ពិធីសំណេះសំណាលជាមួយសមាជិកសមាគមអតីតយុទ្ធជន
- បាត់ដំបង
ខេត្តបាត់ដំបង ៖ នៅថ្ងៃទី០៦ ដល់ថ្ងៃទី០៨ ខែឧសភា ឆ្នាំ២០១៨ លោកនាយឧត្តមសេនីយ៍ គន់ គីម ជួបសំណេះសំណាលជាមួយសមាជិកសមាគមអតីតយុទ្ធជនចំនួន៥ស្រុក…
ខេត្តបាត់ដំបង ៖ នៅថ្ងៃទី០៦ ដល់ថ្ងៃទី០៨ ខែឧសភា ឆ្នាំ២០១៨ លោកនាយឧត្តមសេនីយ៍ គន់ គីម ជួបសំណេះសំណាលជាមួយសមាជិកសមាគមអតីតយុទ្ធជនចំនួន៥ស្រុក…
ខេត្តបាត់ដំបង ៖ នៅថ្ងៃទី០៦ ដល់ថ្ងៃទី០៨ ខែឧសភា ឆ្នាំ២០១៨ លោកនាយឧត្តមសេនីយ៍ គន់ គីម ជួបសំណេះសំណាលជាមួយសមាជិកសមាគមអតីតយុទ្ធជនចំនួន៥ស្រុក តំបន់ជាយដែនក្នុងទិស យោធភូមិភាគទី៥ ខេត្តបាត់ដំបង មានស្រុកសំឡូត ស្រុកគាស់ក្រឡ ស្រុកសង្កែ ស្រុករុក្ខគីរី និងស្រុកបាណន់ សរុបចំនួនជាង៤ពាន់នាក់។ ក្នុងពិធីជួបសំណេះសំណាលនេះក្រោមអធិបតីភាពលោកនាយឧត្តមសេនីយ៍ គន់ គីម អគ្គលេខាធិការ គណៈអចិន្ត្រៃយ៍ នៃគណៈកម្មាធិការកណ្តាល សមាគមអតីតយុទ្ធជនកម្ពុជា លោក អ៊ុក គង់ ប្រធានក្រុមការងារចុះជួយស្រុកសំឡូត លោក ឡោក ហួរ សមាជិករដ្ឋសភា តំណាងរាស្ត្របាត់ដំបង ប្រធានក្រុមការងារស្រុកសង្កែ លោកឧត្តមសេនីយ៍ឯក ប៊ុន សេង មេបញ្ជាការរង កងទ័ពជើងគោក មេបញ្ជាការ យោធភូមិភាគទី៥ សមាជិក គណៈអចិន្ត្រៃយ៍ នៃគណៈកម្មាធិការកណ្តាល សមាគម អតីតយុទ្ធជនកម្ពុជា និងប្រតិភូអមដំណើរ អញ្ជើញជាអធិបតីក្នុងពិធីសំណេះសំណាល និងបំពាក់មេដាយការពារជាតិ ជូនដល់សមាជិក អតីតយុទ្ធជនកម្ពុជា ទាំង៥ស្រុក ក្នុងខេត្តបាត់ដំបង ដោយអមដំណើរដោយ លោកងួន រតនៈ អភិបាលខេត្តបាត់ដំបង លោកឧត្តមសេនីយ៍ទោ អ៊ុក ឃ្នួច មេបញ្ជាការរងយោធភូមិភាគទី៥ មេបញ្ជាការតំបន់ប្រតិបត្តិការសឹករងបាត់ដំបង ជាប្រធាន ស.អ.ក ខេត្ត, លោក គឹម តេង ប្រធានមន្ទីរសង្គមកិច្ចខេត្ត មេបញ្ជាការកងរាជអាវុធហត្ថខេត្ត ស្នងការនគរបាលខេត្ត ជាសមាជិក គណៈកម្មាធិការ ស.អ.ក ខេត្ត, លោកប្រធានក្រុមប្រឹក្សាស្រុក, លោកអភិបាលស្រុក, លោកប្រធាន អនុប្រធាន ស.អ.ក ស្រុក, ក្រុមការងារ ស.អ.ក ខេត្ត/ស្រុក, លោកប្រធាន អនុប្រធានសាខាឃុំ អាជ្ញាធរដែនដី សរុបចំនួន៧៥នាក់។
