តាមប្រភពព័ត៌មាន Goal បានឲ្យដឹងថា កីឡាករលេចមុខជាងគេក្នុងរដូវកាលនេះនៅក្របខណ្ឌអង់គ្លេស Mohamed Salah បានសារភាពថា ខ្លួនមិនទាន់អាចយកទៅប្រៀបជាមួយនឹងកីឡាករជើងខ្លាំង Lionel Messi និង Cristiano Ronaldo នៅឡើយទេ ។ នេះក៏ព្រោះតែរូបគេត្រូវធ្វើឲ្យល្អបែបនេះទៀតក្នុងរយៈពេលច្រើនឆ្នាំជាប់ៗគ្នា ។
កីឡាករសញ្ជាតិអេហ្ស៊ីបមួយរូបនេះបានធ្វើឲ្យមនុស្សជាច្រើនចាប់អារម្មណ៍ជាមួយនឹងការស៊ុតបញ្ជូលទីបាន៣២គ្រាប់ក្នុងការប្រកួតត្រឹមតែ៣៦ប្រកួតនៅក្នុងការប្រកួត Premier League នៅរដូវកាលនេះឲ្យក្លិបហង្សក្រហម Liverpool ។ ដោយសារតែការលេងឡើងជើងដ៏ល្អរបស់ Salah នេះហើយទើបបានជាមានមហាជនជាច្រើនយករូបគេទៅប្រៀបធៀបជាមួយនឹង Ronaldo និង Messi ។
នៅពេលអ្នកកាសែត Egypt Today សួរពីអារម្មណ៍នៅពេលមានការប្រៀបធៀបបែបនេះ Salah ឆ្លើយថា ខ្លួនមិនប្រកាន់នោះទេ ។ Salah ថា «តែខ្ញុំមិនចង់និយាយថា ខ្ញុំសប្បាយចិត្តនៅពេលគ្រប់គ្នាយកខ្ញុំទៅប្រៀបធៀបបែបនេះ ព្រោះ Ronaldo និង Messi សុទ្ធតែជាកីឡាករខ្លាំងដែលលេងបានស្មើជើងក្នុងរយៈពេល១០ទៅ១១ឆ្នាំមកហើយ ។ ការលេងរបស់ពួកគេគឺមានស្ថេរភាពបានល្អ ។ សម្រាប់ខ្ញុំវិញ គឺត្រូវតែរក្សាការលេងឲ្យល្អដូចនៅរដូវកាលនេះដើម្បីឲ្យដូចពួកគាត់» ៕
ចែករំលែកព័តមាននេះ