ខេត្តក្រចេះ ៖ សេចក្តីរាយការណ៍ឱ្យដឹងថា នៅថ្ងៃទី០៨ ឧសភា នេះ ស្ថានភាពនៃការពុល គឺត្រូវបានធូរស្រាលទៅវិញអស់ហើយ ខណៈអ្នកភូមិដែលរងគ្រោះដោយសារពុលនេះ ក៏មិនមានតួលេខកើនឡើង…
ខេត្តក្រចេះ ៖ សេចក្តីរាយការណ៍ឱ្យដឹងថា នៅថ្ងៃទី០៨ ឧសភា នេះ ស្ថានភាពនៃការពុល គឺត្រូវបានធូរស្រាលទៅវិញអស់ហើយ ខណៈអ្នកភូមិដែលរងគ្រោះដោយសារពុលនេះ ក៏មិនមានតួលេខកើនឡើង
ដែរ ស្របគ្នាជាមួយអ្នកភូមិដែលរងគ្រោះហើយជួយសង្គ្រោះនោះ ក៏មានភាពធូរស្រាល និងបានត្រឡប់ទៅកាន់ភូមិឋានជាបណ្តើរៗវិញ ។ នេះបើតាមការបញ្ជាក់ពីប្រធានមន្ទីរសុខា ភិបាលខេត្ត គឺលោកឈ្នាង សុវត្ថា ។
ក្រោយពីស្ថានភាពនៃការពុល ដែលអាជ្ញាធរបានកំណត់ថា «ដើមចមបណ្តាលមកពីស្រា.ស និងទឹកព្រែក» ទើបផ្ទុះជាបាតុភាពយ៉ាងគំហុក វាយលុកដល់ពលរដ្ឋស្ទើរពេញមួយភូមិ គឺស្ថិតក្នុងភូមិស្រែនន ឃុំកន្ទួត ស្រុកចិត្របុរី ក្នុងនោះបង្កឱ្យអ្នកភូមិប្រុស-ស្រីយ៉ាងតិច១៣បានស្លាប់ និងជាច្រើនរយនាក់ទៀតត្រូវចាត់មកសង្គ្រោះ ។
ជួបជាមួយបុរសម្នាក់និយាយរដឺនៗ ជាជនជាតិភាគតិចព្នង ឈ្មោះហញ ក្លើស អាយុ៧៦ឆ្នាំ ដែលមានប្រពន្ធបានស្លាប់ដោយការពុលនេះបានរៀបរាប់ថា អាការៈគាត់បានធូរស្រាល ក្រោយពីបានមកព្យាបាលនៅមន្ទីរពេទ្យ។ ហើយគាត់នឹងចូលទៅរស់នៅក្នុងភូមិវិញ ប្រសិនបើមានអ្នកភូមិជាច្រើនចូលទៅដែរនោះ ។ គាត់ថា អ្នកភូមិនិងមានពិធីតាមប្រពៃណីជនជាតិភាគតិច គឺកាប់ គោ ក្របី ដើម្បីសែនដល់អ្នកតាម្ចាស់ស្រុកក្រោយពីស្ថានភាពពុលនេះ បានធូរស្រាល ។ លើកឡើងស្រដៀងគ្នានេះដែរ អ្នកភូមិខ្លះថា ពួកគាត់ហាក់ដូចជាមិនហ៊ានចូលទៅរស់នៅក្នុងភូមិវិញទេ នៅពេលដែលភូមិរបស់គាត់ បានជួបគ្រោះអាក្រក់ធ្វើឱ្យមានមនុស្សស្លាប់យ៉ាងរង្គាលបែបនេះរួចមក ។
គួរបញ្ជាក់ថា ភូមិស្រែនន ឃុំកន្ទួត ស្រុកចិត្របុរី ជាភូមិមួយសំបូរទៅដោយបងប្អូនជនជាតិភាគតិចព្នងរស់នៅ មានទីតាំងនៅប្រ៉បដងព្រែកទេរ ក្នុងរយៈពេលប៉ុន្មានថ្ងៃចុងក្រោយនេះ ធ្វើឱ្យភូមិដែលធ្លាប់មានអ្នកភូមិរស់នៅយ៉ាងក្អាកក្អាយ ឥឡូវប្រែក្លាយទៅជាស្ងាត់ជ្រងំ និងត្រូវបានអ្នកភូមិប្តូរឈ្មោះថា «ជាភូមិខ្មោច» ។
ព័ត៌មានលម្អឹតមានផ្សាយជូនបន្តលើទំព័រកាសែតកោះសន្តិភាព ។
ចែករំលែកព័តមាននេះ