រាជធានីភ្នំពេញ ៖ នៅក្នុងសប្ដាហ៍នេះ គេសង្កេតឃើញថា តម្លៃប្រេងសាំងលក់រាយនៅតាមស្ថានីយនានា
ទូទាំងប្រទេសបានកើនឡើងបន្តិច បើធៀបនឹងសប្ដាហ៍មុន ពោលគឺកើនឡើងពី៤.១០០ ទៅ៤.១៥០រៀលក្នុង១លីត្រសម្រាប់សាំងធម្មតា ហើយសាំងស៊ុបពែរក៏បានកើនពី៤.៤០០ ទៅ៤.៤៥០រៀលក្នុង១លីត្រផងដែរ ។
យោងតាមសេចក្តីជូនដំណឹងរបស់ក្រសួងពាណិជ្ជកម្មបានឲ្យដឹងថា តម្លៃសាំងលក់រាយនៅលើទីផ្សារប្រទេសកម្ពុជា តាមស្ថានីយប្រេងឥន្ធនៈនានាបានកើនឡើង៥០រៀលបន្ថែមទៀត សម្រាប់សាំងធម្មតា និងកើន១០០រៀលសម្រាប់ប្រេងម៉ាស៊ូត ។
តាមសេចក្ដីជូនដំណឹងបានឲ្យដឹងដែរថា តម្លៃលក់រាយប្រេងសាំង និងប្រេងម៉ាស៊ូតនេះ គឺអនុវត្តចាប់ពីថ្ងៃទី១២ ដល់ថ្ងៃទី២១ ខែឧសភា ឆ្នាំ២០១៨ ។ ក្នុងសេចក្ដីជូនដំណឹងនេះ គឺតម្រូវឲ្យម្ចាស់ស្ថានីយលក់រាយប្រេងឥន្ធនៈនានាលក់មិនឲ្យលើសពីតម្លៃកំណត់ដោយក្រសួងទេ ។ បើតាមលោក ស៊ាង ថៃ អ្នកនាំពាក្យក្រសួងពាណិជ្ជកម្មបានលើកឡើងថា ការឡើងថ្លៃនៃតម្លៃសាំងលក់រាយនៅលើទីផ្សារ ដោយសារតែក្រុមហ៊ុនប្រេងដ៏ធំដែលកម្ពុជាទិញយកមកប្រើប្រាស់បានឡើងថ្លៃ គាប់ជួននឹងតម្លៃប្រេងសាំងលើទីផ្សារអន្តរជាតិបានកើនឡើងផងដែរ ។ លោកថា ៖« ក្នុងពេលដែលយើងមិនអាចផលិតប្រេងប្រើប្រាស់ខ្លួនឯងបាន យើងមិនអាចកំណត់តម្លៃឲ្យនៅទាបជាងបណ្ដាប្រទេសផលិតបានទេ ដូចនេះ តម្លៃប្រេងសាំងយើង គឺពឹងលើទីផ្សារអន្តរជាតិទាំងស្រុង » ។
លោកបន្តថា ក្រុមហ៊ុនលក់ប្រេងដ៏ធំមកឲ្យកម្ពុជា ដែលមានមូលដ្ឋាននៅប្រទេសសិង្ហបុរី បានផ្ញើតារាងតម្លៃមកយើងស្ទើររៀងរាល់ថ្ងៃពីការប្រែប្រួលតម្លៃនៅលើទីផ្សារ ។ សម្រាប់សប្ដាហ៍នេះឃើញថា តម្លៃប្រេងនៅលើទីផ្សារអន្តរជាតិបានឡើងបន្តិចទៀត ប៉ុន្តែបើសិនជាអត្រាប្តូរប្រាក់ខុសគ្នាច្រើនរវាងប្រាក់ដុល្លារ និងប្រាក់រៀល តម្លៃសាំងក៏ប្រែប្រួលទៅតាមហ្នឹងដែរ ។ ក្នុងនាម ជាមន្ត្រីនៃក្រសួងពាណិជ្ជកម្ម ដែលជាអ្នកកំណត់តម្លៃប្រេងនៅលើទីផ្សារកម្ពុជា លោកថា លោកមិនចង់ឲ្យតម្លៃប្រេងសាំងនៅលើទីផ្សារកើនឡើងទេ គឺចង់ឲ្យតែវាចុះទាប ដើម្បីសម្រួលដល់ជីវភាពរបស់ប្រជាពលរដ្ឋ ។ ម្យ៉ាងទៀត ក្រសួងក៏មិនចង់ទទួលបានពាក្យរិះគន់ពីសាធារណជនពីបញ្ហាតម្លៃប្រេងសាំងឡើងថ្លៃនេះដែរ ក៏ប៉ុន្តែឲ្យធ្វើយ៉ាងម៉េច បើតម្លៃទីផ្សារអន្តរជាតិក៏កើនឡើង ។
