ខេត្តឧត្តរមានជ័យ ៖ ក្រុមគ្រួសារមួយដែលមានឪពុក ម្តាយ និងកូន២នាក់បានស្លាប់ បាត់បង់ជីវិតទាំងអស់ នៅក្នុងគ្រោះថ្នាក់ត្រូវរថយន្តបុក ខណៈកំពុងជិះម៉ូតូឌុបគ្នា កាលពីវេលាម៉ោង១២និង៣០នាទីថ្ងៃត្រង់ថ្ងៃទី១៤ ខែឧសភា…
ខេត្តឧត្តរមានជ័យ ៖ ក្រុមគ្រួសារមួយដែលមានឪពុក ម្តាយ និងកូន២នាក់បានស្លាប់ បាត់បង់ជីវិតទាំងអស់ នៅក្នុងគ្រោះថ្នាក់ត្រូវរថយន្តបុក ខណៈកំពុងជិះម៉ូតូឌុបគ្នា កាលពីវេលាម៉ោង១២និង៣០នាទីថ្ងៃត្រង់ថ្ងៃទី១៤ ខែឧសភា នៅត្រង់ចំណុចផ្លូវកោងគល់ស្ពាន ផ្លូវជាតិលេខ៦៨Bចន្លោះគីឡូម៉ែត្រលេខ៧៩និងលេខ៨០ ស្ថិតក្នុងភូមិកណ្តែក សង្កាត់សំរោង ក្រុងសំរោង ។
ជនរងគ្រោះមួយគ្រួសារនេះ មិនទាន់ត្រូវបានគេស្គាល់អត្តសញ្ញាណនៅឡើយទេ ជិះម៉ូតូហុងដាឌ្រីម សេ១២៥ ស៊េរីឆ្នាំ២០១៨ ពណ៌ខ្មៅ ពាក់ផ្លាកលេខ ឧត្តរមានជ័យ ១D-៥២០២ ធ្វើដំណើរពីខាងលិចទៅខាងកើត ។ ចំណែករថយន្តម៉ាកកាមរីបាឡែន ពណ៌ខ្មៅ ពាក់ផ្លាកលេខ ភ្នំពេញ ២K-៦៤៦២ អ្នកបើកបរឈ្មោះ ស្រុីម វី ភេទប្រុស អាយុ៣១ឆ្នាំ រស់នៅក្នុងភូមិព្រែកយួន ឃុំកៀនជ្រៃ ស្រុកកំពង់សៀម ខេត្តកំពង់ចាម ធ្វើដំណើរក្នុងទិសដៅបញ្ច្រាសគ្នា ។តាមអ្នកឃើញហេតុការណ៍និយាយថា ជនរងគ្រោះដែលជាឪពុក ម្តាយ និងកូនទាំង២នាក់ ជិះម៉ូតូនៅខាងស្តាំដៃរបស់ខ្លួន លុះទៅដល់ចំណុចគល់ស្ពានដែលជាផ្លូវកោង ស្រាប់តែរថយន្តខាងលើដែលបើកបរក្នុងល្បឿនលឿន បានជ្រុលមកបុកម៉ូតូពេញទំហឹងបណ្តាលឲ្យស្លាប់ទាំង៤នាក់តែម្តង ។
មន្ត្រីការិយាល័យនគរបាលចរាចរណ៍ខេត្តបានឲ្យដឹងថា ក្រោយកើតហេតុសមត្ថកិច្ចបានចុះទៅដល់ធ្វើការវាស់វែង និងស្វែងរកសាច់ញាតិនិងអត្តសញ្ញាណជនរងគ្រោះ ព្រមទាំងឃាត់ខ្លួនអ្នកបើកបររថយន្តនាំមកស្នងការដ្ឋាននគរបាលខេត្ត ។ រីឯម៉ូតូនិងរថយន្ត សមត្ថកិច្ចយកទៅរក្សាទុកនៅស្នងការដ្ឋាននគរបាលខេត្ត រង់ចាំធ្វើការដោះស្រាយនៅពេលក្រោយ ។ ការបើកបរក្នុងល្បឿនលឿនហួសហេតុ គឺជាកំហុសមួយក្នុងចំណោមកំហុសនៃការបើកបរយានយន្ត ពិសេសកត្តាមនុស្ស ៕
ចែករំលែកព័តមាននេះ