ការប្រកួតបាល់ទាត់ដណ្តើមពានរង្វាន់យូរ៉ូប៉ាលីគ ឆ្នាំ២០១៨ បានឈានមកដល់វគ្គផ្តាច់
ព្រ័ត្រហើយ ។ អ្នកនិយមទស្សនាកីឡាបាល់ទាត់ភាគច្រើនកំពុងតែទន្ទឹងរង់ចាំមើលរវាងក្រុម
Marseille មកពីក្របខ័ណ្ឌបារាំងលីគ១ប៉ះជាមួយក្រុម Atletico មកពីក្របខ័ណ្ឌអេស្ប៉ាញ
La Liga នៅវគ្គផ្ដាច់ព្រ័ត្រនាម៉ោង១និង៤៥នាទីរំលងអធ្រាត្រនេះ មួយណានឹងក្លាយជាអធិរាជលើកពានរង្វាន់ធំលំដាប់ទី២នៅអឺរ៉ុបនេះ ។
នេះគឺជាការបង្ហាញខ្លួននៅវគ្គផ្តាច់ព្រ័ត្រលើកទី៣របស់ក្រុម Marseille ប៉ុន្តែពីរលើកកន្លងមកពួកគេសុទ្ធតែត្រូវក្អួតឈាមដោយប្រកួតចាញ់ក្រុម Parma ឆ្នាំ១៩៩៩ និង Valencia ឆ្នាំ២០០៤ ។
ចំពោះស្ថានភាពបច្ចុប្បន្នវិញ Marseille កំពុងឈរនៅចំណាត់ថ្នាក់លេខ៤ ចាញ់ក្រុមលេខ៣ Lyon ១ពិន្ទុ និងស្ថិតនៅក្រៅកៅអីយូហ្វាឆេមពានលីគរដូវកាលក្រោយ ធ្វើឱ្យពួកគេរឹតតែចង់ឈ្នះពាននេះខ្លាំង ដើម្បីបានលេងនៅយូហ្វាឆេមពានលីគ ។
យ៉ាងណាមិញ Marseille ធ្វើពុំបានល្អឡើយក្នុងជំនួបដណ្តើមពានរង្វាន់ធំលំដាប់ទី១នៅអឺរ៉ុបពេលប៉ះក្រុមផ្សេងៗមកពីអេស្ប៉ាញកន្លងទៅ ដោយ១៥ប្រកួត ឈ្នះតែ៤ប្រកួតប៉ុណ្ណោះ ។
ចំណារប្រវត្តិសាស្ត្របានឱ្យដឹង ពុំមានក្រុមណាមួយនៅបារាំងប្រកួតឈ្នះពានយូរ៉ូប៉ាលីគ និងឆេមពានលីគនៅពហុកីឡដ្ឋាន Lyon ដែលក្រុមទាំង២ត្រូវជួបគ្នានេះទេ ។ Marseille នឹងលេងដោយគ្មានកីឡាករ Rolando និង Kostas Mitroglou ដោយសារតែបញ្ហារបួស ។
Atletico នឹងត្រូវធ្វើដំណើរទៅទឹកដីបារាំងដោយគ្មានគ្រូបង្វឹកលោក Simeone ព្រោះតែជាប់បម្រាម៤ប្រកួតតាំងពីពេលប៉ះ Arsenal កាលពីវគ្គពាក់កណ្តាលផ្តាច់ព្រ័ត្រមកម៉្លេះ ។ វាជាការបង្ហាញខ្លួននៅវគ្គផ្តាច់ព្រ័ត្រលើកទី៣ដូចក្រុម Marseille ផងដែរ ប៉ុន្តែពីរលើកកន្លងមក
Atletico ឈ្នះពានទាំងពីរលើកក្រោយបំបាក់ Fulham កាលពីឆ្នាំ២០១០ និង Bilbao ឆ្នាំ២០១២ ។ ការប្រកួតយប់នេះ Atletico ពុំមានកីឡាករសំខាន់រូបណាអវត្តមាននោះទេ លើកលែងតែ Vitolo ប៉ុណ្ណោះដែលរបួស ។
ជំនួបផ្តាច់ព្រ័ត្រនេះ ថ្វីដ្បិតតែធ្វើលើទឹកដីបារាំង ប៉ុន្តែ Atletico ហាក់មានប្រៀបជាង បើផ្អែកតាមបទពិសោធន៍ប្រកួត និងស្ថានភាពក្រុមនាពេលបច្ចុប្បន្ន ។ នេះបើយោងតាមការចេញផ្សាយរបស់គេហទំព័រទស្សន៍ទាយកីឡា ៕
ចែករំលែកព័តមាននេះ