រាជធានីភ្នំពេញ ៖ បន្ទាប់ពីការពិភាក្សាដេញដោលយ៉ាងតឹងតែងលើសេចក្តីព្រាងច្បាប់ស្តីពីហិរញ្ញវត្ថុសំរាប់ការគ្រប់គ្រងឆ្នាំ២០១១ រដ្ឋសភាបានសំរេចជាឯកច្ឆន្ទទៅលើសេចក្តីព្រាងច្បាប់នេះកាលពីថ្ងៃទី២៦ វិច្ឆិកា ២០១០ នៅវេលាម៉ោងប្រមាណ៩និង៤០នាទីព្រឹក។ នៅក្នុងច្បាប់នេះបានអនុញ្ញាតឱ្យរាជរដ្ឋាភិបាលប្រើប្រាស់ចំនួនទឹកប្រាក់ជាអតិបរមានៃឥណទានថវិកាថ្នាក់ជាតិសំរាប់ការគ្រប់គ្រងឆ្នាំ២០១១ ត្រូវបានកំណត់ស្មើនឹង៩.៨៤៩.៦៥២លានរៀល។ ការអនុម័តនេះមានសំលេងគាំទ្រ៧៦លើ៩៨សំលេង។
យោងតាមសេចក្តីព្រាងច្បាប់នេះនៅត្រង់ជំពូកទី២ មាត្រា៧ ចែងថា អនុម័តយល់ព្រមឱ្យរាជរដ្ឋាភិបាលខ្ចីប្រាក់ពីបរទេសមានកំរិតរហូតដល់៤០០.០០០.០០០S.D.R សំរាប់ការគ្រប់គ្រងឆ្នាំ២០១១។ ការខ្ចីដែលត្រូវចុះកិច្ចសន្យាក្នុងកំរិតខាងលើត្រូវមានលក្ខណៈជាការខ្ចីសម្បទានដែលត្រូវសងវិញជាមួយប្រាក់អនុគ្រោះ។ នៅក្នុងលក្ខខណ្ឌនេះ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាអ្នកមានសិទ្ធិស្របច្បាប់តែមួយគត់តាមការប្រទានសិទ្ធិជាលាយលក្ខណ៍អក្សររបស់នាយករដ្ឋមន្ត្រីនៃរាជរដ្ឋាភិបាលកម្ពុជា ក្នុងការចុះហត្ថលេខាលើការខ្ចីជាគុណប្រយោជន៍នៃថវិកាទូទៅរបស់រដ្ឋ ឬលើការធានារបស់រដ្ឋ ហើយត្រូវធ្វើរបាយការណ៍ស្តីពីការអនុវត្តនៃការខ្ចី និងការធានានេះជូនរដ្ឋសភា និងព្រឹទ្ធសភារៀងរាល់៦ខែម្តង។
លោកជាម យៀម ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវកម្មនៃរដ្ឋសភាបានមានប្រសាសន៍ថា ថវិកាកម្ចីទាំងនេះរដ្ឋាភិបាលនឹងត្រូវប្រើប្រាស់ចំពោះភាពជាក់ស្តែងជាបន្ទាន់ដូចជាផ្នែកសង្គមកិច្ច មនុស្សធម៌ សង្គ្រោះបន្ទាន់ ឬគ្រោះមហន្តរាយនានាដែលអាចកើតមានជាយថាហេតុ។ ថវិកាទាំងនេះមានការប្រាក់ទាប ហើយត្រូវបង្វិលការប្រាក់ទៅគេវិញក្នុងរយៈពេលចាប់ពី១០ឆ្នាំ ១១ឆ្នាំ ក្រោយពីបានទទួលរហូតដល់រយៈពេល៣០ឆ្នាំ។ បើទោះបីជាតំណាងរាស្ត្រមកពីគណបក្សជំទាស់សម រង្ស៊ី ដែលស្ថិតនៅក្រៅរដ្ឋាភិបាលមិនគាំទ្រចំពោះច្បាប់នេះក្តី ក៏សមាជិកសភាមកពីគណបក្សប្រជាជនកម្ពុជាគ្រប់គ្រងប្រទេសច្រើនលើសលប់បានបោះឆ្នោតគាំទ្រក្នុងចំណោមអ្នកតំណាងរាស្ត្រសរុប១២៣រូប។ ការអនុម័តសេចក្តីព្រាងច្បាប់នេះបានដាក់ទៅក្នុងកិច្ចការប្រញាប់ ហើយប្រើរយៈពេល១ថ្ងៃកន្លះ។
