ខេត្តបន្ទាយមានជ័យ ៖ សពស្ត្រីចំណាស់ម្នាក់ត្រូវបានគេប្រទះឃើញលង់ទឹកស្លាប់ក្នុងស្នាមភ្លោះផ្លូវលំមួយកន្លែង ក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត បង្កឱ្យមានការភ្ញាក់ផ្អើលនៅរសៀលថ្ងៃទី១៥ ឧសភា ឆ្នាំ២០១៨ ។
ស្ត្រីចំណាស់ជនរងគ្រោះឈ្មោះគឹម ហួយ អាយុ៧៣ឆ្នាំ មានទីលំនៅឃុំកកោះ ស្រុកមោងឬស្សី ខេត្តបាត់ដំបង ។
តាមប្រភពពីស្ត្រីឈ្មោះធូ សឿន អាយុ៦៤ឆ្នាំ ដែលរស់នៅក្បែរកន្លែងកើតហេតុបាននិយាយថា ស្ត្រីរងគ្រោះបានធ្វើដំណើរមកពីឃុំកកោះ ស្រុកមោងឬស្សី កាលពីរសៀលថ្ងៃទី១៤ ឧសភា ហើយបានសុំស្នាក់នៅផ្ទះរបស់គាត់មួយយប់ដើម្បីចង់ជួបកូនស្រីដែលធ្វើការនៅឯប្រទេសថៃ។ គាត់បានបន្តទៀតថា កាលពីព្រឹកថ្ងៃទី១៥ ឧសភា ក៏មានបុរសជាកូនប្រសាស្ត្រីរងគ្រោះបានស្កាត់ពីថៃមកចូលផ្ទះគាត់ដូចគ្នា ដោយនិយាយថា គេទៅជួបម្តាយក្មេកនៅឯឃុំកកោះ ស្រុកមោងឬស្សី ខេត្តបាត់ដំបង ដើម្បីយកសៀវភៅ
គ្រួសារធ្វើលិខិតឆ្លងដែន តែការធ្វើដំណើររបស់ម្តាយក្មេក និងកូនប្រសាជ្រួសផ្លូវគ្នា ហើយមិនទាន់បានជួបគ្នាផងម្តាយក្មេកបានលង់ទឹកស្លាប់បាត់ទៅហើយ។
ក្រោយកើតហេតុ សមត្ថកិច្ចជំនាញពាក់ព័ន្ធបានចុះទៅធ្វើកំណត់ហេតុ ហើយខាងអាវុធហត្ថក្រុងប៉ោយប៉ែតក៏បានយករថយន្តដឹកសពទៅតម្កល់នៅវត្តសូរិយារាមហៅវត្តថ្មីដើម្បីរងចាំសាច់ញាតិមកធ្វើបុណ្យតាមប្រពៃណី៕
ចែករំលែកព័តមាននេះ