រាជធានីភ្នំពេញ ៖ «សូមអាជ្ញាធរមានសមត្ថកិច្ច និងភាគីពាក់ព័ន្ធលើកស្ទួយផ្តល់តម្លៃការពារអ្នកសារព័ត៌មាន… សិទ្ធិក្នុងការបញ្ចេញមតិ ការគោរពច្បាប់… ជំរុញឱ្យសេចក្តីព្រាងក្លាយជាច្បាប់ស្តីពីសិទ្ធិទទួលបានព័ត៌មាន ព្រោះអ្នកសារព័ត៌មានជាកញ្ចក់ឆ្លុះនៅក្នុងសង្គម» ។ នេះជាការថ្លែងរបស់គណៈអធិបតី…
រាជធានីភ្នំពេញ ៖ «សូមអាជ្ញាធរមានសមត្ថកិច្ច និងភាគីពាក់ព័ន្ធលើកស្ទួយផ្តល់តម្លៃការពារអ្នកសារព័ត៌មាន… សិទ្ធិក្នុងការបញ្ចេញមតិ ការគោរពច្បាប់… ជំរុញឱ្យសេចក្តីព្រាងក្លាយជាច្បាប់ស្តីពីសិទ្ធិទទួលបានព័ត៌មាន ព្រោះអ្នកសារព័ត៌មានជាកញ្ចក់ឆ្លុះនៅក្នុងសង្គម» ។ នេះជាការថ្លែងរបស់គណៈអធិបតី និងវាគ្មិនក្នុងទិវាសារព័ត៌មានពិភពលោក ៣ ឧសភា ឆ្នាំ២០១៨ នៅសណ្ឋាគារហុីម៉ាវ៉ារី ។
ទិវាសារព័ត៌មានពិភពលោកឆ្នាំនេះ ប្រារព្ធធ្វើក្រោមប្រធានបទ «សេរីភាពសារព័ត៌មាន សិទ្ធិទទួលព័ត៌មាន និងការបោះឆ្នោត» ដោយមានការអញ្ជើញចូលរួមពីលោកខៀវ កាញារីទ្ធ រដ្ឋមន្ត្រីក្រសួងព័ត៌មាន លោកជំទាវ Maria Sargren ឯកអគ្គរាជទូតស៊ុយអែតប្រចាំកម្ពុជា លោកស្រី Anne Lemaittre ប្រធានអង្គការយូណេស្កូប្រចាំកម្ពុជា លោក ប៉ែន បូណា ប្រធានក្លិបអ្នកកាសែតកម្ពុជា(CCJ) ។
លោក ប៉ែន បូណា បានមានមតិស្វាគមន៍ហើយថ្លែងថា អ្នកកាសែត១០នាក់បានស្លាប់ដោយសារគ្រាប់បែកនៅប្រទេសអាហ្វហ្គានីស្ថានដែលជាចំណុចគ្រោះថ្នាក់បំផុតចំពោះអ្នកកាសែតនៅលើពិភពលោក ។ ដោយឡែក នៅកម្ពុជា សូមគ្រប់អ្នកសារព័ត៌មានបន្ថែមផ្នែកក្រមសីលធម៌វិជ្ជាជីវៈថែមទៀត ដើម្បីត្រៀមទទួលច្បាប់ និងសិទ្ធិទទួលបានព័ត៌មាន ស្របពេលដែលកម្ពុជាកំពុងត្រៀមការបោះឆ្នោត ។
លោកស្រី Anne Lemaittre ប្រធានអង្គការយូណេស្កូប្រចាំកម្ពុជា ចង់ឲ្យសេចក្តីព្រាងច្បាប់ស្តីពីសិទ្ធិទទួលបានព័ត៌មានក្លាយជាច្បាប់មុនការបោះឆ្នោត ហើយឆ្នាំនេះជាលើកទី២៥លើពិភពលោកដែលបានប្រារព្ធទិវានេះ ដើម្បីលើកតម្លៃអ្នកសារព័ត៌មាននៅកម្ពុជា ។
លោកជំទាវ Maria Sargren ឯកអគ្គរាជទូតស៊ុយអែតប្រចាំកម្ពុជាមានប្រសាសន៍ថា សារព័ត៌មានដើរតួនាទីសំខាន់ណាស់ សម្រាប់ឲ្យអ្នកបោះឆ្នោតធ្វើការសម្រេចចិត្ត ក្នុងការបោះឆ្នោតជ្រើសតាំងតំណាងរបស់ខ្លួន និងជំរុញឲ្យមានចំណាត់ការលើអ្នកបំពានលើអ្នកសារព័ត៌មានកន្លងមក ។
លោកខៀវ កាញារីទ្ធ រដ្ឋមន្ត្រីក្រសួងព័ត៌មានមានប្រសាសន៍ថា បើនិយាយពីសិទ្ធិសេរីភាពសារព័ត៌មាន
គេមើលឃើញមានពីរក្រុម គឺមួយក្រុមមើលឃើញតែទឹកកន្លះកែវ ឯមួយក្រុមទៀត មើលឃើញទឹកពេញកែវ ។ គេមិនអាចប្រៀបធៀបអ្នកសារព័ត៌មាននៅប៉ែកអឺរ៉ុប ជាមួយកម្ពុជាបានទេ ព្រោះវាមានស្ថាន
ភាពខុសគ្នា ។ នៅកម្ពុជា អ្នកសារព័ត៌មានមានសេរីភាពពេញទី ដែលគ្រាន់តែនៅខេត្តរតនគិរី មានអ្នកសារព័ត៌មានដល់់ទៅ៣០០នាក់ ។ នៅកម្ពុជា មានសមាគមអ្នកសារព័ត៌មានរហូតដល់ទៅ៤០សមាគម ហើយការបោះឆ្នោតតែមួយមុខមិនមែនបញ្ជាក់ថា ប្រជាធិបតេយ្យទេ ។
ចំណែកលោក ហ៊ុយ វណ្ណៈ អនុរដ្ឋលេខាធិការក្រសួងមហាផ្ទៃ និងជាប្រធានសហភាពសហព័ន្ធអ្នកសារព័ត៌មានកម្ពុជា មានប្រសាសន៍ថា អ្នកសារព័ត៌មានមិនមែនជាសកម្មជនទេ ព្រោះជាអ្នកធ្វើការតាមវិជ្ជាជីវៈ និងមិនមែនធ្វើការដោយកំហឹងឡើយ ៕
ចែករំលែកព័តមាននេះ