងល្បឿនលឿនមិនគោរពទៅតាមច្បាប់ចរាចរណ៍ខុសពីរថយន្តរបស់ពលរដ្ឋទៃទៀត ដែលគេគោរពច្បាប់ ជាងនេះទៅទៀតពួកគេបានព្យាយាមរារាំងក្រុមសមត្ថកិច្ចគ្រាឃាត់រថយន្តដើម្បីត្រួតពិនិត្យលើច្បាប់ដឹកជញ្ជូន ។
មន្ត្រីដដែលបន្តថា ក្រុមដឹកឈើល្មើសច្បាប់ខាងលើពេលសមត្ថកិច្ចចុះឃាត់ពួកគេបានបើកឡានរត់គេចថែមទាំងទាញឈើទំលាក់ចេញពីរថយន្តក្នុងបំណងបិតផ្លូវមិនឱ្យរថយន្តដទៃទៀតធ្វើចរាចរបានលើដងផ្លូវ ហើយស្ថិតក្នុងហេតុការណ៍ខាងលើ កម្លាំងសហការទប់ស្កាត់ចាប់បានរថយន្តតែមួយគ្រឿងប៉ុណ្ណោះ ក្នុងចំណោមច្រើនគ្រឿង ព្រោះរថយន្តទាំងនោះបើកបិតផ្លូវ និងបើករេពេញផ្លូវបង្កការលំបាកសម្រាប់ប្រតិបត្តិការ ។ ក្រោយការចាប់រថយន្តខាងលើបានមួយគ្រឿងដែលសមត្ថកិច្ចបានបញ្ជូនមករក្សាទុកនៅខណ្ឌរដ្ឋបាលព្រៃឈើដើម្បីចាត់ការតាមច្បាប់ ៕
ចែករំលែកព័តមាននេះ