លោកឈាង វ៉ុន តំណាងរាស្ត្រមកពីគណបក្សប្រជាជនមានប្រសាសន៍ថា “យើងខ្ចីគេយកមកអភិវឌ្ឍប្រទេសជាតិ ហើយគេឱ្យយើងខ្ចីគេយល់ថា យើងជាអ្នកមានគំនិតដើម្បីប្រើប្រាស់ថវិកានេះ តែបើយើងគ្មានគំនិត ឬគេមិនជឿទុកចិត្តយើងទេ គេក៏មិនឱ្យយើងខ្ចីដែរ។ នៅលើពិភពលោកយើងនេះប្រទេសណាក៏ខ្ចីលុយគេដែរ ឬក៏ជំពាក់បំណុលគេដែរ ហើយនៅពេលយើងមានលទ្ធភាពគ្រប់គ្រាន់យើងលែងខ្ចីគេហើយ”។ យោងតាមតារាងចំណាយថវិកាថ្នាក់ជាតិនៃសេចក្តីព្រាងច្បាប់ដដែលឱ្យដឹងថា សរុបរួមចំណាយសំរាប់ឆ្នាំ២០១១ មាន៩.៨៤៩.៦៥២លានរៀល ដែលក្នុងនោះចំណាយថ្នាក់កណ្តាលមានប្រមាណ៨.៤៩៣.៨៦៧លានរៀល និងមន្ទីរជំនាញរាជធានី-ខេត្ត ១.៣៥៥.៧៨៥លានរៀល។ ព្រះរាជវាំង ៥០.៨៦៤,៣លានរៀល រដ្ឋសភា១០៧.៨៩៤,២លានរៀល, ព្រឹទ្ធសភា៣៥.០០១,០លានរៀល, ក្រុមប្រឹក្សាធម្មនុញ្ញ ៦.៧៩៦,៨លានរៀល, ទីស្តីការគណៈរដ្ឋមន្ត្រី ២៤៤.៦៩៦,៣លានរៀល, រដ្ឋលេខាធិការដ្ឋានមុខងារសាធារណៈ ៣.០៩៧,០លានរៀល ក្រុមប្រឹក្សាអភិវឌ្ឍន៍កម្ពុជា ៥.៦៥៩,៦លានរៀល ក្រសួងមហាផ្ទៃ, រដ្ឋបាលទូទៅ ៥៥.៧៤៨,៥លានរៀល, ក្រសួងទំនាក់ទំនងរដ្ឋសភាព្រឹទ្ធសភា និងអធិការកិច្ច ១៥.៩២៥,១លានរៀល។
សំរាប់ក្រសួងការបរទេស និងសហប្រតិបត្តិការអន្តរជាតិ ៧៤.៣៦៥,៩លានរៀល, ក្រសួងសេដ្ឋកិច្ច និងហិរញ្ញវត្ថុ ៨៧.៨១៣,២លានរៀល, ក្រសួងផែនការ ២៤.៩០៤,៨លានរៀល, ក្រសួងយុត្តិធម៌ ៣៥.៩៧៧,៥លានរៀល, គណៈកម្មាធិការជាតិរៀបចំការបោះឆ្នោត ១៣.៥៨៥,៧លានរៀល, អាជ្ញាធរសវនកម្មជាតិ ៦.៤៦៦,៤លានរៀល, វិស័យការពារជាតិ និងសន្តិសុខ ១.២៤៧.៧៨២,១លានរៀល, ក្រសួងការពារជាតិ ៧៧៩.៨៧៩,០លានរៀល, ក្រសួងមហាផ្ទៃ សន្តិសុខសាធារណៈ ៤៦៧.៩០៣,៧លានរៀល, វិស័យសង្គមកិច្ច ២.១០៦.៥៩០,២លានរៀល, ក្រសួងព័ត៌មាន ៥២.០៩៥,៣លានរៀល និងក្រសួងសុខាភិបាល ៦៩៤.៣៣១,៤លានរៀល៕
ចែករំលែកព័តមាននេះ