ខេត្តបន្ទាយមានជ័យ ៖ បុរសជនជាតិចិនហុងកុងម្នាក់ មិនដឹងថាស្លាប់នៅក្នុងបន្ទប់ផ្ទះសំណាក់ តាំងពីពេលណាទេ ទាល់តែជះក្លិនចេញមកក្រៅ ទើបដឹង ។ សមត្ថកិច្ចជំនាញពាក់ព័ន្ធនិងមន្ត្រីមូលដ្ឋានដែលទទួលភារៈទៅពិនិត្យសពបានប្រើប្រាស់គ្រឿងក្រអូបបាញ់តាមផ្លូវនិងមុខបន្ទប់ក្នុងផ្ទះសំណាក់ ព្រមទាំងប្រើកង្ហារ៣ទៅ៤គ្រឿង…
ខេត្តបន្ទាយមានជ័យ ៖ បុរសជនជាតិចិនហុងកុងម្នាក់ មិនដឹងថាស្លាប់នៅក្នុងបន្ទប់ផ្ទះសំណាក់ តាំងពីពេលណាទេ ទាល់តែជះក្លិនចេញមកក្រៅ ទើបដឹង ។ សមត្ថកិច្ចជំនាញពាក់ព័ន្ធនិងមន្ត្រីមូលដ្ឋានដែលទទួលភារៈទៅពិនិត្យសពបានប្រើប្រាស់គ្រឿងក្រអូបបាញ់តាមផ្លូវនិងមុខបន្ទប់ក្នុងផ្ទះសំណាក់ ព្រមទាំងប្រើកង្ហារ៣ទៅ៤គ្រឿង ទើបអាចចូលពិនិត្យសពបាន ព្រោះតែក្លិនស្អុយយ៉ាងខ្លាំង ។ ហេតុការណ៍នេះ កើតឡើងនៅបន្ទប់លេខ១០៩នៃផ្ទះសំណាក់មួយ ក្នុងភូមិក្បាលស្ពាន១សង្កាត់ប៉ោយប៉ែត ក្រុងប៉ោយប៉ែត កាលពីព្រឹកថ្ងៃទី១៤ ខែឧសភា ។ បុរសចិនហុងកុងដែលស្លាប់នេះឈ្មោះ ហ្វុង ឡុង អាយុ៦៦ឆ្នាំ នេះបើតាមកាអះអាងរបស់សមត្ថកិច្ច ។ ជនរងគ្រោះស្លាប់ក្នុងស្ថានភាពដេកផ្កាប់មុខ ហើយដោយបន្ទប់ដាក់គន្លឹះពីខាងក្នុង ម្ល៉ោះហើយទាល់តែម្ចាស់ផ្ទះសំណាក់គាស់និងធាក់បំបាក់គន្លឹះទ្វារទើបចូលទៅខាងក្នុងបាន ។
នៅក្នុងបន្ទប់ សមត្ថកិច្ចរកឃើញមានថ្នាំលេបជាច្រើនលើជំងឺ៣មុខរួមមាន ជំងឺក្រពះលើសឈាម និងទឹកនោមផ្អែម ។ ម្ចាស់ផ្ទះសំណាក់ប្រាប់កោះសន្តិភាពថា ជនរងគ្រោះបានជួលបន្ទប់ខាងលើស្នាក់នៅរយៈពេលជាង១ខែមកហើយ និងភាគច្រើនទៅលេងល្បែងនៅកាស៊ីណូ ។ ម្ចាស់ផ្ទះសំណាក់បន្តថា គាត់មិនឃើញជនរងគ្រោះចេញចូលបន្ទប់តាំងពីថ្ងៃទី១២ ខែឧសភា លុះព្រឹកថ្ងៃទី១៤ ខែឧសភា មានធុំក្លិនស្អុយចេញមកក្រៅទើបដឹងថាស្លាប់ និងរាយការណ៍ជូនសមត្ថកិច្ច ។
អនុលោមតាមបទបញ្ជារបស់ព្រះរាជអាជ្ញាអមសាលាដំបូងខេត្ត សមត្ថកិច្ចជំនាញពាក់ព័ន្ធមកពីស្នងការដ្ឋាននគរបាលខេត្តនិងក្រុងប៉ោយប៉ែត គ្រូពេទ្យជំនាញ សហការជាមួយអាជ្ញាធរមូលដ្ឋាន បានធ្វើការត្រួតពិនិត្យនិងកោសល្យវិច័យសពយ៉ាងល្អិតល្អន់ ។ ជាលទ្ធផលសមត្ថកិច្ចជំនាញប្រាប់ថា ជនរងគ្រោះស្លាប់ដោយសារជំងឺ ព្រោះលើរាយកាយសពពុំមានស្លាកស្នាមប៉ះទង្គិចនឹងអ្វីឡើយ ម្យ៉ាងរកឃើញថ្នាំពេទ្យជាច្រើនដែលជនរងគ្រោះប្រើប្រាស់ ។ មួយវិញទៀត បន្ទប់ជនរងគ្រោះស្នាក់នៅតែម្នាក់ឯង ហើយដាក់គន្លឹះពីខាងក្នុងទៀតផង ។
សមត្ថកិច្ចប្រាប់ថា សពនឹងយកទៅតម្កល់ទុកនៅវត្តបាលិលេយ្យ ក្នុងភូមិក្បាលស្ពាន២ សង្កាត់ប៉ោយប៉ែត រង់ចាំទំនាក់ទំនងរកសាច់ញាតិតាមរយៈមន្ត្រីស្ថានកុងស៊ុល ឬស្ថានទូតចិនប្រចាំនៅកម្ពុជា ៕
ចែករំលែកព័តមាននេះ