ខេត្តកណ្តាល ៖ លោកអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថា ពេលក្រសួងការងារបានកំពុងរៀបចំធ្វើវិសោធនកម្មច្បាប់ស្តីពីរបបសន្តិសុខសង្គម ដើម្បីពង្រីកវិសាលភាពលក្ខខណ្ឌពេលវេលា និងអាយុចូលនិវត្តន៍របស់សមាជិកបេឡាជាតិរបបសន្តិសុខសង្គម (ប.ស.ស) ។
ថ្លែងក្នុងទិវាពិភពលោក ដើម្បីសុខភាព និងសុវត្ថិភាពការងារឆ្នាំ២០១៨ នាព្រឹកថ្ងៃទី០៧ ខែឧសភា ឆ្នាំ២០១៨ ក្រោមប្រធានបទ «ភាពងាយរងគ្រោះផ្នែកសុខភាព និងសុវត្ថិភាពការងារ របស់និយោជិតវ័យក្មេង» នៅតំបន់អភិវឌ្ឍន៍វិហារសួរ លោករដ្ឋមន្ត្រី អ៊ិត សំហេងលើកឡើងថា ទិវាពិភពលោក ដើម្បីសុខភាព និងសុវត្ថិភាពការងារឆ្នាំ២០១៨ ប្រព្រឹត្តទៅក្រោមបរិយាកាស ប្រកបដោយសន្តិភាព ស្ថិរភាព និងការអភិវឌ្ឍដែលអំណោយផលដល់ការរក្សា និងបង្កើតការងារជូនកម្មករ និយោជិតនៅឆ្នាំ២០១៨នេះ វិស័យការងារបន្តអភិវឌ្ឍរីកចម្រើន អត្រាមានការងារធ្វើ៩៩,៣% បរិមាណការងារសរុបមានប្រមាណជិត១០លាននាក់ ។
លោកបន្តថា សហគ្រាស គ្រឹះស្ថាន សេដ្ឋកិច្ចក្នុងប្រព័ន្ធដែលបានចុះបញ្ជីនៅក្រសួងការងារ និងបណ្តុះបណ្តាលវិជ្ជាជីវៈមានចំនួនសរុបជាង១ម៉ឺន២ពាន់គ្រឹះស្ថានកើនចំនួន១០,០២% និងមានកម្មករនិយោជិតសរុបចំនួនជិត១លាន៥សែននាក់ កើនចំនួន២១,១១% (ស្រីជាង៨សែននាក់) ធៀបនឹងឆ្នាំ២០១៧ ។
សហគ្រាស គ្រឹះស្ថានសេដ្ឋកិច្ចក្រៅប្រព័ន្ធសរុបមានចំនួនជិត៦សែន មានកម្មករចំនួនជាង២លាន៤សែននាក់ វិស័យកសិកម្មប្រមាណជាង៤លាននាក់ ពលករធ្វើការនៅក្រៅប្រទេសមានចំនួនប្រមាណ១លាន២សែននាក់ និងមន្ត្រីសាធារណៈចំនួនប្រមាណជាង៥សែននាក់ ។
ដោយអនុវត្តតាមយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលក្រសួងការងារ និង បណ្តុះបណ្តាលវិជ្ជាជីវៈបានដាក់ចេញនៅក្នុងផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈដែលនោះផ្តល់អាទិភាពដល់ការពង្រឹងប្រព័ន្ធអនាម័យ និងសុវត្ថិភាព ការងារ គឺជាសកម្មភាពអាទិភាពមួយដែលក្រសួងត្រូវយកចិត្តទុកដាក់ ដើម្បីធានាដល់ការអភិវឌ្ឍ លក្ខខណ្ឌការងារ និងសុខដុមនីយកម្មទំនាក់ទំនងវិជ្ជាជីវៈ ។
កន្លងទៅនេះក្រសួងបានខិតខំអនុវត្តនូវអ្វីដែលបានដាក់ចេញយ៉ាងមានប្រសិទ្ធភាពខ្ពស់ដោយ ទទួលបានលទ្ធផលសំខាន់ៗដូចជា បានរៀបចំគោលនយោបាយស្តីពីសុខភាព និងសុវត្ថិភាព ការងារ បង្កើតគណៈកម្មាធិការជាតិសុខភាព និងសុវត្ថិភាពការងារ, សេចក្តីព្រាង បញ្ជីឈ្មោះ ជំងឺវិជ្ជាជីវៈ ដោយយោងតាមបញ្ជីឈ្មោះជំងឺវិជ្ជាជីវៈ របស់អង្គការអន្តរជាតិខាងការងារ, ផែនការ មេលើកទី២ ស្តីពីសុខភាព និងសុវត្ថិភាពការងារ, រៀបចំ និងធ្វើបច្ចុប្បន្នភាពលិខិតបទដ្ឋានគតិយុទ្ធបន្ថែម, បន្តយុទ្ធនាការបង្កាមេរោគអេដស៍ និងជំងឺអេដស៍នៅកន្លែងធ្វើការ, ពង្រឹងការចូលរួម និងការលើកទឹកចិត្តក្នុងការការពារសុខភាព និងសុវត្ថិភាពការងារពីសំណាក់ ម្ចាស់សហគ្រាស