លោកឧត្តមសេនីយ៍ទោ អ៊ុក ឃ្នួច ប្រធានសមាគមអតីតយុទ្ធជនខេត្តបាត់ដំបងបានរាយការណ៍ ការចុះជួយដោយផ្ទាល់ដល់ខ្នងផ្ទះ និងពិនិត្យមើលស្ថានភាពការខ្វះខាត ជីវភាពជួបការលំបាក ជួយសាងសង់ជម្រកស្នាក់នៅ ដល់បងប្អូនណាដែលកំពុងជួបការលំបាក ហើយស្រាវជ្រាវបន្តទៅទៀតនៅតាមតំបន់ជនបទ ដើម្បីឲ្យបងប្អូនយើងទទួលបានការឧបត្ថម្ភ យកចិត្តទុកដាក់ពីសម្តេចតេជោ ហ៊ុន សែន ដោយផ្ទាល់ ក្នុងការដឹងគុណដល់អតីតយុទ្ធជនយើងដែលបានបូជាសាច់ស្រស់ឈាមស្រស់ដើម្បីការពារជាតិ និងរំដោះប្រទេសជាតិបានរួចចាកផុតពីសម័យមានសង្គ្រាមរួចមក។ លោក ឡោក ហួរ សមាជិករដ្ឋសភា តំណាងរាស្ត្រមណ្ឌលបាត់ដំបង ប្រធានក្រុមការងារចុះជួយស្រុកសង្កែបានថ្លែងថា បងប្អូនដែលជាអតីតយុទ្ធជនគឺបានស្គាល់ច្បាស់ណាស់អំពីសង្គ្រាម គឺវាបាននាំមកនូវភាពអន្តរាយ ខ្ទេចខ្ទាំ ព្រាត់ប្រាស់បងប្អូន និងភាពពិការបន្សល់ទុកមកឲ្យយើងឃើញសព្វថ្ងៃនេះឲ្យរងទុក្ខវេទនា ដូច្នេះសូមបងប្អូនកុំជឿពាក្យឃោសនារបស់ជនអគតិមួយចំនួនដែលមានបំណងផ្តួលរំលំរាជរដ្ឋាភិបាលដែលកើតឡើងពីការបោះឆ្នោតតាំងពីឆ្នាំ១៩៩៣ មកដើម្បីបង្រួបបង្រួមខ្មែរយើង ដែលមានច្រើនភាគីនយោបាយ ឲ្យមករួមគ្នានៅតែមួយហើយរក្សាសុខសន្តិភាពបានរហូតដល់សព្វថ្ងៃនេះ តើបងប្អូនចង់បានសង្គ្រាម និងភាពអន្តរាយទាំងនោះវិលត្រឡប់មកវិញឬទេ? ការសន្យាបានតែសន្យា តែពិតប្រាកដគឺយើងទាំងអស់គ្នានៅទីនេះជាអ្នកធ្វើ។
បន្តមកលោកនាយឧត្តមសេនីយ៍ គន់ គីម បានថ្លែងថា ដោយមានការយកចិត្តទុកដាក់ពីសម្តេចតេជោ ហ៊ុន សែន បានប្រើនយោបាយឈ្នះ ឈ្នះ ទទួលបានសុខសន្តិភាពនៅកម្ពុជារួចហើយ បានបន្សល់ទុកបងប្អូនអតីតយុទ្ឋជនយើងមកពីគ្រប់ភាគី ដែលមិនសូវមានគណបក្សនយោបាយណាចាប់អារម្មណ៍ជួយមើលដឹងសុខទុក្ខក្នុងផ្នែកជីវភាព ការលំបាករបស់បងប្អូនឡើយ។ ទើបសម្តេចតេជោបានយល់ដឹងអំពីការតស៊ូលំបាកកន្លងមករហូតមាន ភាពពិការនៅក្នុងខ្លួនទៀតព្រោះតែបុព្វហេតុការពារជាតិមាតុភូមិកម្ពុជាឲ្យមកទទួលបានសុខសន្តិភាពដោយពិតប្រាកដរហូតដល់សព្វថ្ងៃនេះ ទើបជំរុញបង្កើតបានជាសមាគមអតីតយុទ្ធជនដែលមានសម្តេច ជាប្រធាន សម្រាប់ជួយទ្រទ្រង់ក្នុងការដឹងគុណ ដោយរៀបចំចុះជួយដោយផ្ទាល់ជាច្រើនឆ្នាំកន្លងមកនេះ ហើយរៀបចំឲ្យមានប្រាក់បៀវត្សប្រចាំខែ ចុះជួយសាងសង់លំនៅដ្ឋាន និងសំខាន់ផ្តល់អាទិភាពឲ្យកូនចៅ បងប្អូនអតីតយុទ្ធជនបានចូលបម្រើក្នុងជួរកងទ័ពដោយគ្មានលក្ខខណ្ឌអ្វីធ្ងន់ធ្ងរឡើយ ដោយគ្រាន់តែតម្រូវការកម្លាំងប្រមាណ៦ពាន់នាក់សោះ បងប្អូនយើងបានស្ម័គ្រចិត្តបានប្រមាណ៧០% រួចជាស្រេចបាត់ទៅហើយ។ ហើយចំពោះប្រាក់បៀវត្សក្នុងជួរគ្រប់មន្ត្រីរាជការទាំងអស់ បានដំឡើងបន្ថែម ពី១ឆ្នាំទៅមួយឆ្នាំ ចេះតែមានការកើនឡើងជារៀងរហូត។ លោកនាយបានបញ្ជាក់បន្ថែម តាមការចង្អុលបង្ហាញពីសម្តេចតេជោ អំពីផ្នែកសុខមាលភាពរបស់សមាជិកអតីតយុទ្ធជន គឺត្រូវបានចូលព្យាបាលនៅក្នុងមន្ទីរពេទ្យដោយមិនគិតថ្លៃឡើយ។
បន្តមកពិធីសំណេះសំណាល និងបំពាក់មេដាយមាស មេដាយប្រាក់ និងសំរិទ្ធ ជូនដល់សមាជិក អតីតយុទ្ធជនស្រុកសំឡូត ចំនួន១.៦៩២នាក់ ស្រុកសង្កែចំនួន៨០០នាក់ ស្រុករុក្ខគីរីចំនួន ៣៤៣នាក់ ស្រុកគាស់ក្រឡចំនួន ៤១១នាក់ ស្រុកបាណន់ចំនួន ៩៤៦នាក់។ លោក ឡោក ហួរ ប្រធានក្រុមការងារស្រុកសង្កែ បានជួយឧបត្ថម្ភជាថវិកា១ម៉ឺនដុល្លារ បន្ថែមលើថវិកា សម្តេចតេជោ សម្រាប់រួមចំណែកចែកបងប្អូនសមាជិកទាំងអស់ជាង៤ពាន់នាក់ ក្នុងម្នាក់ៗទទួលបានថវិកាចំនួន ៥០,០០០រៀល ជាអំណោយរបស់សម្តេច អគ្គមហាសេបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ប្រធានសមាគមអតីតយុទ្ធជនកម្ពុជា និងសម្តេចគត្តិព្រឹទ្ធបណ្ឌិត ប៊ុន រ៉ានី ហ៊ុនសែន។ ក្នុងឱកាសនេះដែរ ឯកឧត្តម នាយឧត្តមសេនីយ៍ អគ្គលេខាធិការ បានសំណេះសំណាល ផ្តាំផ្ញើសួរសុខទុក្ខពីសំណាក់សម្តេច អគ្គមហាសេនាបតី តេជោ ហ៊ុន សែន ប្រធាន សមាគម អតីតយុទ្ធជនកម្ពុជា និងបានលើកសរសើរការខិតខំប្រឹងប្រែងរបស់ថ្នាក់ដឹកនាំ ស.អ.ក ខេត្តបាត់ដំបងគ្រប់លំដាប់ថ្នាក់ និងបន្តពង្រឹងជួយបងប្អូនយើងជាបន្តទៅទៀត៕
ចែករំលែកព័តមាននេះ