ខេត្តកំពត ៖ លោក អូន ខន អភិបាលនៃគណៈអភិបាលស្រុក និងជាប្រធានកិត្តិយសអនុសាខាកាកបាទក្រហមកម្ពុជាស្រុកកំពង់ត្រាចនៅរសៀលថ្ងៃទី១៤ ខែឧសភា ឆ្នាំ២០១៨នេះ ព្រមទាំងសហការី…
ខេត្តកំពត ៖ លោក អូន ខន អភិបាលនៃគណៈអភិបាលស្រុក និងជាប្រធានកិត្តិយសអនុសាខាកាកបាទក្រហមកម្ពុជាស្រុកកំពង់ត្រាចនៅរសៀលថ្ងៃទី១៤ ខែឧសភា ឆ្នាំ២០១៨នេះ ព្រមទាំងសហការី និងអាជ្ញាធរមូលដ្ឋាន បានអញ្ជើញចុះសួរសុខទុក្ខប្រជាពលរដ្ឋក្រីក្រគ្មានទីពឹងចំនួន៥គ្រួសារ នៅភូមិឬស្សីស្រុក ឃុំឬស្សីស្រុកខាងកើត ស្រុកកំពង់ត្រាច ខេត្តកំពត ។
ជាមួយនឹងការសួរសុខទុក្ខអនុសាខាកាកបាទក្រហមកម្ពុជាស្រុកកំពង់ត្រាចបាននាំយកនូវសម្ភារ និងថវិកាមួយចំនួនប្រគល់ជូនប្រជាពលរដ្ឋទាំង៥គ្រួសារផងដែរ ។ ការផ្តល់អំណោយជូនដល់ប្រជាពលរដ្ឋនាពេលនេះមានអង្ក ទឹកស៊ីអ៊ីវ ត្រីខកំប៉ុង មី និងថវិកាផងដែរ ។
គ្រួសារក្រីក្រទាំង៥គ្រួសារ មួយគ្រួសារទទួលបានអង្ករ២៥គីឡូក្រាម ទឹកស៊ីអ៊ីវ១យួរ ទឹកត្រី១យួរ ត្រីខកំប៉ុង១យួរ មី១កេះ និងថវិកា៣០.០០០រៀល ។ មានមតិផ្តាំផ្ញើក្នុងឱកាសនោះ លោកអូន ខន ប្រធានកិតិ្តយសអនុសាខាកាកបាទក្រហមកម្ពុជាស្រុកកំពង់ត្រាចក៏បានពាំនាំនូវការសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងតែយកចិត្តទុក្ខដាក់ និងគិតគូរពីសុខទុក្ខរបស់ប្រជាពលរដ្ឋគ្រប់មជ្ឈដ្ឋានទូទាំងប្រទេស ពិសេសសម្តេចតែងតែផ្តល់ក្តីសង្ឃឹមដល់ប្រជាពលរដ្ឋគ្រប់ស្រទាប់ ដោយគ្មានការរើសអើង ឬបែងចែកពូជសាសន៍ ពណ៌សម្បុរ និន្នាការនយោបាយឡើយ ។
លោកអូន ខន គូសបញ្ជាក់យ៉ាងច្បាស់ថា កាកបាទក្រហមកម្ពុជាមានតួនាទីយ៉ាងសំខាន់ក្នុងកាតព្វកិច្ចជួយដល់ជនងាយរងគ្រោះគ្រប់ប្រភេទដូចជា អ្នកជួបបញ្ហាដោយសារគ្រោះធម្មជាតិផ្សេងៗ មានខ្យល់ព្យុះ ខ្យល់កន្ទ្រាក់ ទឹកជំនន់ ចាស់ជរាគ្មានទីពឹង ស្ត្រីម៉េម៉ាយ ក្មេងកំព្រា ជនពិកាជាដើម ហើយទីណាជួបការលំបាក គឺត្រូវតែមានក្រុមការងារកាកបាទក្រហមទៅដល់ទីនោះ ដោយមិនទុកឲ្យអ្នកណាម្នាក់ចោលឡើយ។
ជាចុងក្រោយលោក អូន ខន បានរំលឹកឡើងវិញផងដែរថា ទោះបីអំណោយដែលយកមកចែកជូនដល់បងប្អូននាពេលនេះមិនគ្រប់គ្រាន់តាមតម្រូវការខ្វះខាតរបស់បងប្អូនក៏ពិតមែន ប៉ុន្តែវាអាចជួយរំលែកទុក្ខលំបាកដល់បងប្អូនបានមួយគ្រាផងដែរ ។ លោកបានផ្តាំផ្ញើដល់ប្រជាពលរដ្ឋទាំងអស់ត្រូវចេះថែទាំសុខភាពឱ្យបានល្អ ហើយកុំភ្លេចត្រៀមខ្លួនទៅចូលរួមបោះឆ្នោតនៅថ្ងៃអាទិត្យ ទី២៩ ខែកក្កដា ឆ្នាំ២០១៨ខាងមុខនេះឱ្យបានគ្រប់ៗគ្នា ៕
ចែករំលែកព័តមាននេះ