គ្រឹះស្ថាន អង្គការ កម្មករនិយោជិត, ពង្រីកការការពារ សុខភាព និងសុវត្ថិភាពការងារដល់ សហគ្រាសខ្នាតតូច និងមធ្យមការជម្រុញការរៀបចំសេវាពេទ្យ នៅតាមសហគ្រាស គ្រឹះស្ថាន, គម្រោងបង្កើតមន្ទីរពិសោធន៍ សុខភាព និងសុវត្ថិភាពការងារនាពេលខាងមុខ ដើម្បីពង្រឹងប្រព័ន្ធសុខភាព និងសុវត្ថិភាពថ្នាក់ជាតិ ថ្នាក់ក្រោមជាតិ និងថ្នាក់សហគ្រាសគ្រឹះស្ថាន ដែលជាកម្លាំងជម្រុញដ៏សំខាន់ក្នុងការកសាងវប្បធម៌ សុខភាព និងសុវត្ថិភាពការងារនៅកន្លែងធ្វើការ ។
លោកបញ្ជាក់ថា «ក្រសួងការងារ និងបណ្តុះបណ្តាលវិជ្ជាជីវៈកំពុងរៀបចំធ្វើវិសោធនកម្មច្បាប់ស្តីពីរបបសន្តិសុខសង្គម ដើម្បីពង្រីកវិសាលភាពលក្ខខណ្ឌ ពេលវេលា និងអាយុចូលនិវត្តន៍របស់ សមាជិក ប.ស.ស ។ អនុលោមតាមច្បាប់ស្តីពីការងារ បច្ចុប្បន្ននេះរោងចក្រសហគ្រាសប្រមាណ ៨៨ភាគរយ មានគិលានដ្ឋាន ប្រចាំរោងចក្រ, កន្លែងហូបបាយ៣៣ភាគរយ, បន្ទប់បំបៅកូន២១ ភាគរយ និងទារកដ្ឋាន២៨ ភាគរយ ដែលបានជួយដល់បញ្ហាសុខុមាល ភាពរបស់កម្មករនិយោជិត ។
ជាងនេះទៅទៀត តាមរយៈការអនុវត្តក្របខណ្ឌគោលនយោបាយជាតិគាំពារសង្គមរាជរដ្ឋាភិបាលបានផ្តល់អត្ថប្រយោជន៍ថ្មីៗ បន្ថែមទៀតជូនកម្មករនិយោជិតដូចជា ៖ បានពិនិត្យ និងព្យាបាលជំងឺនៅតាមមន្ទីរពេទ្យរដ្ឋទាំងអស់ ដោយមិនបង់ប្រាក់ ។ បានអនុវត្តការផ្តល់ប្រាក់ឈ្នួល១២០ភាគរយ និងការឈប់សម្រាករយៈពេល៣ខែក្នុងពេលសម្រាលកូនជូនកម្មការិនិ ។ បានអនុវត្តកម្មវិធីផ្តល់ប្រាក់ឧបត្ថម្ភដល់កម្មការិនីសម្រាលកូនក្នុង១ខែ ជាមធ្យម៤៨០០នាក់ ដោយផ្តល់ជូនកូន១នាក់ ថវិកាចំនួន៤០ម៉ឺនរៀល កូនភ្លោះ២នាក់ ថវិកាចំនួន៨០ម៉ឺនរៀល និងកូនភ្លោះ៣នាក់ថវិកាចំនួន១លាន២សែនរៀល ព្រមទាំងទទួលបានថវិកា បន្ថែមចំនួន៥លានរៀល ពីសម្តេចតេជោ ហ៊ុនសែន ។
លោកបន្តថា រដ្ឋាភិបាលបានកំណត់ឱ្យនិយោជកជាប់កាតព្វកិច្ចបង់ភាគទានរបបសន្តិសុខសង្គមផ្នែក ថែទាំសុខភាព១០០% ជំនួសកម្មករនិយោជិតចាប់ពីខែមករា ឆ្នាំ២០១៨ ។ រដ្ឋបាលថ្នាក់ក្រោមជាតិបានត្រួតពិនិត្យជាប្រចាំនូវថ្លៃឈ្នួលផ្ទះ ថ្លៃទឹក និងថ្លៃអគិ្គសនីនៅតាមផ្ទះជួល និងផ្តល់ជូនកម្មករនិយោជិតធ្វើដំណើរតាមរថយន្តក្រុងនៅក្នុងរាជធានីភ្នំពេញ ដោយឥតបង់ប្រាក់ ។ រាជរដ្ឋាភិបាលកំពុងរៀបចំដាក់ឱ្យអនុវត្តរបបសន្តិសុខសង្គមផ្នែកសោធននិវត្តន៍ឆ្នាំ២០១៩ ។
រាជរដ្ឋាភិបាលបានផ្តល់បុរេប្រទានថវិកាចំនួនជាង៤លាន៦សែនដុល្លារសម្រាប់ទូទាត់ប្រាក់ឈ្នួល និងប្រាក់អត្ថប្រយោជន៍របស់កម្មករនិយោជិតចំពោះករណីនេះនាពេលខាងមុខ និងកំពុងបន្តពង្រឹងកិច្ចសហការជាមួយប្រទេសជាដៃគូ ដើម្បីបន្តផ្តល់ឱកាសការងារជូនពលករ ការពារសិទ្ធិ និងផលប្រយោជន៍ពលករដែលកំពុងបម្រើការងារនៅប្រទេសទាំងនេះ បង្កលក្ខណៈសម្បត្តិឱ្យបងប្អូនទទួលបានរបបគាំពារសង្គមទាំងបច្ចុប្បន្ន និងពេលដែលវិលត្រឡប់មកវិញ ៕
ចែករំលែកព័តមាននេះ