រាជធានីភ្នំពេញ ៖ នៅរយៈពេល៤ខែដើមឆ្នាំ២០១៨នេះ ការនាំចេញអង្កររបស់កម្ពុជាទៅកាន់បរទេសបានធ្លាក់ចុះស្ទើររាល់ខែ បើធៀបនឹងរយៈពេលដូចគ្នាកាលពីឆ្នាំមុន ។ សម្រាប់នៅខែបន្ទាប់ អ្នកជំនាញមើលឃើញថា ការនាំចេញអង្ករធ្លាក់ចុះអាចនឹងបន្តអូសបន្លាយថែមទៀត ព្រោះម្ចាស់រោងម៉ាស៊ីនទិញប្រភេទស្រូវធម្មតា (អុីអ៊ែ) ពីប្រជាកសិករថយចុះ ។
យោងតាមរបាយការណ៍របស់លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ បង្ហាញថា កាលពីខែមករា ឆ្នាំ២០១៨នេះ កម្ពុជាបាននាំចេញអង្ករទៅបរទេស កើនឡើង២៨% ប៉ុន្តែមកដល់ខែកុម្ភៈ ធ្លាក់ចុះ២៧%, ខែមីនា ធ្លាក់ចុះ១២,៧០% និងខែមេសា ធ្លាក់ចុះ២៦,១០%ផងដែរ ។ លើសពីនេះ ក្នុងរយៈពេល៤ខែកន្លងមក កម្ពុជាបាននាំចេញអង្ករធ្លាក់ចុះ៧,៦០% បើធៀបនឹងឆ្នាំ២០១៧ ។
ទាក់ទងនឹងវិស័យស្រូវអង្ករនេះ តាមអ្នកជំនាញមើលឃើញថា កម្ពុជាបាននាំចេញអង្ករធ្លាក់ចុះចាប់ពីខែកុម្ភៈ រហូតដល់ខែមេសាកន្លងមក ដោយសារកាលពីដើមខែមករា បរិមាណអង្ករដែលកម្ពុជានាំចេញមានចំនួនច្រើនពេកធ្វើឱ្យអស់ស្រូវពីក្នុងស្តុក ខណៈការទិញស្រូវពីប្រជាកសិករបានចំនួនតិចតួច ។
លោកឧកញ៉ា សុង សារ៉ន អគ្គនាយកក្រុមហ៊ុនអេមរុ រាយស៍ បានមានប្រសាសន៍ថា ៖«ការនាំចេញអង្ករបន្តធ្លាក់ចុះនេះ ដោយសារកាលពីដើមឆ្នាំ យើងសម្រុកនាំចេញច្រើនធ្វើឱ្យស្រូវអស់ពីក្នុងស្តុក, វៀតណាមបានចូលមកទិញប្រភេទស្រូវធម្មតា (អុីអ៊ែ) ខ្លាំងក្លា យើងអត់អាចមានស្រូវគ្រប់គ្រាន់ ។ អីចឹង មិនមានអ្វីផ្លាស់ប្តូរទេ ការនាំចេញអង្កររបស់កម្ពុជា នៅខែ៦ នៅតែធ្លាក់ចុះ ។ ប៉ុន្តែអាចនឹងកើនឡើងវិញនៅពេលយើងប្រមូលផលស្រូវសែនក្រអូប នៅខែ៧ ឬខែ៨ខាងមុខ » ។
លោកឧកញ៉ា ភូ ពុយ នាយកក្រុមហ៊ុន បៃតង បានឱ្យដឹងដែរថា ការធ្លាក់ចុះ និងបរិមាណកើនឡើង គឺមានលក្ខណៈប្រែប្រួល ដោយសារការប្រកួតប្រជែងទិញស្រូវអង្ករធម្មតានៅតាមខេត្តជាប់ព្រំប្រទល់ប្រទេសវៀតណាម ប៉ែកខាងកើតប្រទេស ។ លោកឧកញ៉ាមានប្រសាសន៍ថា ៖« បើយើងមានសមត្ថភាពរឹងមាំប្រមូលទិញស្រូវ នឹងធ្វើឱ្យបរិមាណអង្ករនាំចេញកើនឡើង ប៉ុន្តែបើសិនជាបងប្អូននៅខេត្តខាងកើតប្រទេស គាត់ទិញមិនបាននោះ បរិមាណនាំចេញអង្ករអត់កើនឡើងទេ » ។
លោកឧកញ៉ាបន្តថា ៖« ការនាំចេញអង្ករក្រអូបមានការកើនឡើង តែសម្រាប់ការនាំអង្ករធម្មតាធ្លាក់ចុះ ដោយសារស្រូវនៅខេត្តប៉ែកខាងកើត នាំចេញទៅប្រទេសវៀតណាមច្រើន ជាហេតុធ្វើឱ្យម្ចាស់រោងម៉ាស៊ីនប្រមូលទិញស្រូវថយចុះ ទើបការនាំចេញអង្ករធ្លាក់ចុះ ។ នៅត្រីមាសទី២ ការនាំចេញអាចនឹងធ្លាក់ចុះថែមទៀត ហើយមកដល់ខែ៦ ធ្លាក់ចុះខ្លាំងមែនទែន ដោយសារអស់ស្រូវអុីអ៊ែនៅគ្រប់រោងម៉ាស៊ីនសម្រាប់នាំចេញ តែមកដល់ខែ៨ នឹងកើនឡើងវិញ រហូតដល់ខែ១២ » ។
លោកឧកញ៉ាលើកឡើងថា បើចង់ឲ្យការនាំចេញកើនឡើង លុះត្រាតែការនាំចេញអង្ករធម្មតាអាចរក្សាលំនឹងឱ្យបានស្ថិតស្ថេរមួយ ខណៈអង្ករក្រអូបកើនឡើង ។ ប៉ុន្តែនៅក្នុងករណីទីផ្សារល្អ សម្រាប់ម្ចាស់រោងម៉ាស៊ីននៅតាមខេត្តដូចជា កំពង់ចាម ព្រៃវែង និងតាកែវ គាត់មានលទ្ធភាពប្រកួតប្រជែងទិញស្រូវធម្មតាបានច្រើននោះ នឹងធ្វើឲ្យបរិមាណនាំចេញកើនឡើងផងដែរ ។ ប៉ុន្តែបើទីផ្សារហាងឆេងនៅផ្នែកខាងកើតមិនអាចប្រកួតប្រជែងបានទេ វានឹងធ្វើឱ្យបរិមាណធ្លាក់ចុះដដែល ៕
ចែករំលែកព័តមាននេះ