លោកបន្ថែមថា ការកំណត់តម្លៃនេះ មិនមែនតម្រូវឲ្យគ្រប់ស្ថានីយប្រេងឥន្ធនៈទាំងអស់លក់ក្នុងតម្លៃតាមការកំណត់ទេ ពោលគឺវាជាតម្លៃកំណត់អតិបរមា ឬខ្ពស់បំផុត តែម្ចាស់ស្ថានីយប្រេងនានាអាចលក់ក្នុងតម្លៃទាបជាងការកំណត់របស់ក្រសួងបាន ។ ជាក់ស្ដែង ស្ថានីយមួយចំនួននៅតាមខេត្ត បានដាក់លក់ក្នុងតម្លៃទាបជាងការកំណត់របស់ក្រសួង ហើយក្រសួងក៏ចូលរួមត្រេកអរផងដែរ ដែលម្ចាស់ស្ថានីយលក់ក្នុងតម្លៃទាបដូចនេះ សម្រាប់សម្រួលដល់អ្នកប្រើប្រាស់ ។ លោកបានបកស្រាយថា ការលក់ក្នុងតម្លៃខុសគ្នារវាងស្ថានីយនីមួយៗនៅរាជធានីភ្នំពេញ និងនៅតាមខេត្ត ដោយសារមានកត្តាច្រើនដូចជា ស្ថានីយប្រេងឥន្ធនៈនៅភ្នំពេញ បានជួលដីសម្រាប់សង់ស្ថានីយ ហើយការចំណាយ គឺខ្ពស់ជាងនៅតាមបណ្ដាខេត្ត ។ មួយវិញទៀត ចំពោះស្ថានីយនៅតាមខេត្តមួយចំនួន គ្រាន់តែបើកជាលក្ខណៈគ្រួសារ ហើយគាត់មានដីផ្ទាល់ខ្លួន និងមិនជួលបុគ្គលិកសម្រាប់ធ្វើការទេ ។ ដូចនេះ គាត់អាចលក់សាំងក្រោមការកំណត់របស់ក្រសួងបាន ។
លោក សុខ សុភ័ក្រ អនុរដ្ឋលេខាធិការក្រសួងពាណិជ្ជកម្មបានមានប្រសាសន៍ថា ប្រភពនៃការផលិតប្រេង គឺនៅអារ៉ាប់ឯណោះទៅវិញទេ ហើយបើសិនជាមានបញ្ហាណាមួយនៅក្នុងចំណោមប្រទេសផលិតប្រេងនៅលើពិភពលោក វានឹងធ្វើឲ្យតម្លៃប្រេងឡើងចុះ។ ដូចនេះ យើងឃើញថា តម្លៃប្រេងមានឡើងមានចុះ មិនមែនឡើងរហូត ហើយក៏មិនមែនចុះរហូតដែរ ។ លោក គឹម មាសសុខសីហា អគ្គនាយករងនៃអគ្គនាយកដ្ឋានកាំកុងត្រូល បានឲ្យដឹងដែរថា អគ្គនាយកដ្ឋានកាំកុងត្រូល ក៏បានស្វែងរកភាពមិនប្រក្រតីនៅតាមស្ថានីយលក់ប្រេងនានាទូទាំងប្រទេសផងដែរ ដើម្បីធានាគុណភាព និងភាពត្រឹមត្រូវជូនអ្នកប្រើប្រាស់ទាំងអស់។ កន្លងមក អគ្គនាយកដ្ឋានបានរកឃើញករណីលក់សាំងមិនគ្រប់ចំណុះទៅអតិថិជន ព្រមទាំងបានព្រមានដល់ម្ចាស់ស្ថានីយឲ្យបញ្ឈប់ បើនៅតែមិនបញ្ឈប់ អគ្គនាយកដ្ឋាននឹងប្រកាសផ្សព្វផ្សាយជាសាធារណៈ ហើយបើនៅតែមិនរាងចាលទៀត នឹងអាចឈានដល់ការដកហូតអាជ្ញាប័ណ្ណបិទអាជីវកម្មតែម្ដង ៕
ចែករំលែកព័តមាននេះ